க‌ன‌வு மெய்ப்ப‌ட‌ வேண்டும்

"க‌ன‌வு மெய்ப்ப‌ட‌ வேண்டும்
கைவ‌ச‌மாவ‌து விரைவில் வேண்டும்"
என்றான் முண்டாசுக் கவிஞன் பாரதி.

எனக்கும் ஒரு கனவு உணடு. அது விரைவில் மெய்ப்பட உள்ளது.

ஐந்து ஆண்டுகளாக குறும் இதழ்களிலும், மூன்று ஆண்டுகளாக வலைப்
பதிவுகளிலும் எழுதிக் கொண்டிடுக்கிறேன்.

குறும் இதழ்களில் இதுவரை 53 சிறுகதைகளையும், இரண்டு கட்டுரைத்
தொடர்களையும் எழுதியுள்ளேன். வலைப்பதிவுகளில் பல்சுவைப் பதிவு,
மற்றும் வகுப்பறைப் பதிவுகளில் இதுவரை சுமார் 700 இடுகைகளை
வலையேற்றியுள்ளேன்.

அவற்றில் சில ஆக்கங்களைப் புத்தகமாக வெளியிடும் எண்ணத்தில் களம்
இறங்கியுள்ளேன்.

முதலில் எனது சிறுகதைகளைத் தொகுத்து இரண்டு புத்தகங்களாகவும்,
குட்டிக்கதைகள் மற்றும் மனவளக் கட்டுரைகளை இரண்டு புத்தகங்களாகவும்
வெளியிடவுள்ளேன். அந்தப் பணி நடந்துகொண்டு உள்ளது

எனது வழக்கமான வியாபார, மற்றும் சொந்த அலுவல்களுக்கிடையே, இந்த
புத்தகப் பணியும் சேர்ந்து கொண்டதால், நேரம் கிடைப்பது அரிதாக இருக்கிறது.
அதனால்தான் பல்சுவைப் பதிவில் சென்ற ஒரு திங்களாக எதுவும் எழுத முடியவில்லை.

வகுப்பறையை மட்டும் நிறுத்தவில்லை. மாணவக் கண்மணிகள் ஏமாற்றம்
அடையக்கூடாது என்பதால் அதை மட்டும் விடாமல் செய்து கொண்டிருக்கிறேன்.

பின்னூட்டங்களுக்குப் பதில் எழுதுவது மற்றும் சற்று தாமதப்படுகிறது. சற்றுப்
பொறுத்துக் கொள்ளுங்கள்.

யாராவது நேரத்தை இலவசமாகவோ அல்லது கடனாகவோ தந்து உதவுங்கள்:-)))))))
----------------------------------------------------------------------------------------------------------------
நான்கில் ஒன்று தயாராகி விட்டது. அதாவது அச்சாகி வந்து விட்டது.
உங்கள் பார்வைக்குக் கீழே கொடுத்துள்ளேன்.

அதை வெளியிடும் நாள். கிடைக்கும் பதிப்பக விவரம் எல்லாம் பிறகு எழுதுகிறேன்




இந்த நூலிற்கு வாழ்த்துரை மற்றும் அணிந்துரையை மூன்று பிரபலங்கள்
கொடுத்துள்ளார்கள். அதைப் புத்தகத்தின் உள்ளே சேர்த்திருக்கிறேன்.


வாழ்த்துரை: டாக்டர் ஜஸ்டிஸ் திரு.AR.லெட்சுமணன் அவர்கள். முன்னாள்
உச்சமன்ற நீதியரசர். இந்நாள் தலைவர், இந்தியச் சட்ட ஆணையம், புது தில்லி.
(Chairan, Law Commission of India, New Delhi)

முன்னுரை: இலக்கிய சிந்தனை' திரு.ப. லெட்சுமணன் அவர்கள். சென்னை.
இவர் புகழ்மிக்க குடும்பத்தில் பிறந்தவர். அண்ணாமலை பல்கலைக் கழகத்தின்
நிறுவனர். ராஜாசர். திரு. முத்தையா செட்டியார் அவர்களின் மகள் வழிப்பேரர்
மத்திய உள்துறை அமைச்சர். திரு.ப. சிதம்பரம் அவர்களின் மூத்த சகோதரர்.

அணிந்துரை: முனைவர், பேராசான்.மூத்த தமிழறிஞர் திரு. தமிழண்ணல் அவர்கள்.
முன்னாள் தமிழ்த்துறைத் தலைவர். மதுரை காமராஜர் பல்கலைக் கழகம், மதுரை



புத்தகத்தின் பெயர்: செட்டிநாட்டு மண்வாசனைக் கதைகள். முதல் தொகுதி
புத்தகத்தின் அளவு: 1/8 Demi Size 160 பக்கங்கள். இருபது சிறுகதைகள் உள்ளன

நன்றி வணக்கத்துடன்
வகுப்பறை வாத்தியார்

இரண்டு தினங்களாக ஊரில் இல்லை. இன்றுகாலைதான் திரும்பினேன்
அடுத்த பாடம் நாளை வலையேறும்.

வாழ்க வளமுடன்!