Astrology ஈன ஸ்திரியின் சிநேகம் எப்போது உண்டாகும்?

-----------------------------------------------------------------------------------
Astrology ஈன ஸ்திரியின் சிநேகம் எப்போது உண்டாகும்?

தசா புத்திப் பாடல்கள் வரிசையில் நேற்று சுக்கிரதிசையில் சந்திர புத்திக்கான பலன்களையும், சந்திர திசையில் சுக்கிர புத்திக்கான பலன்களையும் பார்த்தோம்.

இன்று அதற்கு அடுத்து சுக்கிர திசையில் செவ்வாய் புத்திக்கான பலன்களைப் பார்ப்போம்
---------------------------------------------------------------
ஒன்று சுபக்கிரகம். ஒன்று தீயகிரகம். பலன்கள் நன்மையுடையதாக இருப்பதில்லை. பாடல்களைப் பாருங்கள். பாடல்கள் எளிமையாக உள்ளதால் விளக்கம் தரவில்லை!

தசாபுத்திக்காலம் 14 மாதங்கள்

தானென்ற சுக்கிர திசை செவ்வாய்புத்தி
   தாழ்வானமா தமது பதினாலாகும்
ஏனென்ற அதன்பலனை இயம்பக்கேளு
   எலிகடியும் பீனிசமுமும் இணைப்புமுண்டாம்
வானென்ற வயிற்றினிலே நோவுண்டாகும்
   வகையுடனே ஆசனத்தில் கடுப்புண்டாகும்
தேனென்ற தெரிவையர்கள் விகற்பமாகும்
   தீதான சத்துருவும் சேர்வான்பாரே!

ஆனால் இந்தப் பலன்களுக்குச் சமமானதொரு தீய பலன்களை செவ்வாய் மகா திசையில் சுக்கிர புத்தியும் தருவதாக இருக்கும். பாடலைப் பாருங்கள்

தானென்ற சேய்திசையில் சுக்கிரன்புத்தி
   தாழ்வானமா தமது பதினாலாகும்
வீணென்ற அதன்பலனை வினவக் கேளு
   விரசாவு சத்துருவாகி விலங்குமுண்டாம்
ஏனென்ற யீனஸ்திரி போகமுண்டாம்
   இன்பமில்லா துன்பமது இடஞ்சல்காட்டும்
கோனென்ற இராஜாவால் கலகமுண்டு
   கோதண்டம்தான் வருகும் கொடுமைபாரே!
(தொடரும்)

அன்புடன்
வாத்தியார்
வாழ்க வளமுடன்!

Astrology அடுத்தவன் பையில் இருந்தால் எப்படி அனுபவிக்க முடியும்?

------------------------------------------------------------------------------------
Astrology அடுத்தவன் பையில் இருந்தால் எப்படி அனுபவிக்க முடியும்?

ஜாதகத்தில் எத்தனை நல்ல அம்சங்கள் இருந்தாலும், இருக்கும் இடத்தின் தசாபுத்திக் காலத்தில்தான் அது நம் கைக்கு வந்து சேரும்.

இருந்து என்ன பலன்? கைக்கு வந்தால்தானே அனுபவிக்க முடியும்? வங்கியில் இருந்து என்ன பலன்? கைக்கு வந்தால்தானே செலவழிக்க முடியும்? அடுத்தவன் பையில் இருந்தால் எப்படி அனுபவிக்க முடியும்?

உதாரணத்திற்கு உங்களுக்கு வீடு வாங்கும் யோகம் இருந்தால், 4ஆம் வீட்டுக்காரனின் தசாபுத்திகளில்தான் அது நிறைவேறும். சில சமயம் 4ஆம் வீட்டில் அமர்ந்திருக்கும் சுபக் கிரகத்தின் தசா புத்தியிலும் அது நிறைவேறும்.

ஆகவே உங்களுக்கு நடைபெறும் தசா புத்திகளைக் குறித்து வைத்துக்கொள்ளுங்கள். அதன்படி பலன்களுக்கான நேரத்திற்கும் பொறுமையாகக் காத்திருங்கள்
----------------------------------------------------------------
தசா புத்திப் பாடல்கள் வரிசையில் கடைசியாக 21.4.2011 அன்று சுக்கிரதிசையில் சூரிய புத்திக்கான பலன்களையும், சூரிய திசையில் சுக்கிர புத்திக்கான பலன்களையும் பார்த்தோம்.

இன்று அதற்கு அடுத்து சுக்கிர திசையில் சந்திர திசைக்கான பலன்களைப் பார்ப்போம்
---------------------------------------------------------------
இரண்டுமே சுபக் கிரகங்கள். ஆனாலும் பலன்கள் சரிசமமாக, சுபமாக இருப்பதில்லை. சந்திரனின் கடக வீடு சுக்கிரனுக்குப் பகைவீடு. அதுபோல சுக்கிரனின் இரண்டு வீடுகளில் துலாம் வீடு சந்திரனுக்குப் பகை வீடு. ஆனால் அதே நேரத்தில் சுக்கிரனின் ரிஷப வீடு சந்திரனுக்கு உச்ச வீடாகும். உச்சத்திற்கான பலனை அவர் தன்னுடைய தசா புத்தியில், அதாவது சுக்கிர மகா திசையில் தன்னுடைய தசா புத்தியில் தருவார். பாடல்களைப் பாருங்கள். பாடல்கள் எளிமையாக உள்ளதால் விளக்கம் தரவில்லை!

தசாபுத்திக்காலம் 20 மாதங்கள்

ஆவானே சுக்கிரதிசை சந்திரபுத்தி
   அருளில்லாமா தமது நாலைந்தாகும்
போவானே அதன்பலனை புகழக்கேளு
   பொன்பெறுவாள் அன்னையுமே மரணமாவாள்
சாவானே சம்பத்தும் குறைந்துபோகும்
   சதிரான மனையைவிட்டு ஓடிப்போவான்
நோவானே வியாதியது துடர்ந்துகொள்ளும்
   நுணுக்கமுள்ள வினைசமயம் நுகருந்தானே!

ஆனால் இந்தப் பலன்களுக்கு நேர் மாறாக சந்திர திசையில் சுக்கிர புத்தி மழிச்சி தருவதாக இருக்கும். பாடலைப் பாருங்கள்

கேளப்பா சந்திரதிசை சுக்கிரபுத்தி
   கெணிதமுள்ள நாளதுவுமாதம் நாலைந்து
ஆளப்பா அதன்பலனை சொல்லக்கேளு
   அன்பான லட்சுமியு மனதினமுநிற்பாள்
வாளப்பா வாகனமும் பொன்முத்துசேரும்
   வகையான பூஷணமும் மிகுதியுண்டாம்
கேளப்பாகலியாணங் கெணிதமுடன் நடக்குங்
   கெத்தமுடன் சுகந்தங்கள் அணிவான்பாரே!
(தொடரும்)

அன்புடன்
வாத்தியார்

வாழ்க வளமுடன்!

Astrology: நாட்டிற்கு ஒரு தத்துவஞானி எப்போது கிடைப்பான்?

++++++++++++++++++++++++++++++++++++++++++++++++++++++++++++++
Astrology: நாட்டிற்கு ஒரு தத்துவஞானி எப்போது கிடைப்பான்?

சென்ற இரு அத்தியாயங்களில் இன்றைய இளைஞர்கள் மற்றும் இளைஞிகளின் எதிர்பார்ப்பைக் குறிப்பிட்டு எழுதியிருந்தேன்.

ஆனால் விதி என்று ஒன்று இருக்கிறதல்லவா? நீங்கள் நினைப்பதெல்லாம் நடக்காது. விதியின் மேல் நம்பிக்கை இல்லாதவர்கள் எல்லாம் இதற்கு முன் விதியைப் பற்றி எழுதிய பாடங்களைப் படிக்கும்படி கேட்டுக்கொள்ளப் படுகிறார்கள்.

எல்லாம் விதிப்படிதான் நடக்கும். வாங்கி வந்த வரத்தின்படிதான் நடக்கும்.

ஏழாம் வீட்டில் 30ம் அல்லது அதற்கு மேற்பட்ட பரல்கள் இருந்தால், நல்ல மனைவி அமைவாள். பெண்ணாக இருந்தால் நல்ல கணவன் அமைவான்.

ஏழாம் வீட்டு அதிபதியும், சுக்கிரனும் தங்கள் சுய வர்க்கத்தில் 5 அல்லது அதற்கு மேற்பட்ட பரல்களுடன் இருந்தாலும் நல்ல மனைவி அமைவாள் பெண்ணாக இருந்தால் நல்ல கணவன் அமைவான்.

ஏழாம் வீட்டுக்காரன் லக்கினத்திற்குப் பன்னிரெண்டாம் வீட்டில் அல்லது ஏழாம் வீட்டிற்குப் பன்னிரெண்டாம் வீட்டில், அதாவது ஆறாம் வீட்டில் போய் டென்ட் அடித்துக் கொண்டு ஹாயாக இருந்தால் மேற்கூறியவற்றிற்கு மாறாகத்தான் அமையும்

ஆகவே கனவு காணுவதை நிறுத்துங்கள். வருவதை ஏற்றுக் கொள்ளுங்கள்.

அதுபோல திருமணமும், அதனதன் தசாபுத்திக் காலங்களில் அல்லது அந்தரங்களில்தான் நடக்கும்.
---------------------------------------------------------------------------------------------------------
ஜோதிடத்தில் பலவிதமான யோகங்களைப் பற்றிக் குறிப்பிடப்பெற்றுள்ளது. அவற்றுள் ஒன்று திருமண யோகம்.

ஒரு ஜாதகன் அல்லது ஜாதகிக்குத் திருமண யோகம் இருக்க வேண்டும். அது இருந்தால்தான் திருமணமாகும். இல்லையென்றால் சிக்கல்தான். சிலருக்கு வயது 40 ஆகியும் இன்னும் திருமணம் நடைபெறாமலே இருக்கும். அதற்கு என்ன காரணம்? அவர்கள் வரன் தேடாமலா இருந்திருப்பார்கள்? அல்லது முயற்சி செய்யாமலா இருந்திருப்பார்கள்?

பொதுவாக எந்த யோகமாக இருந்தாலும், அதை அனுபவிப்பதற்கு முதலில் ஜாதகத்தில் லக்கினாதிபதி வலுவாக (strong) இருக்க வேண்டும்.

’திருமண யோகத்திற்கு, லக்கினாதிபதி, இரண்டாம் வீட்டிற்கு உரியவன், ஏழாம் வீட்டிற்கு உரியவன் ஆகிய மூவரும் வலுவாக இருக்க வேண்டும்.

‘வலு’ என்பதைப் பற்றிப் பலமுறை எழுதியுள்ளேன். ஜோதிடத்தின் அடிப்படை அறிவு அது.

கிரகங்கள், உச்சம், சொந்த வீடு, நட்பு வீடு, கேந்திரம் மற்றும் திரிகோண வீடுகளில் இருப்பது, சுயவர்க்கத்தில் அதிகமான பரல்களுடன் இருப்பது அதன் வலிமையைக் குறிக்கும்.
----------------------------------------------------------------------------------------------------
அவை எல்லாம் பொது விதிகள்.

ஆகவே கவலைப் படாதீர்கள். ஜாதகத்தை எல்லாம் மூட்டை கட்டி வைத்துவிட்டு ஒரு நல்ல (!?) பெண்னைத் திருமணம் செய்துகொள்ளுங்கள். உரிய காலத்தில் செய்து கொள்ளுங்கள். நீங்கள் விரும்புகிற மாதிரிப் பெண் கிடைக்காவிட்டால், கிடைக்கிற பெண்ணைத் திருமணம் செய்துகொள்ளுங்கள்

எப்படியும் திருமணம் செய்து கொள்ளுங்கள்.

இரண்டுதான் முடிவு.

ஒன்று உங்களுக்கு ஒரு நல்ல குடும்ப வாழ்க்கை அமையும் அல்லது நாட்டிற்கு ஒரு தத்துவஞானி கிடைப்பான்

அன்புடன்
வாத்தியார்

வாழ்க வளமுடன்!

Astrology ரேஸ் குதிரையும், ஜட்கா வண்டிக் குதிரையும்!

++++++++++++++++++++++++++++++++++++++++++++++++++
Astrology ரேஸ் குதிரையும், ஜட்கா வண்டிக் குதிரையும்!

இன்று எல்லாத்துறைகளிலும் பெண்கள் சிறப்பாக வேலை செய்கிறார்கள். வரவேற்க வேண்டிய விஷயம். பல இடங்களில் ஆண்களுக்கு இணையாக - ஏன் ஆண்களைவிட அதிகமான எண்ணிக்கையில் இளம் பெண்கள் வேலை செய்கிறார்கள்.

இளங்கலை, முதுகலை, தொழிற்கல்வி என்று அனைத்துக் கல்வி விரிவாக்கங்களிலும், பெண்களின் ஆதிக்கம் உள்ளது.

கல்லூரிகளில் கற்க வாய்ப்பு இல்லாத பெண்கள் கூட, ப்ளஸ் டூ வரை அடித்துப் பிடித்துத் தேர்வு பெற்று, பலவிதமான வேலைகளில் பணி செய்கின்றார்கள்..

எங்கள் பகுதியில் (கோவை & திருப்பூர்) பனியன் உற்பத்தி, துணி உற்பத்தி, சாயப் பட்டறைகள், நூல் உற்பத்தி செய்யும் தொழிற்சாலையில் பெண்களே அதிக அளவில் பணி புரிகிறார்கள்.

இந்த மாற்றம் கடந்த இருபது ஆண்டுகளுக்குள் ஏற்பட்டுள்ளது.

ஏற்பட்டுள்ள அந்த மாற்றம் பல பக்க விளைவுகளையும் (side effects) ஏற்படுத்தியுள்ளது. பக்க விளைவுகள் என்னென்ன என்பதை இன்னொரு நாள் பார்க்கலாம். இப்போது சொல்ல வந்த விஷயத்தை மட்டும் பார்ப்போம்.
-----------------------------------------------------------------------------------------------------
திருமணத்தைப் பொறுத்தவரை பெண்களுக்கு என்று சில கண்டிஷன்கள் உள்ளன!

அந்தக் காலத்தைப் போல, பெற்றோர்கள் சொல்லுகின்ற மாப்பிள்ளைக்கு, எந்தப் பெண்ணும் இப்போது சட்டென்று கழுத்தை நீட்ட மாட்டாள்.

வருகின்ற வரனை உறித்து, ஊருகாய் போடுகிற அளவிற்கு அறிந்து பார்த்துவிட்டுத்தான் திருமணத்திற்கு சம்மதிப்பாள்

பையனின் சம்பாத்தியம்தான் முதன்மையானது. பன்னாட்டு நிறுவனம் அல்லது இந்திய நிறுவனங்களில் பெரிய நிறுவனம் போன்றவற்றில் பணிபுரியும் வரன் வேண்டும்.

வியாபாரம் செய்யும் பையன் என்றால் ‘நோ’ என்று சொல்லிவிடுவார்கள். வியாபாரம் செய்யும் பையனுக்கு முதலீடும் இருக்குமாம், கடனும் இருக்குமாம். அவனுடைய மதிப்பைத் தெரிந்து கொள்ள முடியாதாம். (He may have assets and also liabilities. No one can assess his net worth) ஆகவே வேண்டாம் என்று சொல்லி விடுவார்கள்.

கறுப்பு, சிவப்பு என்ற நிற பேதம் எல்லாம் அவர்கள் பார்ப்பதில்லை. ஆசாமி ஸ்டைலாக வாட்டசாட்டமாக இருக்கவேண்டும். உங்கள் மொழியில் சொன்னால், திரைப்பட நடிகர் சூர்யா அல்லது அஜீத் அல்லது கார்த்திக்  அல்லது விஷால் போன்ற தோற்றத்துடன் இருக்க வேண்டும். அது முக்கியம்.

ஓமக்குச்சி நரசிம்மன் அல்லது பயில்வான் ரங்கநாதன் போன்ற தோற்றத்தில் இருந்தால் ‘நோ’ என்று சொல்லிவிடுவார்கள்.

அவை இரண்டையும் விட முக்கியமாக அவன் தனிக் காட்டு ராஜாவாக இருக்க வேண்டும். கிழம் கட்டைகள் உடன் இருக்கக்கூடாது. அதாவது பெற்றோர்கள், தாத்தா, பாட்டிகள் உடன் இருக்கக்கூடாது.

உடன் என்ற வார்த்தையை நன்கு கவனிக்கவும். அவர்கள் இருக்கலாம், ஆனாலும் தள்ளி இருக்க வேண்டும்.

அவன் பெங்களூரில் வேலை பார்த்தால், மேற்படி கூட்டம், வேறு பிரதேங்களில் இருக்க வேண்டும். அதாவது கம்பம், தேனி போன்ற இடங்களில் இருக்கலாம். அவன் சென்னையில் வேலை பார்த்தால், அவர்கள், வள்ளியூர், நாங்குநேரி அல்லது ஸ்ரீவைகுண்டம் போன்ற இடங்களில் இருக்கலாம்.

அவனைத் தேடிப் பார்க்க வந்தாலும் மூன்று நாட்களில் கிளம்பிவிட வேண்டும். விருந்தும் மருந்து மூன்று நாட்கள்தான் என்பதை நினைவில் கொள்ளவும்.

ஒருவர் தன் நண்பரின் மகளுக்காக ஒரு நல்ல வரனைப் பரிந்துரை செய்தார். உடனே பெண்ணைப் பெற்ற புண்னியவான் கேட்டார்.

  “பையன் எங்கே இருக்கிறான்?”

  “பெங்களூரில்....”

  “அவனுடைய பெற்றோர்கள்....?”

  “அவர்களும் அவனுடன்தான் இருக்கிறார்கள். அவனுடைய தந்தை வங்கி அதிகாரியாக இருந்தார். ஒரே மகன். அவனுக்கு நல்ல வேலை கிடைத்தவுடன், தன்னுடைய வேலையில் விருப்ப ஓய்வு பெற்றதுடன், பெங்களூர் சிவாஜி நகரில் ப்ளாட் ஒன்றை வாங்கிக் கொண்டு, அங்கே போய் செட்டிலாகி விட்டார்கள்.”

  “ஓகோ கூட்டுக் குடும்பமா?”

  “மூன்று பேர் இருப்பது எப்படியடா கூட்டுக் குடும்பம் ஆகும்? பையன் தனியாக இருந்தால் தனிக்கட்டை. பெற்றோர்களுடன் இருந்தால் குடும்பம். அப்பா, அம்மா, தாத்தா, பாட்டி, சித்தப்பன்  அல்லது அத்தை என்று ஏழு அல்லது எட்டு டிக்கெட்டுகளுடன் இருந்தால்தான் கூட்டுக் குடும்பம்.”

  “இல்லை. எனக்குச் சரிப்படாது. பையன் தனியாக இருக்கிற இடமாக வேண்டும்”

  “ஏன் அப்படிச் சொல்கிறாய்?”

  “என் பெண்ணைப் பற்றி உனக்குத் தெரியாது. பெற்றோர்கள் உடன் இருந்தால் பத்து நாள் கூடத் தாங்காது. சண்டை வந்துவிடும். பெட்டியைத் தூக்கிக் கொண்டு வந்து விடுவாள். ஒரே பெண் என்று செல்லமாக வளர்த்து விட்டேன். யாருக்கும் கட்டுப்பட மாட்டாள். உனக்குப் புரியும்படியாகச் சொன்னால், அவள் ரேஸ் குதிரை. ஜட்கா வண்டியெல்லாம் அவளுக்குச் சரிப்பட்டுவராது! ஜாக்கி மட்டும் இருந்தால் போதும். வண்டி வேண்டாம்”

(அலசல் தொடரும்)

அன்புடன்
வாத்தியார்


வாழ்க வளமுடன்!

Astrology பெண்ணின் நிறத்தில் என்ன(டா) இருக்கிறது?

------------------------------------------------------------------------------------
Astrology பெண்ணின் நிறத்தில் என்ன(டா) இருக்கிறது?

இதற்கு முன் பகுதியைப் படித்திராதவர்கள், அதைப் படித்துவிட்டு வரும்படி கேட்டுக் கொள்ளப்படுகிறார்கள்.
அதற்கான சுட்டி இது!
-------------------------------------------------------------------
வேலை கிடைப்பதைப் பற்றி சென்ற பதிவில் அலசியிருந்தோம்.

வேலை கிடைத்துவிட்டது. அடுத்து என்ன?

அடுத்து டும் டும்........ டும்தான். அதாவது திருமணம்!

வேலை கிடைத்தவுடன் திருமணம் நடந்தால் நல்லது. இளைஞன் அல்லது இளைஞி யாராக இருந்தாலும் முன்பு 21 வயதில் திருமணம் செய்து வைத்தார்கள்.

இப்போது, பொருளாதாரத் தேடலில், வாழ்க்கை வசதித் தேடலில் இரு பாலருமே திருமணத்தைத் தள்ளிப் போடுகிறார்கள்.

30 அல்லது 32 வயதாகியும் திருமணமாகாதவர்கள் இன்று பலர் இருக்கிறார்கள். 25 வயதிற்குள் திருமணம் செய்து கொள்ள வேண்டாமா?

கேட்டால், “இன்னும் வாழ்க்கையில் செட்டில் ஆகவில்லை, செட்டில் ஆன பிறகு திருமணம் செய்து கொள்ளலாம் என்று இருக்கிறேன்” என்பார்கள்.

ஒரு பெண்ணுடன் குடும்பம் நடத்துவதற்கு 10’ X 10' படுக்கை அறையுடன் கூடிய சின்ன வாடகை வீடு போதாதா? இதைவிடச் சின்ன வீடுகளில்  - ஏன் ஒற்றை அறை வீடுகளில் எத்தனை பேர் மும்பை போன்ற பெரு நகரங்களில் குடும்பம் நடத்திக் கொண்டிருக்கிறார்கள் தெரியுமா?

தி.நகரில் வாடகை கொடுத்து மாளாது என்றால், அம்பத்தூரில் ஒரு வீட்டைப் பிடி. அல்லது போரூரில் ஒரு வீட்டைப் பிடி. ஒரு மணி நேரம் முன்பாகப் புறப்பட்டு, வேலை பார்க்கும் இடத்திற்கு வந்து சேர்.

சிக்கனமாக இரு. இரண்டு முளம் மல்லிகைப்பூ இருபது ரூபாய் என்றால், அதை எதற்கு வாங்குகிறாய்? ஒரு ஒற்றை ரோஜா வாங்கிகொண்டுபோய், அதை நீயே உன் மனைவி தலையில் சொருகிவிட்டு, “தேவயானி போல இருக்கிறாயடி, என்று சொல்!” கிறங்கிப் போவாள்.

நீ செட்டில் ஆகிற வரைக்கும் உன்னுடைய இளமை காத்திருக்குமா?

செட்டில் ஆகிறது என்பது மாயமானைத் தேடுவதற்கு ஒப்பாகும். அதற்கு அளவில்லை. கடலில் அலை ஓய்ந்து என்றைக்குக் குளிப்பது? அலை பாட்டிற்கு அடித்துக் கொண்டுதான் இருக்கும். நடுவில் போய் ஒரு காக்காய்க் குளியல் போட்டுவிட்டு வருவதில்லையா? அதுபோல செட்டில் ஆகிற பாடலை ஒதுக்கி வைத்துவிட்டுத் திருமணம் செய்துகொள்வதுதான் புத்திசாலித்தனம்.

“எனக்குத் தகுதியான பெண்ணைத் தேடிக்கொண்டிருக்கிறேன். இன்னும் கிடைக்கவில்லை” என்று சிலர் சொல்வார்கள்.

தகுதி என்று எதைச் சொல்கிறாய்?

ஜோடிப் பொருத்தத்தைச் சொல்கிறாயா?

"Made for each other" என்று மற்றவர்கள் சொல்லும்படியாக மனைவி இருக்க வேண்டும் என்று எதிர்பார்க்கிறாயா?

அதெல்லாம் சினிமாவில்தான் நடக்கும். ரியல் லைஃபில் நடக்காது.

சிலர் சிவப்பான பெண்ணைத் தேடிக்கொண்டிருப்பார்கள். சிலர் சிவப்பான முகக்களையான பெண்ணைத் தேடிக்கொண்டிருப்பார்கள்.

நிறத்தில் என்ன இருக்கிறது?

என் நெருங்கிய உறவினர் ஒருவர் இருந்தார். இப்போது அவர் இல்லை. அதிரடியாகப்பேசுவார். சாமர்த்தியமானவர். இருபது வருடங்களுக்கு முன்பு, அவர் தன் நண்பனின் மகனுக்கு, ஒரு பெண்ணைப் பரிந்துரை செய்தார். செய்துவிட்டு, பத்து நாட்கள் கழித்து, ஒரு திருமண வீட்டில் தன் நண்பனைச் சந்தித்த போது, கேட்டார்

“டேய் நான் சொன்ன வரன் என்னடா ஆயிற்று, பேசினாயா?”

அவர் வருத்தமுடன் சொன்னார்: “பேசினேனப்பா. அவர்கள் சம்மதிக்கிறார்கள். ஆனால் என் பையன் ஒத்துக்கொள்ளவில்லை”

இவர் விடவில்லை. “ஏன்?” என்று கேட்டார்

“பையன், பெண் கறுப்பாக இருக்கிறாளே. வேண்டாம் என்று கூறிவிட்டான்”

“அடப்பாவி, அவனைக் கூப்பிடு நான் விசாரிக்கிறேன்”

அடுத்த ஐந்து நிமிடத்தில் பையன் வந்து சேர்ந்தான். திருமண வீடல்லவா? சுற்றிலும் கூட்டம். ஆனால் நம்ம தலைவர் அதற்கெல்லாம் யோசிக்கவில்லை. அவனைத் துளைக்க ஆரம்பித்தார்.

“டேய் அந்தப் பெண்ணை நேரில் பார்த்தாயா?

“பார்த்தேன்”

“களையாக இருக்கிறாளா - இல்லையா?”

“களையாகத்தான் இருக்கிறாள்”

“பின் ஏன்டா வேண்டாம் என்று சொன்னாய்?”

“கறுப்பாக இருந்தாள். அதனால் வேண்டாம் என்று சொன்னேன்”

“மயி.......டி, நீ என்னடா ரெம்ப சிவப்பா? நீயும் கறுப்புத்தானே?”

“நான் விருப்பப்படுவதில் என்ன தவறு இருக்கிறது? கல்வி, அந்தஸ்து என்று எல்லாவற்றையும் விட்டுக் கொடுக்கத் தயாராக இருக்கும்போது, சிவப்பான பெண் கிடைக்காமலா போய்விடுவாள்?”

தலைவருக்குக் கோபம் வந்து முத்தாய்ப்பாய்ப் பேசினார்:

“ சிவப்புன்னு தேடிப் பிடித்துக் கட்டிக்கிட்டவன் எல்லாம் செருப்படி பட்டுக்கிட்டு இருக்கான்டா. பெண்ணுக்கு குணம்தான்டா முக்கியம். நிறத்தில என்னடா இருக்கு? விளக்கை அணைச்சா எல்லாப் பொண்ணும் ஒன்னு தாண்டா! கட்டி அனைச்சா கிடைக்கிற சுகமும் ஒன்னுதான்டா!”

(அலசல் தொடரும்)

அன்புடன்
வாத்தியார்




வாழ்க வளமுடன்!

Astrology இளைஞனுக்கு என்ன(டா) தேவை?

-----------------------------------------------------------------------------------------
Astrology இளைஞனுக்கு என்ன(டா) தேவை?

இதற்கு முன் பகுதியைப் படித்திராதவர்கள், அதைப் படித்துவிட்டு வரும்படி கேட்டுக் கொள்ளப்படுகிறார்கள்
-------------------------------------------------------------------
ஒரு இளைஞனுக்கு - நன்றாகக் கவனிக்கவும் - ஒரு இளைஞனுக்கு என்ன தேவை?

1. தோற்றம் Appearance
2. குணம் Character - எதையும் யதார்த்தமாக எடுத்துக்கொள்ளும் குணம் மற்றும் முக்கியமாக எவரையும் அனுசரித்துப்போகும் குணம்.
3. அறிவு Skill (உங்கள் மொழியில் சொன்னால் புத்திசாலித்தனம்)
4. கல்வி Education (இன்றைய நிலைக்குக் குறைந்தது ஒரு இளங்கலை பட்டப் படிப்பு. அல்லது குறைந்த பட்சம் ப்ளஸ் 2 தேர்ச்சி பெற்ற நிலை)
5. திறமை Talent
6. அதிர்ஷ்டம் Luck

மேற்கூறிய ஆறும் தேவை.

இந்த ஆறும் அனைவரிடமும் இருக்குமா?

இருக்காது.

இந்திய ஜனத்தொகையான 121 கோடியில் 25% சதவிகிதம் இளைஞர்கள் (இளைஞிகள்) என்று ஒரு புள்ளி விவரம் சொல்கிறது.

அவர்களில் ஒரு பத்து சதவிகிதம் பேருக்குத்தான் மேற்கூறியவற்றில்
ஒரு நான்காவது இருக்கும். அந்த ஆறும் இருந்தால் அவன் infossys
நாராயண மூர்த்தியாக அல்லது Reliance முகேஷ் அம்பானி போல
இருப்பான். என்னுடைய ப்ளாக்கிற்கு வந்து பதிவுகளை எல்லாம்
படிக்கும் வாய்ப்பு அவனுக்குக் கிடைக்காது!:-))))

கல்விக்கு 4ஆம் வீடு, அறிவிற்கு ஐந்தாம் வீடு.

கல்வி வேறு ; அறிவு வேறு.

கடந்த அறுபதாண்டு தமிழக ஆட்சியாளர்களை எடுத்துக்கொண்டால், 1. ராஜாஜி, 2. காமராஜர், 3. பக்தவட்சலம், 4. அறிஞர் அண்ணாதுரை, 5. கலைஞர் கருணாநிதி. 6. புரட்சித் தலைவர். எம்.ஜி.ராமச்சந்திரன், 7. செல்வி ஜெயலலிதா ஆகியோரில் நான்கு பேர்கள் பள்ளி இறுதி வகுப்பைத் தாண்டாதவர்கள்.

பள்ளி இறுதிவகுப்பைத் தாண்டாதவர்கள் எப்படி அத்தனை ஐ.ஏ.எஸ், ஐ.எஃப்.எஸ், ஐ.பி.எஸ் படித்தவர்களைக் கட்டி மேய்த்து ஆட்சி நடத்தினார்கள் அல்லது நடத்துகிறார்கள்? தங்கள் புத்திசாலித்தனத்தால்தான் அதாவது அறிவால்தான் அவர்களுக்கு அது சாத்தியப்பட்டது. அல்லது படுகிறது. ஆகவே கல்வி வேறு அறிவு வேறு அதை மனதில் வையுங்கள்
------------------------------------------------------------------------------
யார் சென்றாலும் பிழைத்துக் கொள்ளலாம் என்று சுட்டிக் காட்டக்கூடிய ஊர்கள் எவை?

1. திருப்பூர்
2. சிவகாசி
3. நாமக்கல்

Knitted Garments, Designer Garments, Woven Fabrics, Crackers, Match Boxes, Multi  colour Printing, Poultry Industry, Lorry operators, Lorry body building industry  என்று விதம் விதமாக சொந்தத் தொழில் செய்வோர்கள் - தொழில் செய்து, பலருக்கும் வேலை கொடுப்போர்கள் நிறைந்த ஊர் தமிழகத்தில், அந்த மூன்று ஊர்கள்தான்.

அங்கே தொழில் செய்வோர்கள் அல்லது அந்தத் தொழில்களில்
வேலையில் இருப்பவர்களில் 80 சதவிகிதம் பேர்கள் பள்ளி இறுதி
வகுப்பு வரை மட்டுமே படித்தவர்களாக இருப்பார்கள். பலருக்கு
அது கூட இருக்காது. பல  படித்தவர்கள் அவர்களுக்காக வேலை செய்துகொண்டிருக்கிறார்கள் Export document writers, 
auditors, Bank officers  என்று உதாரணங்களைச் சொல்லலாம்

30 வயதில் ஒரு பொறியாளர் (Engineer) சம்பாதிப்பதை விட, அதிகமாகச் சம்பாதிக்கும் Car & Two wheeler  Mechanics குகளை என்னால் காட்ட முடியும். இவர்களுக்கு இருக்கும் தொழில் சுதந்திரம் அவர்களுக்கு இருக்காது. Car & Two wheeler  Mechanics களில் பலர் பள்ளிப் படிப்பைப் பாதியில் விட்டவர்கள் அதை மனதில் வையுங்கள்.

முறைப்படி தமிழ் படித்து, B.A, M.A, M.Phil, P.Hd என்று பட்டங்களைப் பெற்ற தமிழறிஞர்கள் நூற்றுக் கணக்கில் இருக்கிறார்கள். அவர்களில் பலருக்கு, நறுக்’ கென்று 4 வெண்பாக்களை எழுதச் சொன்னால் எழுத வராது. சூழ்நிலையைச் சொல்லி, அழுத்தமாக ஒரு கதை எழுதிக் கொடுங்கள் என்று சொன்னால் எழுத வராது.

பாரதியார், பட்டுக்கோட்டையார், கண்ணதாசன், வாலி போன்ற பிரபல கவிஞர்கள் எல்லாம் முறைப்படி தமிழ் படித்துப் பட்டம் வாங்காதாவர்கள். அதை மனதில் வையுங்கள். அவர்கள் எழுதிய பாடல்களை வைத்துத்தான் இவர்கள் நோண்டி நொங்கெடுத்துக் கொண்டிருக்கிறார்கள்.

படிப்பைக் குறை சொல்வதற்காக இதை நான் எழுதவில்லை.

கல்வி அவசியம். அதி முக்கியம்

அதிலும் அடிப்படைக் கல்வி அவசியம் தேவை. ஒரு வங்கிச் சலானை நிறப்புவதற்காவது தெரிய வேண்டாமா? ரயில் நிலையத்தில் பயணச் சீட்டு முன்பதிவுப் படிவத்தை நிறப்புவதற்காவது தெரிய வேண்டாமா? மான் விழியாள், தோகை மயிலாள் எழுதிய காதல் கடிதத்தை சுயமாகப் படிப்பதற்காவது தெரிய வேண்டாமா? ஆகவே கல்வி அவசியம்.

 “எண்என்ப ஏனை எழுத்தென்ப இவ்விரண்டும்
    கண்என்ப வாழும் உயிர்க்கு”

என்று கல்வியின் அவசியத்தை அழுத்தமாகச் சொன்னான் பொய்யாமொழிப் புலவன்.

"Letters and numbers are the two eyes of man" என்று அதற்கு நறுக்கென்று விளக்கம் எழுதினார் ஜி.யு. போப் என்னும் கிறிஸ்துவப் பாதிரியார்

ஆகவே கல்வி அவசியம்.

உயர் கல்வி அப்படியல்ல. எல்லோருமே பொறியாளர் ஆகவேண்டுமென்றால் முடியுமா? அல்லது எல்லோருமே மருத்துவர் அல்லது கணக்காய்வாளாரக வேண்டுமென்றால் முடியுமா?

முடியாது.

காலன் அதை அனுமதிக்க மாட்டான். உங்கள் மொழியில் சொன்னால் இயற்கை அதை அனுமதிக்காது.  Balancing Theory என்னும் சீரமைப்புக் கணக்கில் அது வரும். ஆடு, மாடு, மான் போன்றவற்றிற்குக் கொம்பைக் கொடுத்த இறைவன், குதிரைக்கு மட்டும் கொம்பைக் கொடுக்கவில்லை அல்லவா? அது எந்தக் கணக்கில் வருகிறதோ அந்தக் கணக்குத்தான் அந்த Balancing Theory. இப்போது அது புரியாது அல்லது புலப்படாது. ஆடி அடங்கும்போது புலப்படும்.

அனைவருமே ஒயிட் காலர் வேலைக்கும், குளிரூட்டப்பெற்ற அலுவலகத்திற்கும் ஆசைப் பட்டால் எப்படி?

பிறகு விவசாயம் செய்வது யார்? சென்னை டு கன்னியாகுமரி பஸ்ஸை இயக்குவது - அதாவது ஓட்டுவது யார்? விளக்குக் கம்பத்தில் ஏறி உங்கள் வீட்டு மின் இணைப்பைச் சரி செய்வது யார்? பாணி பூரி, பேல் பூரி வண்டிகளை வைத்து மாலை நேரங்களில் உங்கள் பசியைத் தீர்ப்பது யார்? டாஸ்மாக் கவுண்டர்களில் உங்களோடு மல்லுக் கட்டுவது யார்? எல்லாவற்றிற்கும் ஆட்கள் வேண்டாமா?

ஆகவே வேலை வாய்ப்புக்கள் அல்லது தொழில் வாய்ப்புக்களில் சீரான அமைப்புக் கிடையாது. ஜாதகத்திற்கு ஜாதகம் அது வேற்படும். உங்கள் ஜாதகத்தில் என்ன programme செய்யப்பட்டுள்ளதோ அந்த வேலையை மட்டும்தான் நீங்கள் செய்ய முடியும். விரும்பியதை எல்லாம் செய்ய முடியாது. செய்ய முயன்றால் வெற்றி கிடைக்காது. தோல்வியில்தான் முடியும்.

நீங்கள் மாட்டை வைத்துத்தான் பிழைப்பு நடத்த வேண்டுமென்றால் மாட்டைவைத்துத்தான் பிழைப்பு நடத்த வேண்டும். ஆனால் மாட்டின் எண்ணிக்கையைக் காலன் நிர்ணயிப்பது இல்லை. அது 4 மாடுகளா அல்லது 400 மாடுகளா என்பது உங்கள் கையில் இருக்கிறது. உங்கள் முயற்சி அங்கேதான் திருவினை செய்யும்.

இல்லை வெறும் எட்டாம் வகுப்பு வரை மட்டுமே படித்த கவியரசர் கண்ணதாசன், 5,000ற்கும் மேற்பட்ட திரைப் படப் பாடல்களையும், ஆயிரத்திற்கும் மேற்பட்ட தனிப்பட்ட பாடல்களையும், ஏராளமான மனவளக் கட்டுரைகளையும், நூல்களையும் எப்படி எழுதியிருப்பார்? அதை வெறும் அதிர்ஷ்டக் கணக்கில் எடுத்துக் கொள்ள முடியுமா?, விதி என்று கூறிவிட முடியுமா? கவிஞனானது மட்டும்தான் தலை எழுத்து. மற்ற அனைத்து மேன்மைகளும் அவருடைய முயற்சிகள்.

ஆகவே உங்களுக்கு விதிக்கப்பெற்ற தொழிலில் மேன்மையடைவது உங்கள் கையில் உள்ளது.

எந்த வேலை கிடைத்தாலும் செய்யுங்கள்.

செய்யும் தொழிலே தெய்வம் என்று நினையுங்கள்
----------------------------------------------------------------------------
படித்து முடித்தவுடன் வேலை கிடைக்க வேண்டும். அதுதான் முதல் வாய்ப்பு.

சிலபேர் சொல்லலாம் நல்ல வேலை என்பதுதான் முதல் வாய்ப்பு. வேலையில் நல்ல வேலை சுமாரான வேலை என்று எல்லாம் கிடையாது.

வேலை இன்றி வீட்டிற்குச் சுமையாக இருக்கக்கூடாது அவ்வளவுதான்.

முன்பு போல இப்போது இல்லை. பத்து ஆண்டுகளுக்குள் எல்லாம் தலை கீழாக மாறிவிட்டது. பல நிறுவனங்கள், கல்லூரி வளாகங்களுக்கே வந்து, நேர் காணல் செய்து பலருக்கும் இறுதியாண்டு படிப்பின்போதே வேலைக்கான நியமன உத்தரவைக் கொடுத்துவிடுகின்றன. கலைக் கல்லூரிகளில் படித்தவர்களுக்கும், பல நிறுவனங்கள் வேலை கொடுத்துக் கொண்டிருக்கின்றன.

எல்லோருமே படித்து ஒயிட் காலர் வேலைகளுக்குப் போகும் எண்ணத்துடன் இருப்பதால், அடி மட்ட வேலைகளுக்கு இப்போது ஆட்கள் பற்றாக்குறை.

சென்னை, கோவை போன்ற பெரு நகரங்களில், கட்டடப் பணி செய்து கொண்டிருக்கும் நிறுவனங்கள், மேஸ்திரி, கொத்தனார், சித்தாள் வேலைகளுக்கு பீஹாரில் இருந்து ஏராளமானவர்களைக் கூட்டிக் கொண்டு வந்து பணிகளைச் செய்து கொண்டிருக்கிறார்கள்.

கோவை அன்னபூர்ணா தொடர் உணவகத்தில் அடிமட்ட வேலைகளுக்கு நேபாளத்தில் இருந்து இளைஞர்களைப் பிடித்துக் கொண்டு வந்திருக்கிறார்கள்.

படித்தவர்களுக்கு வேலை என்பது ஒரு பிரச்சினைக்குரிய விஷயம் என்பது இப்போது இல்லை.

கிடைத்த வேலை பிடித்துள்ளதா? அவர்கள் தருகின்ற சம்பளம் போதுமானதா? என்பதெல்லாம் வேறு பிரச்சினை. அதைப் பிறகு அலசுவோம். அதற்கெல்லாம் ஜாதகத்தில் வேறு கட்டங்கள்
++++++++++++++++++++++++++++++++++++++++++++++++++++++++++
ஒரு முக்கியமான குறிப்பைத் தருகிறேன். ஜாதகத்தில் பத்தாம் வீட்டில் 30 அல்லது அதற்கு மேற்பட்ட பரல்கள் இருந்தால், மனதிற்குப் பிடித்த வேலை கிடைக்கும். அதில் மேன்மையும் உண்டாகும்.

25 அல்லது அதற்குக் கீழான பரல்கள் இருந்தால், உங்கள் தகுதிக்குத் தகுந்த அல்லது உங்களுக்குப் பிடித்த வேலை கிடைக்காது. கிடைக்கின்ற வேலையைப் பிடித்துக்கொள்ள வேண்டும்

அதாவது நாம் விரும்புகின்ற பெண் கிடைக்கவில்லை என்றால், நம்மை விரும்புகின்ற பெண்னைக் காதலிக்க வேண்டியதுதான்!:-)))

என்ன புரிந்ததா? விளக்கம் போதுமா?
---------------------------------------------------------------------------------------------------------------
(அலசல் தொடரும்)

அன்புடன்
வாத்தியார்





வாழ்க வளமுடன்!

Astrology வாய்ப்பு எப்போதடா வரும்?

----------------------------------------------------------------------------------
Astrology வாய்ப்பு எப்போதடா வரும்?

எல்லோருடைய மனதிலும் உள்ள கேள்வி இதுதான்: “வாய்ப்பு எப்போது(டா) வரும்?”

முதலில் வாய்ப்பு என்றால் என்னவென்று பார்ப்போம்.

‘வாய்ப்பு’ என்பது ஒன்றைச் செய்வதற்கு அல்லது பெறுவதற்கு உரிய அனுகூல நிலை. சுருக்கமாகச் சொன்னால் சந்தர்ப்பம்  அல்லது opportunity, opening. சாத்தியம் possibility, Chance, scope என்று நீங்கள் எப்படி வேண்டுமென்றாலும் வைத்துக் கொள்ளுங்கள்.

ஆட்சி மாற்றம் ஐந்து ஆண்டுகளுக்குப் பிறகு நடந்துள்ளது. அரியணை அம்மையாருக்குக் கிடைத்துள்ளது. ஐந்து ஆண்டுகள் பொறுமையாகக் காத்திருந்தார். கிடைத்தது. அதுவாகக் கிடைத்ததா? இல்லை. மக்கள் கொடுத்தார்கள். மக்களும் நினைத்தபோது கொடுத்தார்களா? இல்லை. கொடுக்கக்கூடிய சூழ்நிலையை, முந்தைய ஆட்சியாளர்களும் சமீபத்தில் நடந்த தேர்தலும் மக்களுக்கு உருவாக்கிக் கொடுத்தது. அதனால் அது சாத்தியப்பட்டது.

வாரியார் சுவாமிகள் சொல்லுவார், “உருவத்தால் உயர்ந்த மரங்களே ஆயினும் பருவத்தால் அன்றிப் பழுக்காது” அதாவது பழத்தைக் கொடுக்காது.

ஒரு குழந்தைக்கு நல்ல தாய் கிடைப்பது முதல் வாய்ப்பு. நல்ல தகப்பன் கிடைப்பது இரண்டாவது வாய்ப்பு. வளரும்போது வறுமையில்லாத வாழ்க்கை அமைவது மூன்றாவது வாய்ப்பு. படிப்பு அதற்கடுத்த வாய்ப்பு. உயர் கல்வி அதற்கு அடுத்துவரும் வாய்ப்பு. நல்ல நிறுவனத்தில் வேலை, கை நிறையச் சம்பளம், உரிய வயதில் திருமணம், திருமணமான அடுத்த ஆண்டே கொஞ்சி மகிழ ஒரு குழந்தை, நோயில்லாத வாழ்க்கை, நீண்ட ஆயுள் என்று வாய்ப்பின் வலிமையை அடுக்கிக்கொண்டே போகலாம்.

சரி, எல்லோருக்கும் இந்த வாய்ப்புக்கள் வரிசையில் காத்துக் கொண்டிருக்கின் றனவா?அல்லது கிடைத்துக் கொண்டிருக்கின்றனவா?

இல்லை. ஒரு பத்து சதவிகிதம் பேருக்கு அப்படி அமையலாம். மற்றவர்களை, விதி எதாவது ஒன்றில் அல்லாட வைத்துவிடும்.

சிலர் ‘உப்புமா’ கம்பெனிகளில் வேலை பார்ப்பார்கள். அவர்களுடைய திறமை முழுவதும் அங்கீகாரமில்லாமல் வீணாகிக் கொண்டிருக்கும். சிலருக்கு உரிய வயதில் திருமணமாகாது. ஏதாவது ஒரு காரணத்தால் திருமணம் தள்ளிக் கொண்டே போகும், அழகும், இளமையும், கனவுகளும் வீணாகிக் கொண்டிருக்கும்.

சிலருக்குத் திருமணமாகி ஐந்து அல்லது பத்து ஆண்டுகள் ஆகியும் குழந்தை இருக்காது. குழந்தை இல்லாமல்  உருகிக் கொண்டிருப்பார்கள். அவர்கள் உருகாமல் இருந்தாலும், அவர்களுக்குத் தெரிந்தவர்கள், “என்ன விசேசம் ஒன்றும் இல்லையா?” என்று கேள்வி மேல் கேள்வி கேட்டு அவர்களை உருக்கி விடுவார்கள். குழந்தையில்லாத நிலைமையைவிட இவர்களுடைய உபத்திரவம் கொடுமையானதாக இருக்கும்.

கணினியில் operating system சீராக  programme செய்யப்பெற்று உருவாக்கப் பட்டிருப்பதைப் போல, மனித வாழ்க்கைக்கும் கடவுள் ஒரு குறைந்த பட்ச operating system த்தை உருவாக்கிக் கொடுத்திருக்கலாம். அதாவது திருமணம், குழந்தைச் செல்வம் ஆகிய இரண்டிற்கும் ஒரு common programme ஐ அவர் உருவாக்கி மனிதர்களைப் படைத்திருக்கலாம். அவ்வாறு செய்யாமல் விட்டுவிட்டார்.

அவ்வாறு செய்யப்பட்டிருந்தால், மனிதன் விடுவானா?

அடுத்ததற்கு அடிப்போடுவான். வருமானத்திற்கும் ஒரு common 
programme வேண்டும் என்று கேட்பான். இன்னொருவன் நோயில்லாத வாழ்க்கைக்கு  ஒரு common programme வேண்டும் என்று கேட்பான்.
வேறு ஒருவன் சிறிய வயது, மத்திய வயது, மரணங்களைத் தவிர்த்து அனைவருக்கும்  நீண்ட ஆயுள் கிடைக்க ஒரு common programme
வேண்டும் என்று கேட்பான்.

ஆசைக்கு அளவும் இல்லை. எல்லையும் இல்லை.

நீங்கள் நினைப்பவை எல்லாம் programme செய்யப்பெற்றுத்தான் படைக்கப்பெற்றிருக்கிறீர்கள். உங்களுடைய முன் வினைகள் காரணமாக அவற்றில் ஏற்றத்தாழ்வுகள் இருக்கும். தன்னிச்சையாக அவைகள் programme செய்யப்படுகின்றன. கடவுளுக்கும் அதற்கும் சம்பந்தம் இல்லை. அதை, அல்லது அவற்றை உங்களுக்குடைய தலை எழுத்து அல்லது தலைவிதி என்று சொல்லலாம். சுருக்கமாகச் சொன்னால், வாங்கி வந்த வரம் என்று சொல்லலாம்

எல்லாம் சீராக, ஒரு ஒழுங்கு முறையில் இருந்தால் என்ன ஆகும்? வாழ்க்கையில் சுவை இருக்காது. அப்படி ஒழுங்கு முறையுடன் இருந்தால் பிரச்சினைகள் இருக்காது. மனிதன் தெய்வத்தையே நினைக்க மாட்டான்! கையில் ஜாதகத்தைத் தூக்க மாட்டான்!

ஆர்யபட்டர், வராஹி மிஹிரர், ஜெய்மானி, பராசுரர், அகத்தியர், புலிப்பாணி போன்ற முனிவர்கள் தங்களுடைய அதீத Inspiration சக்தியினால் காலத்தின் மேன்மை பற்றிய செய்திகளையும், கிரகங்களைப் பற்றிய உண்மை களையும், அவைகளின் தாக்கத்தையும், ஜோதிடத்தையும் வடிவமைத்துக் கொடுத்துவிட்டுப் போனார்கள்

Inspiration என்பது A supernatural divine influence on the prophets, apostles, or sacred writers, by which they were qualified to communicate moral or religious truth with authority; a supernatural influence which qualifies men to receive and communicate divine truth; also, the truth communicated. என்று வைத்துக் கொள்ளுங்கள்

ஜோதிடத்தில் 12 வீடுகள். ஒரு வீட்டிற்கு 3 பாக்கியங்கள். மொத்தம்
36 பாக்கியங்கள். அந்த 36ல் சரி பாதிதான் கிடைக்கும். சரிபாதி கிடைத்திருக்காது. உதாரணத்திற்கு வெல்த் இருந்தால் ஹெல்த்
இருக்காது. அப்படி.

எந்தெந்தப்  பாக்கியங்கள் உங்களுக்குக் கிடைத்திருக்கிறது என்பதைக்
கண்டு பிடித்துச் சொல்வதுதான் ஜோதிடம். எல்லோரும் சமமாகத்தான் படைக்கப்பட்டிருக்கிறோம். ஒன்று இருந்தால் ஒன்று இருக்காது. பூர்வ புண்னியத்தை (முன்வினைப் பயன்களை) வைத்து அவை வேற்படும்

இல்லை என்றால் அஷ்டகவர்க்கப்படி யாராக இருந்தாலும் கிடைக்கும் மதிப்பெண்கள் எப்படி ஒன்றாக இருக்கும்? உங்களுக்கும் 337தான். அம்மையாருக்கும் 337தான். கனிக்கும் 337தான். பசிக்கும் (ப.சி) 337தான். ராசாவுக்கும் 337தான் சைனிக்கும் 337தான். வடிவேலுக்கும் 337தான் கேப்டனுக்கும் 337தான். அதை நினைவில் வையுங்கள்.

சரி சொல்ல வந்த விஷயத்திற்கு வருகிறேன். வாழ்க்கையில் அடுத்த நிலைக்கான வாய்ப்பு எப்போது கிடைக்கும்? அதை எப்படித் தெரிந்து கொள்வது?

அதை விரிவாக அலசுவோம்

நாளைவரை பொறுத்திருங்கள்

(தொடரும்)

அன்புடன்
வாத்தியார்

வாழ்க வளமுடன்!

Astrology: தஞ்சை பெரிய கோவிலின் மர்ம சக்தி...! முன் கதையும், இன்றையக் கதையும்!

-------------------------------------------------------------------------------------------
Astrology: தஞ்சை பெரிய கோவிலின் மர்ம சக்தி...! முன் கதையும், இன்றையக் கதையும்!

23.01.1985ம் தேதியிட்ட ஜீனியர் விகடன் இதலில் ஒரு சுவாரசியமான அட்டைப்படச் செய்தி (cover story) வந்திருந்தது. அதை அப்படியே எனது சேகரிப்புக் கோப்புக்களுடன் பாதுகப்பாக வைத்திருக்கிறேன். சமீபத்தில் அதே நிகழ்வு மீண்டும் அரங்கேறியிருப்பதை ‘தினமலர்’ நாளிதழ் மூலம் தெரிந்து கொண்டேன். உங்களின் பார்வைக்காக அவை இரண்டையும் இன்று வலை ஏற்றியுள்ளேன்.
அன்புடன்
வாத்தியார்
------------------------------------------------------------------------------------------------------
முதலில் ஜூனியர் விகடனில் அன்று (23.01.1985ல்) வந்திருந்த செய்தி:

    திருவையாறு திருவையாறு தியாகப் பிரம்ம ஆராதனை உற்சவத்தைத் துவக்கி வைத்த மத்திய செய்தி ஒலிபரப்பு அமைச்சர்.வி.என்.காட்கில் தஞ்சாவூர் பெரிய கோவிலுக்கு வருவதாக ஏற்பாடாகியிருந்தது.

    பூரண கும்பம், பரிவட்டம் போன்ற மரியாதைகளுடன் பெரிய கோவில் நிர்வாகிகள் ஆவலுடனும், பரபரப்புடனும் காத்திருந்தனர்.

    காத்திருந்ததுதான் மிச்சம். மத்திய அமைச்சரின் கார் ஆலயத்தின் பக்கமே வராமல் பறந்து விட்டது.

    “சரிதான்...! அரசியல்வாதிகளுக்கும் இந்த ஆலயத்திற்கும் சரிப்பட்டு வரவில்லை என்ற ரகசியத்தை யாரோ மத்திய அமைச்சரிடம் சொல்லியிருக்க வேண்டும். அதனால் பயந்துபோய் அமைச்சர் ஆலயத்திற்குள் நுழையவில்லை போலிருக்கிறது!” என்று இந்தச் சம்பவத்தைப் பற்றித் தஞ்சை மக்கள் பேசிக்கொள்கிறார்கள்.

    தங்கள் ஊரில் உள்ள பெரிய கோவிலைப் பற்றி எவ்வளவு பெருமைப் படுகிறார்களோ, அந்த அளவிற்கு அந்தக் கோயிலுக்கு ஏதோ மர்ம சக்தி இருப்பதையும் தஞ்சை நகர மக்களிடையே சமீபத்தில் ஒரு நம்பிக்கை வேகமாகப் பரவியிருக்கிறது. தஞ்சை நகர புகழ் மிக்க சந்து முனைகளிலும், கடைத் தெருக்களிலும் இந்த மர்ம சக்தி பற்றி பேச்சு அடிபடாத நாளே கிடையாது.

    ”நடந்த சம்பவங்களை வரிசையாகச் சேர்த்து வைத்துப் பார்த்தால் நகர மக்கள் சொல்வதில் உண்மை இருப்பது தெரிகிறது. இந்தச் செய்தியை இதுவரை நாங்கள் வெளியிடாததற்குக் காரணம் ஏதோ ஒருவகை தயக்கம்தான்” என்ற ஒரு உள்ளூர் நிருபர், பிறகு மெதுவாக, “பயம்கூட” என்றார். பெரிய கோயில் மர்ம சக்தியைப் பற்றி தஞ்சை நகரெங்கும் சொல்லப்படும் நிகழ்ச்சிகள் இவைதான்
----------------------------------------------------------------------------------------------------------
    பத்து வருடத்திற்கு முன்பிருந்து ஆரம்பமாகிறது இந்தக் கதை.

    தஞ்சை பெரிய கோவிலில் ராஜ ராஜ சோழன் சிலை வைக்க வேண்டும் என்று மத்திய அரசுடன் மோதினார் அன்றைய முதல்வர் கலைஞர் கருணாநிதி. அதையொட்டி பெரிய பிரச்சினை எழும்பியது. சிலையை உள்ளே வைக்க மத்திய அரசு அனுமதி மறுத்தபோது, “நினைவுச் சின்னமாக தொல்பொருள் இலாகாவால் பாதுகாக்கப்படும் கோயில் அது. புதிய சிலை ஒன்று வைப்பதற்கு அதற்கான சட்டத்தில் வழி இல்லை” என்று காரணம் கூறியது.

    அதே நேரத்தில் கோயிலுக்குள் உள்ள வராஹி அம்மனுக்குப் புதிய மண்டபம் கட்டப் பட்டிருந்தது. இந்தக் கோயில் கட்டப்படுவதற்கு முன்பிருந்தே வராஹி அம்மன் அங்கே இருந்ததாகச் சொல்லப்படுவதுண்டு. வராஹி அம்மனுக்கும் புது மண்டபம் எழுப்பி, முதலில் அதற்குக் குடமுழுக்குச் செய்ய நினைத்திருந்தார்கள்.

    “புதிதாக ராஜ ராஜன் சிலை கோயில் உள்ளே வைக்கக் கூடாது என்றால் வராஹி அம்மனுக்கு மட்டும் புதிதாக மண்டபம் கட்டலாமா? சட்டம் அதற்கு மட்டும் இடம் தருகிறதா?” என்று கலைஞர் தரப்பிலிருந்து இதைச் சுட்டிக் காட்டிக் கேள்வி எழுப்பப் பட்டது. இதனால் வராஹி அம்மனின் புதிய மண்டபத்தை இடிக்கும்படி மத்திய அரசு சொல்லிவிட்டது.

    இந்தப் பிரச்சினை கிளம்பிய சிறிது காலத்திற்குள் கலைஞர் அரசு பல பிரச்சினைகளைச் சந்திக்க நேர்ந்தது. கடைசியில் அவரது ஆட்சி டிஸ்மிஸ் செய்யப்பட்டது. “அதில் ஒரு குறிப்பிடத்தக்க விஷயம் என்னவென்றால், வராஹி அம்மனின் புதிய மண்டபம் இடித்து முடிக்கப்பட்ட அன்றுதான் தி.மு.க ஆட்சி டிஸ்மிஸ் செய்யப்பட்ட சம்பவம் நடந்தது” என்றார் பிரபல உள்ளூர் நிருபர் ஒருவர்.

    மர்ம சக்தி அதோடு தன் வேலையை நிறுத்தவில்லை....!

    “எமர்ஜென்ஸியை அடுத்து வந்த தேர்தலில் வராஹி அம்மன் மண்டபத்தை இடிக்க உத்தரவிட்ட பிரதமர் இந்திராவும் தோற்றுப் போய், அவரது ஆட்சியும் போயிற்று. பெரிய கோயில் பிரச்சினையில் சம்பந்தப் பட்ட இரு தலைவர்களும் இப்படி பாதிக்கப்பட்டது முதல் நிகழ்ச்சி” என்கிறார்கள் ஊர் மக்கள்

    சென்ற ஆண்டு ராஜராஜ சோழன் முடிசூட்டு விழா நடந்தது நினைவிருக்கும். மாமன்னது ஆயிரம் ஆண்டு பூர்த்தி விழா என்று சொல்லப்பட்டது. பெரிய கோவிலில் ஆண்டு தோறும் சதய விழா என்று கொண்டாடப் படுவது வழக்கம். அது ராஜ ராஜ சோழனது பிறந்த நட்சத்திரத்தையொட்டி வரும் விழா. அதன்படி பார்த்தால் ராஜ ராஜ சோழனுக்கு சென்ற ஆண்டு 998 -வது சதய விழாதான் (பிறந்த நாள்) கொண்டாட வேண்டும்.

    அரசியல் காரணத்திற்காகவோ அல்லது வேறு என்ன காரனத்திற்காகவோ, 998 -வது பிறந்த நாள் என்பதைக் கண்டு கொள்ளாமல், இந்த ஆயிரம் ஆண்டு நிறைவு விழா ஏற்பாடு செய்யப்பட்டு விட்டது.

    பொதுக்கூட்ட நிகழ்ச்சி ஒன்றில், ராஜ ராஜ சோழன் செப்புச் சிலையை அலங்கரித்து எடுத்துச் சென்று முடிசூட்டு விழா நடத்த வேண்டும் என்பது முதல் ஏற்பாடாம். ஆனால் வைதீகர்கள் இதற்கு உடன்படவில்லை. ராஜ ராஜ சோழன் செப்புச் சிலை, ஆலயங்களில் உள்ள நாயன்மார்கள், ஆழ்வார்களின் செப்புச் சிலைகளுக்குத் தரப்படும் பக்தி மரியாதைகளுடன் தினமும் வழிபாட்டுக்கு உரியதாக இருக்கிறது. அதை இவ்வாறு பொதுக்கூட்டங்களுக்கு எடுத்துச் சென்று வைப்பது என்பது சரியல்ல என்று வைதீகர்கள் கடுமையாக எதிர்ப்புத் தெரிவிக்கவே, ஆலய சந்நிதியிலேயே முடிசூட்டு வைபவத்தை நடத்த முடிவு செய்யப்பட்டதாம். பிரதமர் இந்திரா தனது கையால்  முடிசூட்டுவது என்று செய்யப்பட்ட ஏற்பாட்டையும் வைதீகர்கள் முதலில் ஏற்கவில்லை. ஆனால் பிறகு பேசாமல் இருந்துவிட்டார்களாம்.

    இந்த முடிசூட்டு வைபவத்திற்கு வரும்போதுதான் தமிழக முதலமைச்சர் எம்.ஜி.ஆர் கோயிலேயே சற்று மயக்கம் அடைந்தார்.

    “அதன் பிறகு சில நாட்களில் முதல்வரின் உடல் நிலை மிகவும் பாதிக்கப்பட்டது. அன்னை இந்திரா காந்தியின் எதிர்பார்க்காத சோக மரணமும் நிகழ்ந்தது. இந்த அடுத்தடுத்து நடந்த நிகழ்ச்சிகளைப் பார்த்து தஞ்சை மக்கள் கதிகலங்கிப் போய்விட்டார்கள்” என்றார் ஒரு நகரப் பிரமுகர்.

    வருடம் தோறும் தஞ்சைக் கோயிலில் நடக்கும் சதயத் திருவிழா சென்ற ஆண்டு நடக்கவில்லை. “ ஆயிரம் ஆண்டு விழா என்று சொல்லி விட்டு, 998 -வது பிறந்த நாள் விழா எப்படிக் கொண்டாடுவது என்ற தயக்கம் மட்டும் காரணமல்ல. அந்த சதய விழாவை விரும்பினாலும் கொண்டாட முடியாத நிலை ஏற்பட்டது. காரணம் சதய விழாநடக்க வேண்டிய அன்றுதான் அன்னை இந்திராவின் இறுதியாத்திரை நடந்த நாளாக அமைந்தது. இப்படி நடந்தது மர்ம சக்தியின் வேலைதான் என்று மக்கள் நம்புகிறார்கள்” என்ரார் அந்தப் பிரமுகர்.

    பிறகு முதலமைச்சர் பூரண குணம் அடைய இந்தக் கோயிலில் மிகப் பெரிய பூஜைகள் நடத்தப்பெற்றதாகச் சொல்லப்படுகிறது.

    இந்த முக்கிய சம்பவங்களைத் தவிர, தஞ்சை மக்கள் மர்ம சக்திக்கு ஆதாரமாக வேறு சில நிகழ்ச்சிகளையும் குறிப்பிடுகிறார்கள்

    (அவற்றை எல்லாம் படிக்க விரும்புவர்களுக்காக செய்தி வந்த பக்கங்கள் ஸ்கேன் செய்தி கொடுக்கப் பெற்றுள்ளது.!)
-----------------------------------------------------------------------------

படங்களின் மீது கர்சரை வைத்து அமுக்கினால், 

படங்கள்  பெரிதாகத் தெரியும். படிப்பதற்கு ஏதுவாக இருக்கும்!

 நன்றி: ஜூனியர் விகடன்
++++++++++++++++++++++++++++++++++++++++++++++++++
நேற்று தினமலரில் வந்த செய்தி:

தி.மு.க., ஆட்சி பறிபோன பரிதாபம் : தஞ்சை பெரிய கோவில் சென்டிமென்ட்
(தினமலர் செய்தி)

தஞ்சாவூர்: தஞ்சை பெரிய கோவிலுக்குள் பதவியில் இருப்பவர்கள் வந்து சென்றால், பதவி பறிபோகும் என்பது, இந்த தேர்தல் மூலம் மீண்டும் நிரூபணமாகி உள்ளது.

"தஞ்சை பெரிய கோவிலுக்கு வி.ஐ.பி.,க்கள் வந்து சென்றால், அவர்கள் பதவி பறிபோகும்; உயிர் போகும்' என, பல கருத்துக்கள் நிலவுகின்றன. இதனால், இங்கு வரும் பெரும்பாலான வி.ஐ.பி.,க்கள், பெரிய கோவிலுக்குள் செல்வதை தவிர்ப்பர்.இதற்கு, பிரதமராக இருந்த இந்திரா, முன்னாள் ஜனாதிபதி சங்கர் தயாள் சர்மா, முன்னாள் முதல்வர் எம்.ஜி.ஆர்., போன்றோரை உதாரணமாகக் கூறுவர். தஞ்சை பெரிய கோவில் கும்பாபிஷேகத்தின் போது ஏற்பட்ட தீ விபத்தில், 50க்கும் மேற்பட்டோர் பலியாகினர்.இச்சம்பவம் அறிந்து அப்போதைய முதல்வராக இருந்த கருணாநிதி, கோவிலின் நேர் வழியாக வராமல் பக்கவாட்டு வாசல் வழியாக வந்து, கோவிலுக்குள் செல்லாமல், சம்பவ இடத்தை மட்டும் பார்வையிட்டுச் சென்றார். இதுபோல, பல உதாரணங்களை கூறலாம்.

கடந்த செப்., 22 முதல் 26ம் தேதி வரை, தஞ்சை பெரிய கோவிலில் ஆயிரமாவது ஆண்டு விழா நடந்தது. 25ம் தேதியன்று கோவிலுக்குள் பத்மா சுப்பிரமணியம் தலைமையில் ஆயிரம் நடனக் கலைஞர்கள் நடனமாடினர். இந்நிகழ்ச்சியில் பங்கேற்க பட்டு வேட்டி, சட்டை சகிதமாக வந்த கருணாநிதி, பிரதான வாயில் வழியாக வராமல், சிவகங்கை பூங்கா வழியாக, தெற்குப்புற வாயில் வழியாக வந்து, மூலஸ்தானத்துக்கு பக்கவாட்டில் அமர்ந்து நிகழ்ச்சியை கண்டுகளித்தார். பெரிய கோவிலுக்குள் முதல்வர் வந்து சென்றதால், பெரிய கோவில் சென்டிமென்டுக்கு முற்றுப்புள்ளி வைக்கப்பட்டதாக பலரும் கருதினர். அடுத்த நாள் நிறைவு விழாவில், முன்னாள் மத்திய அமைச்சர் ராஜா பேசுகையில், "இந்த நாள் கணக்கு பார்க்கும் நாள்; கணக்கு தீர்க்கும் நாள். ராஜராஜன் காலத்தில் சதுர்வேதி மங்கலங்களை உருவாக்கினார். ஆனால், தி.மு.க., தலைவர் கருணாநிதி சமத்துவபுரத்தை உருவாக்கி, அவர் காலத்தைச் சேர்ந்த ஆதிக்க கணக்கை கருணாநிதி தீர்த்துள்ளார்' என பேசிச் சென்றார்.

கடந்த நவம்பரில், "2ஜி' ஸ்பெக்ட்ரம் பிரச்னையில் சிக்கிய ராஜா, பதவி இழந்து, கைதாகி இன்று வரை வெளியே வர இயலாத வகையில் டில்லி திகார் சிறையில் சிக்கித் தவிக்கிறார். "2ஜி' ஸ்பெக்ட்ரம் பிரச்னையால், காங்., - தி.மு.க., உறவும் பல கட்ட பிரச்னைகளை சந்தித்து, கனிமொழி, தயாளு போன்றோரிடம் சி.பி.ஐ., விசாரணை, கலைஞர் "டிவி' அலுவலகத்தில் ரெய்டு, குற்றப்பத்திரிகையில் கனிமொழி பெயர், தொடர் விசாரணை, எந்த நேரமும் கைதாகலாம் என்ற நிலை, தேர்தல் கூட்டணியில் இழுபறி என தொடர்ந்த சிக்கல், பெரிய கோவில் சென்டிமென்டை மீண்டும் நிரூபித்துள்ளது.

தேர்தல் துவங்கியது முதல், தி.மு.க., - அ.தி.மு.க., கூட்டணியை வைத்து கணித்த அனைவரும், இரு கட்சிகளும் சம பலத்தில் வருவர், கூட்டணி ஆட்சி நடக்கும் என, பல யூகங்களை தெரிவித்தனர்.இதனால், தமிழகத்தில் ஆட்சியை கைப்பற்றாவிட்டாலும், மத்தியில் அங்கம் வகிப்பதால் தங்களை அ.தி.மு.க.,விடம் இருந்து காத்துக் கொள்ளலாம் என எண்ணிய தி.மு.க.,வுக்கு, தேர்தல் ரிசல்ட் கடும் அதிர்ச்சியை  ஏற்படுத்தியுள்ளது.

எதிர்க்கட்சியாகக் கூட அமர இயலாத அளவுக்கு, தஞ்சை பெரிய கோவில், "சென்டிமென்ட்' தன் வேலையை காட்டியுள்ளது என்பது, இந்த சென்டிமென்ட் மீது நம்பிக்கை வைத்துள்ளவர்களை மீண்டும் முணுமுணுக்க வைத்துள்ளது.

நன்றி: தினமலர்
சுட்டி

வாழ்க வளமுடன்!

Astrology அம்மாவின் ஜாதக மேன்மையும் காத்திருக்கும் அடுத்தடுத்த பதவிகளும்!

+++++++++++++++++++++++++++++++++++++++++++++++++++++++++++
Astrology அம்மாவின் ஜாதக மேன்மையும் காத்திருக்கும் அடுத்தடுத்த பதவிகளும்!

அமோக வெற்றி பெற்று, மூன்றாம் முறையாக  தமிழகத்தின் முதல்வராக, இன்று பதவி ஏற்கும் அம்மாவை, நம் வகுப்பறையின் சார்பில் வாழ்த்துகிறேன்.

பழநி அப்பனின் அருளால், அவர் எல்லா நலன்களையும் பெற்று சிறப்பானதொரு ஆட்சியைத் தருவார் என்று நம்பிக்கை கொள்வோம்.

அம்மாவின் ஜாதக விசேசம் அனைவரும் அறிந்ததே. 4 ஆண்டுகளுக்கு முன்பு, 25.4.2007ம் தேதியன்று நமது வகுப்பறை பதிவில், அம்மாவின் ஜாதகத்தை, ஜாதகத்தின் மேன்மையை அலசியிருக்கிறேன். படித்திராதவர்கள் படித்துப்பாருங்கள். அதன் சுட்டி

குரு பகவான், 2011, மே 9 அதிகாலை (மே 8ம் தேதி நள்ளிரவு) 1.09 மணிக்கு, மீனராசியில் இருந்து மேஷராசிக்கு பெயர்ச்சியானார். அவர் 2012 மே 17ம் தேதி வரை இந்த ராசியில் சஞ்சரிப்பார். அவருடைய இடப் பெயர்ச்சியினால், சிம்மம், துலாம், தனுசு ராசிக்காரர்கள் அதிக நன்மை பெறுவார்கள். அதிலும் சிம்ம ராசிக் காரர்களுக்கு அதிக அளவு நன்மைகளைச் செய்வார்.

15.11.2011 அன்று அம்மாவைப் பிடித்திருந்த ஏழரைச் சனியும் பூரணமாக விலகுகிறது.

24.11.2011 ஆம் தேதியன்று ராகு திசை முடிந்து, அவருக்கு குரு திசை ஆரம்பம். மிதுன லக்கினக்காரரான அவருடைய ஜாதகத்திற்கு 7, மற்றும் 10ம் வீடுகளுக்கு அதிபதியான குரு பகவான், 7ல் அமர்ந்து லக்கினத்தைத் தன் பார்வையில் வைத்திருக்கிறார். இந்த அமைப்பு மிகவும் விசேசமானது. தன்னுடைய தசையில் அவர் அம்மாவிற்கு செல்வாக்கு, புகழ், இன்னும் பெரிய பதவிகளைப் பெற்றுத்தரவுள்ளார். பொறுத்திருந்து பாருங்கள்

அன்புடன்
வாத்தியார்

வாழ்க வளமுடன்!

Astrology தந்ததை மீண்டும் பெறச் சொல்லடி; தனியே நிற்பேன் எனச் சொல்லடி!

-----------------------------------------------------------------------------
Astrology   தந்ததை மீண்டும் பெறச் சொல்லடி; 
                      தனியே நிற்பேன் எனச் சொல்லடி!

இதற்கு முந்தைய பதிவைப் படித்திராதவர்கள். அதைப் படித்து விட்டு வந்து இதைப் படிக்கும்படி கேட்டுக் கொள்ளப்படுகிறார்கள்
---------------------------------------------------------------------------------------------------
எனக்கு தினமும் காதலர்களிடம் இருந்து 3 அல்லது 4 மின்னஞ்சல்கள்  வரும். 75 சதவிகிதம் பெண்களிடம் இருந்து வரும்

“நான் ஒருவரைக் காதலிக்கிறேன். அவர் வேறு மதத்தவர். எங்கள் காதல் நிறைவேறுமா? எங்கள் வீடுகளில் ஒப்புக்கொள்வார்களா? எங்கள் காதலை ஏற்றுக் கொள்வார்களா? என்னுடைய ஜாதகத்தை அனுப்பி வைத்துள்ளேன். ஜாதகத்தைப் பார்த்துச் சொல்லுங்கள். அவருக்கு ஜாதகம் கிடையாது”

என்று இந்த விதமாகத்தான் பல கடிதங்கள் இருக்கும்.

சிலர் அவசரத்தில் வந்து பஸ்ஸில் ஏறிவிடுவார்கள். பஸ் பேருந்து நிலையத்தை விட்டுப் பத்துக் கிலோ மீட்டர் தூரம் வந்தவுடன், பயணச் சீட்டு எடுக்கும்போதுதான், பேருந்து மாறி ஏறிய கதை தெரியும்.. மதுரையில் இருந்து திண்டுக்கல் செல்லும் பஸ்ஸில் ஏறிவிட்டு, திருநெல்வேலிக்கு டிக்கெட் கேட்டால் எப்படி இருக்கும்?

நடத்துனரின் காய்ச்சலுக்கு ஆளாகி, சக பயணிகளின் பரிதாபப் பார்வைக்கு அல்லது ஏளனப் பார்வைக்கு ஆளாகி, வழியில் விளாங்குடி தாண்டி அல்லது கொடை ரோடு தாண்டி நடு ரோட்டில் இறங்கிவிடும்படி ஆகிவிடும்.

அதுபோலத்தான் அவசரக் காதலும். காதலுக்குக் கண்ணில்லை என்பது உண்மைதான்.

அந்தக் காலத்தில் காதலுக்கு எல்லாம் வழியில்லாமல் இருந்தது. நூற்றுக்கு ஒரு பெண்தான் மாட்டுவாள். பெண்ணிடம் பேசினாலே வெட்டி விடுவார்கள். ஓரப் பார்வை மட்டும் பார்த்துக்கொள்ளலாம் - அதுவும் திருவிழாக்கள் அல்லது கோவில்களுக்கு வரும் பெண்களை மட்டும் லுக்’ விட்டுக் கொள்ளலாம். இன்று அப்படியல்ல! நிலைமை தலை கீழாக மாறிவிட்டது.

Education (கல்வி)
Employment (வேலை)
Economical freedom (பொருளாதார சுதந்திரம்)
Exposure (கண்ணோட்டம்)
Ego (தன்முனைப்பு)
என்று பல மேட்டர்கள் ஒன்று சேர்ந்து பெண்களை ஆட்டிப் படைக்கின்றன.

அந்தக் காலப் பெற்றோர்கள் ஆண்களை அடக்கி வளர்த்தார்கள். பெண்களைப் பொசுக்கி வளர்த்தார்கள்   இப்போது நிலைமை தலைகீழ். பிள்ளைகள் பெற்றோர்களைப் பொசுக்கி வளர்கின்றன.

மேரி ப்ரெளவுன் அல்லது சப்வே ரெஸ்டாரெண்டுகளில் காதல் ஆரம்பிக்கும், பல்ஸர் மோட்டார் சைக்கிளிலும், கடற்கரைகளிலும், அது இல்லாத ஊர்களில் பூங்காக்களிலும், சினிமா தியேட்டர்களிலும் காதல் வளரும். SMS, email களில் சூடு பிடித்து உள்ளங்கள் உருக ஆரம்பிக்கும். இரண்டு அல்லது மூன்று வருட காலங்கள் தங்களையே மறந்து திரிவார்கள்.

யாருக்கும் தெரியக்கூடாது என்று நினைப்பவர்கள், மறைந்து, மறைந்து காதலிப்பார்கள். மோட்டார் சைக்கிளில் போகும்போது, கள்ளன் ஹெல்மட் போட்டுக் கொள்வான். பில்லியனில் உட்கார்ந்திருக்கும் கள்ளி, துப்பட்டவால், தலையில் முக்காடு போட்டுக்கொண்டு, அவன் முதுகில் முகத்தை வைத்து இறுகக் கட்டிக்கொண்டு யாரும் பார்க்க முடியாத வண்ணம் செல்வாள். மங்கலான வெளிச்சத்தில் இயங்கும் ரெஸ்டாரெண்டுகள், படம் ஓடிக் கொண்டிருக்கும் திரையரங்குகள், படகின் மறைவுப் பகுதி என்று காதல் பலவண்ணங்களில் பூத்துக் குலுங்கும்.

பூத்த பூக்கள் காயாகி, கனியும்போதுதான் பல பிரச்சினைகள் உருவாகும். பல இடங்களில் இரு புறமும் சம்பந்தப்பட்டவர்களின் பெற்றோர்கள் ஒப்புக் கொள்ளமாட்டார்கள். ஏற்றுக் கொள்ள மாட்டார்கள்

காதலுக்கு மட்டும்தான் சுக்கிரன் வருவார். திருமணத்திற்கு, ஏழாம் வீட்டு அதிபதி, லக்கினாதிபதி, தந்தைக்குக் காரகன் சூரியன், தாய்க்குக் காரகன் சந்திரன் என்று அத்தனை பேரும் வந்து நிற்பார்கள். அவர்களின் ஆசி இல்லாமல், டக்’ கென்று திருமணம் நடந்து விடாது.

அந்த நிலையில் ஜாதகத்தையும் பார்த்தால் என்ன ஆகும்?

இருவரின் ஜாதகமும் பொருந்தினால் பரவாயில்லை. பொருந்தா விட்டால் என்ன செய்வது?

அவனை அல்லது அவளை வேண்டாம் என்று சொல்லி விட முடியுமா?

சென்னை சில்க்ஸிலும், போத்தீஸிலும் வாங்கிய சேலை பிடிக்கவில்லை என்றால், அடுத்த நாள் சென்று மாற்றிக் கொண்டு வருவதைப் போல, காதலனையும் மாற்றிக் கொண்டுவிட முடியுமா?

கழற்றிவிட்டால் அவன் சும்மா இருப்பானா? மூன்று வருட அல்லது நான்கு வருடத் தொடர் காதலுக்கு, எத்தனை ஆதாரங்கள் அவனிடம் சிக்கி இருக்கும்? அவற்றை வைத்துக் கொண்டு அவன் பிரச்சினை செய்ய மாட்டானா?

திருமணத்திள் பிரச்சினை என்றால், விவாகத்தை ரத்து செய்யக் கோரி நீதி மன்றப் படி ஏறலாம். காதலில் பிர்ச்சினை என்றால் எந்தப் படியில் ஏறுவது?

ஆகவே காதல் என்று வந்து விட்ட பிறகு, ஜாதகத்தைத் தொடாதீர்கள். வருவது வரட்டும் என்று ஜாதகத்தைப் பார்க்காமல் காதலித்தவனையே அல்லது காதலித்தவளையே திருமணம் செய்து கொள்ளூங்கள். துணிச்சலாக எடுத்துச் சொல்லிப் பெற்றோரின் சம்மதத்தைப் பெற்றுத் திருமணம் செய்து கொள்ளுங்கள். சம்மதிக்காவிட்டால், போராடி, உண்ணாவிரதம் இருந்து சம்மதத்தைப் பெறுங்கள்.

எக்காரணத்தைக் கொண்டும், பெற்றோர்களுக்குத் தெரியாமல், திருட்டுத் தனமாகத் திருமணம் செய்து கொள்ளாதீர்கள்.

குறைந்தது 21 ஆண்டுகள் உங்களைத் தூக்கி வளர்த்தவர்கள், போற்றி வளர்த்தவர்கள் அவர்கள் என்பதை நினைவில் வையுங்கள். அவர்களின் மன வேதனைக்கு ஆளாகாதீர்கள். அதிலும் குறிப்பாக அன்னையின் மன வேதனைக்கு ஆளாகிவிடாதீர்கள். அன்னையின் மன வேதனை உங்களைச் சும்மா விடாது. அதை மனதில் வையுங்கள்.

காதலுக்கு உதாரணம் ஸ்ரீவில்லிபுத்தூர் ஆண்டாள் நாச்சியார். இறைவனை அவள் காதலித்தாள். மாயக் கண்ணன்தான் தனக்கு மனாளனாக வர வேண்டும் என்று ஏங்கினாள். உருகினாள். அனுதினமும் கண்ணன் நினைவாக வாடினாள்.

கண்ணன் வந்து தன்னைத் திருமணம் செய்து கொள்வதாகக் கனவு கண்டாள். அதை, அந்தக் கனவை,” வாரணமாயிரம் சூழவலம் செய்து” என்று தொடங்கிப் பாடினாள். ஆண்டாள் நாச்சியார் கண்ட வாரணமாயிரக் கனவு அப்படியே பலித்தது.

”இம்மைக்கும் ஏழேஏழ் பிறவிக்கும் பற்றாவான்
    நம்மை உடையவன் நாராயணன் நம்பி
 செம்மை உடைய திருக்கையால் தாள் பற்றி
    அம்மி மிதிக்கக் கனாக்கண்டே தோழிநான்’

என்று அவள் பாடினாள். பாடியது நடந்தது.

மாதவனைத் தவிர வேறொரு நாதனை மனதில் நினைக்காமல் வாழ்ந்தவள் ஆண்டாள். தேவர்களுக்கு உரிய  வேள்விப் பொருட்களை, ஒரு முறை நரி ஒன்று நுழைந்து முகர்ந்து பார்த்ததாம். எம்பெருமான் கண்ணனுக்கு என்று வளர்ந்த உடம்பு இது. எந்த மானிடனும் இதைத் தொட விடமாட்டேன் என்று மனவுறுதியோடு இருந்தவள் ஆண்டாள். அதையும் ஒரு பாசுரத்தில் அற்புதமாக அவள் வெளிப்படுத்தினாள்.

   “வானிடை வாழும் அவ்வானவர்க்கு
       மறையவர் வேள்வியில் வகுத்த அவி
    காளிடை திரிவதோர் நரிபுகுந்து
       கடப்பதும் மோப்பதும் செய்வதொப்ப
    ஊனிடை ஆழிசங்கு உத்தமர்க் கென்று
       உன்னித்து எழுந்த என் தடமுலைகள்
    மானிட வர்க்கென்று பேச்சுப்படில்
       வாழகில் லேன் கண்டாய் மன்மதனே!

ஆண்டாளின் இந்த நிலைப்பாட்டைக் கவியரசர் கண்ணதாசன் அற்புதமாகத் திரைப் பாடல் ஒன்றில் பதிவு செய்தார். எளிமையாகப் பதிவு செய்தார்

    கண்ணன் முகம் கண்ட கண்கள்
       மன்னர் முகம் காண்பதில்லை
    கண்ணனுக்குத் தந்த உள்ளம்
       இன்னொருவர் கொள்வதில்லை
    கண்ணன் வரும் நாளில்
       கன்னி இருப்பேனோ - காற்றில் மறைவேனோ!

காதல் என்று வந்து விட்டால் ஆண்டாளாக மாறிவிடுங்கள். காதலித்தவனையே திருமணம் செய்து கொள்ளுங்கள். காதலிக்கும் முன்பு, காதலனைப் பற்றிய எல்லா விவரங்களையும் நன்கு தெரிந்து கொண்டு, காதலிக்கத் துவங்குங்கள். அவசரக் காதல், மேட்னி ஷோக் காதல் எல்லாம் வேண்டாம். வேண்டவே வேண்டாம். காதலிக்கும் முன்பாகவே அவன் ராமனா அல்லது ராவணனா என்று தெரிந்து கொண்டு காதல் செய்யுங்கள். உங்கள் மொழியில் சொன்னால், அவன் நாயகனா அல்லது வில்லனா என்று தெரியாமல் அவன் மீது காதல் வயப்பட்டுவிடாதீர்கள்.

காதல் புனிதமானது. காதல் கல்யாணத்தில்தான் முடிய வேண்டும். பயணம் போய்ச்சேர வேண்டிய இடத்தில்தான் (destination) முடிய வேண்டும். வழியில் விபத்தில் சிக்கி, மருத்துவமனையில் முடியக்கூடாது.

அகவே காதலில் மூழ்கிக் கிடப்பவர்கள், ஜாதகங்களைத் தேடாதீர்கள்.

ஜாதகங்களில் நம்பிக்கை உள்ளவர்கள், காதல் என்ற சூறாவளியில் சிக்கிக் கொள்ளாதீர்கள்

காதல் திருமணங்களுக்கான ஜாதக அமைப்பு என்ன? காதல் திருமணமாகட்டும் அல்லது பெற்றோர் பார்த்து செய்து வைத்த திருமணமாகட்டும், அது தோல்வியில் முடியாமல் இருக்க, ஜாதக அமைப்புக்கள் என்னென்ன என்பன பற்றி தொடர்ந்து அலசுவோம். பொறுத்திருந்து படியுங்கள்.

கட்டுரையின் நீளம் கருதியும், உங்களின் பொறுமை கருதியும், என்னுடைய தட்டச்சும் நேரம் கருதியும் இன்று இத்துடன் நிறைவு செய்கிறேன்.

(தொடரும்)

அன்புடன்
வாத்தியார்






வாழ்க வளமுடன்!