ஸ்டெல்லா சுசீலாவான கதை!

----------------------------------------------------------------------------------
 ஸ்டெல்லா சுசீலாவான கதை!

வாரமலர்
---------------------------------------------------------------------------------
"என்னடா விக்னேஷ்!? இப்படி ஒரு குண்டைத் தூக்கிப் போடரே!? நமக்கு இதெல்லாம் சரியா வருமா? சொன்னாக் கேளுடா! வேண்டாண்டா!"
அம்மா கண்ணீர் மல்கக் கை கூப்பிக் கொண்டு கேட்கிறார்.

அப்பா ஒன்றும் பேசாமல் மோட்டு வளையைப் பார்த்துக்கொண்டு "உர்" என்று முகத்தைப் வைத்துக் கொண்டு அமர்ந்துக் கொண்டிருக்கிறார்.

விக்னேஷ் சொன்ன விஷயம் அந்தக் குடும்பத்தில் குழப்பத்தை ஏற்படுத்தி விட்டது. அப்படி என்னதான் சொன்னான் விக்னேஷ்?

நவீன காலததில் புதிதாக அவ‌ன் ஒன்றும் சொல்லி விடவில்லை. நவ நாகரீக இளைஞர்கள் சொல்லாத எதையும் அவன் சொல்லி விடவில்லை.

"என் கூடப் பணி புரியும் பெண்ணை நான் விரும்புகிறேன்.கட்டினால் அவளைத்தான் கட்டுவேன்..."

வீட்டில் மெளனம் கவிந்து கொண்டது.யாரும் யாரோடும் பேசாமல் ஒரு வாரம் கடந்தது.

"விக்னேஷ்! வீட்டில் சொல்லி விட்டீர்களா?" அலுவலகத்தில் ஸ்டெல்லா கேட்டாள்.

"சொல்லிவிட்டேன்,ஸ்டெல்லா!அம்மாதான் கண்ணீரோடு வேண்டாம் என்று ஒருமுறை சொல்லியுள்ளார்கள்.அப்பா முகத்தைத் தூக்கி வைத்துக் கொண்டு பேசா மடந்தைபோல உள்ளார்.ஒரு வாரமாக ஒருவரோடு ஒருவர் பேசவில்லை.தம்பியும், தங்கையும் என்ன செய்வது என்று தெரியாமல் மெளனம் சாதிக்கிறார்கள்"

"எங்க‌ள் வீட்டிலும் இதே கதைதான், விக்னேஷ்! அப்பா அம்மா அக்கா மூவருமே எதிர்ப்பு"

"வீட்டில் சம்மதிப்பார்கள் என்று தோன்ற‌வில்லை,ஸ்டெல்லா!"

"ஆமாம், விக்னேஷ்!வீட்டாரின் சம்மதத்துடன் நம் திருமணம் நடக்கும் என்ற நம்பிக்கை எனக்கும் இல்லை!"
 
"இன்னும் ஒரு வாரம் பார்ப்போம்!அவர்கள் சம்மதிக்காவிட்டால் பதிவுத் திருமணம் செய்து கொள்வோம்!என்ன சொல்கிறாய்,ஸ்டெல்லா?"

"இன்னும் கொஞ்சம் பொறுமை காப்போம், விக்னேஷ்! நம் சீனியர் வாசுதேவன் சாரிடம் ஆலோசனை கேட்கலாமா?"

"சரி!கேட்ப்போம்!"

மதிய இடை வேளையில் வாசுதேவன் சாரின் முன்னால் நாற்காலியை இழுத்துப் போட்டுக் கொண்டு வந்து அமர்ந்த இருவரையும்,

"வாங்க!வாங்க!எப்படிப் போகுது உங்க‌ள் காதல்?" என்று உற்சாகமாக வரவேற்றார், சார்.

"அது விஷயமாகத்தான் சார், உங்களிடம் ஆலோசனை கலக்க வேண்டும்"

"கன்சல்டேஷன் ஃபீஸ் உண்டா?"என்று சிரித்துக் கொண்டே கேட்டார் வாசு சார்.

இருவர் இல்லங்களிலும் எதிர்ப்பு கடுமையாக இருப்பதை எடுத்துச் சொன்னார்கள்.

"நான் வேண்டுமானால் பேசிப் பார்க்கட்டுமா?" என்று முன் வந்தார் வாசு.

"ஓகே சார்!டபுள் ஓகே!" மகிழ்ச்சியுடன் சம்மதித்தார்கள் காதல் ஜோடி!

முதலில் விக்னேஷ்தான் அம்மாவையும் தம்பியையும் அலுவலகத்திற்கு அழைத்து வந்தான்.

அம்மா படபடப்பாகப் பேச ஆரம்பித்தார்."விக்னேஷ்தான் வீட்டுக்கு மூத்த பிள்ளை. கீழே ஒரு தம்பி, ஒரு தங்கை இருக்கிறார்கள்.இவன் இப்படி மதம் விட்டு மதம் மாறிக் கல்யாணம் செஞ்சுண்டால் அவர்கள் ரெண்டு பேரோட எதிர்காலம் பாதிக்காதா? நாங்கள் சுத்தமான ஸ்மார்த்தாள்.தாத்தாவெல்லாம் சாஸ்திரிகளா இருந்தவா.எங்க‌ளுக்குக் கொள்ளி போடக் கூட யோக்கியதை இல்லாமல் போகும்படி இப்படி ஒரு காரியத்தை இவன் செய்யலாமா?நீங்களே சொல்லுங்கோ...! இவனோட அப்பா வழியில் எல்லோரும் காரித் துப்பி விடுவார்கள். என் வீட்டாரிடமும் எனக்குத் தான் தலை குனிவு!..."

"சாவதானம் மாமி! சாவதானம்! நீங்கள் சொல்வது எல்லாம் சரிதான். எனக்கு ஒரு பையன் இருந்து அவன் இப்படி பண்ணினாலும் எனக்கும் படபடப்பாகத்தான் இருக்கும். ஆனாலும் இவா ரெண்டு பேரும் நாம சம்ம‌திக்கலைன்னா ஓடிப் போய் பதிவுக் கல்யாணம் செய்யவும் முடிவு செஞ்சுட்டா. அதனால என்ன‌ செய்யலாம் என்று நீங்களே சொல்லுங்கோ..."

வாசு சார் பக்குவமாகத் துவங்கினார்.

"உங்க‌ள் கவலையெல்லாம் ஊர் என்ன பேசும், உறவினர்கள் என்ன சொல்வார்கள் என்பதுதானே?அதுவும் இல்லாமல் கீழே இருக்கும் பையன், பெண்ணுக்குக் கல்யாணம் ஆக வேண்டுமே! நியாயமான கவலைதான் மாமி! இதுக்கெல்லாம் நான் ஒரு முடிவு தெரிவித்தால் நீங்கள் ஒப்புக்கொள்வீர்கள், இல்லையா...மாமி?" என்று கேட்டார் வாசு சார்.

"அதுவும் இல்லாமல் அவர்கள் வீட்டில் சைவமோ, அசைவமோ யாருக்குத் தெரியும்? சாப்பாடு விஷயத்தில் ரெண்டு பேருக்கும் ஒத்துப் போகுமா?"

விக்னேஷின் தாயார் இன்னொரு சந்தேகத்தைச் சொன்னார்.

"அந்தக் கவலை உங்க‌ளுக்கு வேண்டாம் மாமி.ஸ்டெல்லா சுத்த சைவம். அவர்கள் ஆதியில் சைவப் பிள்ளைமார் வகுப்பு. கிறிஸ்துவர்களாக மாறினாலும், சைவ உணவுப் பழக்கத்தை விடவில்லை. அந்த வகையில் ஒரு தொந்திரவும் வராது" என்றார் வாசு சார்.

"சரி,மாமி!ஸ்டெல்லா குடும்பத்திலும் பேசிவிட்டு நல்ல முடிவாகச் சொல்கிறேன்.எல்லாம் நல்லபடியாக‌ எல்லோருக்கும் திருப்தியாக முடியும் கவலைப்படாதீர்கள்" என்று கைகூப்பி வழி அனுப்பி வைத்தார்.

மறு நாளே தன் தாயையும் அக்காவையும் ஸ்டெல்லா அழைத்து வந்து விட்டாள்,வாசு சாரை சந்திக்க.

"நாங்கள் 2 தலைமுறையா கிறித்துவர்கள். கல்யாணத்திற்கு நாங்கள் மறுப்புத் தெரிவிக்க வில்லை.மாப்பிள்ளை கிறித்துவராக இருக்க வேண்டும் என்று ஆசைப் படுகிறோம். விக்னேஷ் கிறித்துவராக மாறித் திருமணம் செய்துகொள்ளட்டும்.." என்றார் ஸ்டெல்லாவின் அம்மா.

"அம்மா, கொஞ்சம் நிதானம்.ஸ்டெல்லாவுக்குக் கீழே யாரும் இல்லை. அவளுக்கு மூத்த அக்கா திருமணம் ஆகி செட்டில் ஆகிவிட்டார்கள். ஆனால் விக்னேஷ் வீட்டில் அவனுக்குக் கீழே 2 பேர் உள்ளார்கள். நடைமுறைக்கு மாறாக ஏதாவது செய்தால் அவர்கள் வாழ்க்கையும் பாதிக்கும். ஸ்டெல்லாவை கேட்போம்.விக்னேஷ் கிறித்துவராக மாற வேண்டுமா, இந்துவாகவே தொடரலாமா, ஸ்டெல்லா இந்துப்பெண் வாழ்க்கையை மேற்கொள்வாளா என்று அவ்ளையே கேட்ப்போம். என்ன சம்மதமா?"

வாசு சாரின் கேள்விக்கு அரை மனதோடு ஸ்டெல்லாவின் தாயார் சம்மதித்தார்

"எனக்கு விக்னேஷ் கிடைத்தால் போதும் சார்!அவர் இந்துவாகவே இருக்கலாம். நான் இந்துப் பழக்க வழக்கத்துக்கு மாறிக் கொள்வேன் சார்.விக்னேஷுக்காக இதைக் கூட செய்ய மாட்டேனா சார் ?!" என்றாள் ஸ்டெல்லா.

தன் பெண்ணே சொன்ன பிறகு," நல்ல பையன்,எந்தவிதக் கெட்ட பழக்கமும் இல்லை என்பதால் சம்மதிக்கிறேன் சார்!" சுருதி இறங்கிப் போய் சொன்னார் ஸ்டெல்லாவின் அம்மா!

பாதிக் கிணறு தாண்டியாயிற்று.

அன்று மாலையே தங்கள் குடும்ப சாஸ்திரிகளைச் சந்தித்தார் வாசு சார். பொறுமையுடன் காது கொடுத்துக்கேட்டார் கிருஷ்ணமூர்த்தி சாஸ்திரிகள்.

"சாஸ்திரத்தில் பலது சொல்லி இருந்தாலும், ஒவ்வொரு சந்தர்பத்திலும் தர்மம் எந்தப் ப‌க்கம் என்று பார்த்து அதன் படி நடந்து கொள்ள வேண்டும். சாஸ்திரங்களையும் விடக்கூடாது. பிரச்சனைக்குத் தீர்வையும் நாம்தான் கண்டு பிடிக்கணும். இந்த விஷயத்தில் அந்தப் பெண்ணை யாராவது ஒரு இந்து தத்து எடுத்துக் கொண்டால், தத்து எடுத்துக் கொண்டவருடைய குலம் கோத்திரம் பெண்ணுக்கு வந்துவிடும்.அப்புறம் சாஸ்திரமுறைப் படி அம்மி மிதித்து அருந்ததி பார்த்து, அக்னி வளர்த்து முறையாக இந்துக் கல்யாண மாகவே செய்து ண்டுவிடலாம்.ஆனால் யார் தத்து எடுக்க முன் வருவார்கள்?" என்று விளக்கினார் சாஸ்திரிகள்.

இந்தச் சிந்தனையோடவே வீடு திரும்பினார் வாசு சார்!

இரவு சரியாகச் சாப்பிடாமல், சரியாகப் பேசாமல் படுத்து சிந்தனையில் ஆழ்ந்து இருந்தவரை , அவருடைய மனைவி சுந்தரி ஆஸ்வாசப்படுத்தினார். மனைவியிடம் எல்லாவற்றியும் சொன்னார்.

"ப்பூ! என்ன நீங்கள்! நல்ல காரியத்திற்கு இவ்வளவு யோசனை? நாம் ஸ்டெல்லாவை தத்து எடுத்துக் கொள்வோம். ஜாம் ஜாம்னு கல்யாணம் செய்வோம்" என்றார் சுந்தரி வாசுதேவன்.

என்ன ஓர் எதிர் பாராத திருப்பம்!

திருமண ஏற்பாடுகள் மளமள என்று நடந்தேறின‌.

"என் ஸ்வீகார புத்திரி சுசீலாவை விக்னேஸ்வரனுக்கு கன்னிகாதானம் செய்துகொடுப்பதாய்...."என்று வாசுதேவன் பெயரில் பெண் வீட்டார் வகையில் பிராமண முறைப்படி பத்திரிகை அடிக்கப்பட்டது.

திருமணத்து அன்று காலை குழந்தையில் இருந்து செய்ய வேண்டிய நாம கரணம், ஜாதகரணம் அன்ன பிராஸ‌னம்,எல்லா சாஸ்திர முறைகளும் கடைப்பிடிக்கப்பட்டு ஸ்டெல்லா சுசீலாவாக மாறி வாசுதேவனுக்குப் பெண் ஆக உருமாற்றம் பெற்று , விக்னேஷின் கரம் பற்றினாள்.இப்போது ஒரு அன்பு மகனுடன் இருவரும் ஆனந்த வாழ்க்கை வாழ்கிறார்கள்.வாசு தேவன் சாருக்கும் அவ்ர் மனைவியாருக்கும் நன்றி கூறிக்கொண்டு.
காதல் வாழ்க! காதலை வாழ வைத்த வாசுதேவன் சார் வாழ்க!

பிகு: இது ஓர் உண்மைக்கதை. பெயர் மாற்றம் செய்யப்பட்டு உள்ளது.

நன்றி, வணக்கத்துடன்
கே.முத்துராம கிருஷ்ணன்,
லால்குடி

நம்புங்கள். இதுவும் நம்ம KMRKதான்!

வாழ்க வளமுடன்!