Astrology கற்பூரம், கரி & வாழை மட்டை

-------------------------------------------------------------------------------------
Astrology கற்பூரம், கரி & வாழை மட்டை

மனிதர்களில் மூன்று வகை உண்டு என்று என் தந்தையார் சொல்வார்:

1. கற்பூர புத்திக்காரன்
2. கரி புத்திக்காரன்
3. வாழைமட்டை புத்திக்காரன்

என்று மனிதர்கள் மூன்று வகைப்படுவார்கள் என்பார்

தீயை அருகில் கொண்டுபோகும்போதே கற்பூரம் டக்’கென்று பிடித்துக் கொள்வதைப்போல கற்பூர புத்திக்காரன் சொன்னதை சொன்ன விநாடியே புரிந்து கொண்டுவிடுவான். கரி ஊத ஊதத்தான் நெருப்பைப் பிடித்துக் கொள்ளும். அந்தவகைப் புத்திக்காரனுக்கு, தொடர்ந்து சொல்லி, சொல்லிப் புரிய வைக்க வேண்டும். வாழைமட்டை புத்திக்காரனுக்கு என்ன சொன்னாலும், மண்டையில் ஏறாது.

ஜோதிடத்தில் புத்தியின் அளவை இன்னும் பல வகையாக்கலாம்.

புதன் ஆட்சி அல்லது உச்சம் பெற்று இருந்தாலும் அல்லது கேந்திர திரிகோணங்களில் இருந்தாலும் ஜாதகனை கற்பூர புத்திக்காரன் எனலாம்
அதற்கு மாறாக இருந்தால், வித்தை குறைவு. கரிபுத்திக்காரன். ஆனால் அதே புதன் தீய கிரகங்களின் சேர்க்கையோடு வலுவாக இருந்தால், ஆசாமி நெகட்டிவான வேலைகளில் படு கில்லாடியாக இருப்பான். அதற்கு வாழை மட்டையை உதாரணமாகச் சொல்ல முடியது. காய்ந்த சருகுகளைச் சொல்லலாம். சருகுகளுக்கும் வைத்தவுடன் பற்றிக் கொள்ளும் தன்மை உண்டு. அப்பறம் அச்சுப்பிச்சு, அம்மாஞ்சி போன்றவர்கள்

அதற்குப் பிறகுபுத்தி சுவாதீனமின்மை. அது கொடுமையானது.

மனகாரகனை வைத்தும் புத்திநாதனை வைத்தும் அதுபோன்று புத்திகள் பலவகைப்படும். அது மேல் நிலைப்பாடம். விரிவாக எழுத உள்ளேன். பொறுத்திருங்கள்.

தொட்டனைத்து ஊறும் மணற்கேணி மாந்தர்க்குக்
கற்றனைத்து ஊறும் அறிவு. - குறள் எண் 396

என்றார் வள்ளுவப் பெருந்தகை!
(மணலிலே தோண்டும் கிணற்றில், தோண்டிய அளவிற்கே நீர் ஊறும்; மாந்தருக்கும் அவரவர் முயன்று கற்றதன் அளவுக்கே அறிவும் ஊறிச் சுரக்கும்)

இன்று சொல்ல வந்த விஷயம் அதுதான். கற்பதை நிறுத்திவிடாதீர்கள். இன்று இணையத்தில் கோடிக்கணக்கான பக்கங்கள் அறிவை மேம்படுத்தும் முகமாக உள்ளன. தொடர்ந்து நல்ல ஆக்கங்களைப் படியுங்கள்.

தொடர்ந்து கல்விக்கு அதிபதியான சரஸ்வதி தேவியைப் பிரார்த்தனை செய்யுங்கள். உங்கள் அறிவை அவர் மேம்படுத்துவார். இன்று சரஸ்வதிக்கான பூஜை தினம். அவரை மனமுவந்து வணங்குவோம்!
---------------------------------------------------------------------------------------------------------

சரஸ்வதி தேவி எங்கெங்கே இருப்பார் என்று முண்டாசுக் கவிஞன் பட்டியல் இட்டுள்ளான். அசத்தலாக உள்ளது. அனைவருக்கும் தெரிந்த பாடல் என்றாலும், மீண்டும் ஒருமுறை படிப்பதால் ஒன்றும் குறைந்துவிடாது. படிப்போம். உங்களுடன் சேர்ந்து நானும் படிக்கிறேன்
அன்புடன்
வாத்தி (யார்)
---------------------------------------------------------------------------------------------------------

வெள்ளைத் தாமரைப் பூவில் இருப்பாள்
வீணை செய்யும் ஒலியில் இருப்பாள்
கொள்ளை இன்பம் குலவு கவிதை
கூறும் பாவலர் உள்ளத்தில் இருப்பாள்
(வெள்ளை)

உள்ளதாம் பொருள் தேடி உணர்ந்தே
ஓதும் வேதத்தின் உள் நின்று ஒளிர்வாள்
கள்ளமற்ற முனிவர்கள் கூறும்
கருணை வாசகத்து உட்பொருள் ஆவாள்
(வெள்ளை)

மாதர் தீங்குரல் பாட்டில் இருப்பாள்
மக்கள் பேசும் மழலையில் உள்ளாள்
கீதம் பாடும் குயிலின் குரலை
கிளியின் நாவை இருப்பிடம் கொண்டாள்
கோதகன்ற தொழில் உடைத்தாகி
குலவு சித்திரம் கோபுரம் கோயில்
ஈதனைத்தின் எழிலிடை உற்றாள்
இன்பமே வடிவாகிடப் பெற்றாள்
(வெள்ளை)
- மகாகவி சுப்ரமணிய பாரதி

வாழ்க வளமுடன்!