என்னுடைய நூல் வெளியீட்டு விழா!

என்னுடைய நூல் வெளியீட்டு விழா!

அடியவன் எழுதிய சிறுகதைகளின் முதல் தொகுப்பு நூல் 'செட்டிநாட்டு மண்வாசனைக் கதைகள்' என்னும் தலைப்பில் வெளிவந்துள்ளது.

நூல் வெளியீட்டு விழா எனது வாசக நண்பரின் காரைக்குடி இல்லத்தில் 12.4.2009ஆம் தேதியன்று நடைபெற்றது. குழந்தைக் கவிஞர் செல்ல கணபதி அவர்கள் நூலை வெளியிட, தேவகோட்டை ஜமீன்தார் திரு.சோம. நாராயணன் செட்டியார் அவர்கள் நூலின் முதல் பிரதியைப் பெற்றுக் கொண்டார். பட்டிமன்றப் புகழ நகைச்சுவை வேந்தர் கண. சிற்சபேசன் அவர்கள் நூலிற்கான பாராட்டுரையை நல்கினார்

விழாவில் எடுக்கப்பெற்ற புகைப்படங்களில் சிலவற்றை உங்கள் பார்வைக்காகக் கீழே கொடுத்துள்ளேன்

கவிஞர் செல்லகணபதி அவர்கள் நூலை வெளியிடும் காட்சி!

கவிஞர் செல்ல கணபதி அவர்கள் நூலைப் பாராட்டிப் பேசுகின்றார்

பட்டிமன்றப் புகழ நகைச்சுவை வேந்தர் கண. சிற்சபேசன் அவர்கள் நூலிற்கான பாராட்டுரையை நல்கினார்

நூலின் முகப்பு அட்டை

நூலின் பின்பக்க அட்டை
+++++++++++++++++++++++++++++++++++++++++++++++

நூலிற்கு அணிந்துரை நல்கியவர்கள்:

1. நீதியரசர் திரு.AR.லெட்சுமணன் அவர்கள், Chairman,
Law Commission of India, New Delhi

2. இலக்கியச் சிந்தனை திரு.ப. லெட்சுமணன் அவர்கள்,
சென்னை (மத்திய உள்துறை அமைச்சர் திரு.ப.சிதம்பரம்
அவர்களின் மூத்த சகோதரர் இவர்)

3. முனைவர்.திரு.தமிழண்ணல், முன்னாள் தமிழ்த் துறைத் தலைவர்,
மதுரை காமராஜர் பல்கலைக்கழகம், மதுரை (இன்னாள் தமிழக
அரசின் செம்மொழித் திட்ட அமைப்பின் முக்கிய உறுப்பினர்)

நூலின் பெயர்:
செட்டிநாட்டு மண் வாசனைக் கதைகள் (முதல் தொகுதி)
பக்கங்கள்: 160
20 சிறுகதைகள் நூலில் உள்ளன.
விலை: Rs.75:00
பிரதிகள் சென்னையில் கிடைக்கும் இடங்கள்:

1.
உமா பதிப்பகம்
18/171, பவளக்காரத் தெரு
மண்ணடி
சென்னை - 600 001
தொலைபேசி எண்: 25215363

2.
குமரன் பதிப்பகம்
19, கண்ணதாசன் சாலை
தி.நகர்
சென்னை - 600 017
தொலைபேசி எண்: 24353742

3
விஜயா பதிப்பகம்
20, ராஜ வீதி
கோயமுத்தூர் - 641 009
தொலைபேசி எண்;2394614

வெளியிட்ட அன்று காரைக்குடியில் 500 பிரதிகளும், பிறகு கோவையில்
400 பிரதிகளும் விற்று விட்டன. தற்சமயம் குறைந்த அளவு பிரதிகளே
உள்ளன. வேண்டுபவர்கள் முந்திக் கொள்ளவும்.

புத்தகத்தைப் பற்றிய உங்களுடைய விமர்சனம் வரவேற்கப் படுகிறது.
உங்களுடைய விமர்சனத்தை உங்களுடைய வலைகளில் ஏற்றிவிட்டுச்
சுட்டியையும் நீங்கள் கொடுக்கலாம். அல்லது விமர்சனத்தை எனது
மின்னஞ்சல் முகவரிக்கு அனுப்பினால், அது என்னுடைய வலைப்
பதிவுகளிலும் வெளியிடப்படும்.

யாருடைய விமர்சனம் முதலில் வருகிறது என்று அறிந்து கொள்ள
ஆவலாக உள்ளேன்!

அன்புடன்
வகுப்பறை வாத்தியார்

வாழ்க வளமுடன்!

உயர்ந்த கோவிலில் ஒப்பற்ற விழா!

உயர்ந்த கோவிலில் ஒப்பற்ற விழா!

இராமேசுவரம் அருள்மிகு இராமநாதசுவாமி திருக்கோவிலின் திருக்குட
நன்னீராட்டுப் பெருவிழா நாளை 1.7.2009 புதன் கிழமை காலை
9:30 முதல் 10:30 மணிக்குள் நடைபெறவுள்ளது.

திருக்கோவில் நிர்வாகத்தினரிடமிருந்து அடியவனுக்கு வந்த
அழைப்பிதழை உங்களுக்கும் உரிய அழைப்பிதழாகக் கீழே
கொடுத்துள்ளேன்.

“கோடி மாதவங்கள் செய்து குன்றினார் தம்மையெல்லாம்
வீடவே சக்கரத்தால் எறிந்து பின் அன்பு கொண்டு
தேடிமால் செய்த கோயில் திரு இராமேச்சுரத்தை
நாடி வாழ் நெஞ்சமே நீ நன்னெறியாகுமன்றே”

என்று அப்பர் சுவாமி அவர்களால் பாடப்பெற்ற அற்புதமான
திருத்தலம் அது!

ஸ்ரீ ராமபிரான் ஈஸ்வரனை சிவலிங்க வடிவில் பிரதிஷ்டை செய்தார்
என்பதாலும், சைவம், வைணவ மதத்தினர்களும் வந்துகூடி வழிபடுவதாலும்
இந்தியாவில் உள்ள இந்து ஆலயங்களில் இராமேசுவரம் முக்கியமான
தலமாகத் திகழ்கிறது. இந்தக் கோவிலில் அமைந்துள்ள 22 புண்ணிய
தீர்த்தங்களில் நீராடுவதால் உடலும் உள்ளமும் தூய்மை அடையும்

அதோடு தோஷங்களுக்குச் அது சிறந்த பரிகார ஸ்தலமாகும்.
ஆகவே விருப்பமுள்ளவர்கள் சென்று வாருங்கள்.
நாளைக்கே செல்ல வேண்டும் என்பதில்லை. ஒரு மண்டலத்திற்குள்
அதாவது 48 நாட்களுக்குள் நேரம் கிடைக்கும்போது எப்போது வேண்டு
மென்றாலும் சென்று வரலாம்.

தோஷம் என்றால் என்னவென்று கேட்பவர்களும், தோஷத்தின் மீது
நம்பிக்கை இல்லாதவர்களும், வழக்கம்போல மாநகராட்சி
அல்லது நகராட்சி குழாய்த் தண்ணீரிலேயே நீராடி மகிழலாம்.
என்னிடம் வந்து இது சம்பந்தமாகக் கேள்வி கேட்டுப் பிறாண்ட வேண்டாம்

இது இறை நம்பிக்கை உள்ளவர்களுக்கான பதிவு.
அதை மனதில் வையுங்கள்!


படத்தின் மீது கர்சரை வைத்து அமுக்கினால் படம் பெரிதாகத் தெரியும்!
+++++++++++++++++++++++++++++++++++++
48 நாட்கள் சுவாமியை வணங்குவது ஏன்?

எந்த தெய்வத்தின் பூஜிப்பதாக இருந்தாலும் அதனைத் தொடர்ந்து
ஒரு மண்டலம் (48 நாட்கள்) பூஜிக்க வேண்டும்.
இதற்கான காரணம் தெரியுமா? சூரியன் முதல் கேது வரை நவக்கிரகங்கள்
ஒன்பதாகும். மேஷம் முதல் மீனம் வரை ராசி மண்டலம் பன்னிரண்டாகும்.
அசுவதி முதல் ரேவதி வரை நட்சத்திர மண்டலம் 27 ஆகும்.
இந்த மூன்று மண்டலங்களின் கூட்டுத்தொகையான 48ஐ வழிபாட்டில்
ஒரு மண்டலம் என்று வகுத்துள்ளனர்.

9 planets + 12 rasis + 27 stars = 48

ஒருவருக்கு ஒரு செயல் நடைபெற கிரகங்களும், ராசிநாதர்களும்,
நட்சத்திர தேவதைகளும் துணை செய்ய வேண்டும் என்று கருதியே
மண்டல வழிபாடு ஏற்படுத்தப் பட்டுள்ளது.

குறிப்பிட்ட நோக்கத்தை மனதில் கொண்டு அந்நோக்கம் நிறைவேறுவதற்காக
ஒரு மண்டலம் தொடர்ந்து பூஜிப்பது மரபு. இந்நாட்களில், எந்த தெய்வத்தை
வழிபடுகிறோமோ அந்த தெய்வத்தின் கோயிலுக்குச் செல்லுதல்,
அந்த தெய்வத்திற்குரிய மூலமந்திரங்களை உச்சாடனம் செய்தல்,
மந்திரம் சொல்ல முடியாதவர்கள் அந்த தெய்வத்திற்குரிய எளிய
துதிப்பாடல்கள், கவசங்களைப் பாராயணம் செய்தல், சகஸ்ர நாமங்களை
ஜபித்தல், புஷ்பத்தால் அர்ச்சித்தல், தீபமிடுதல் போன்ற எளிய விதங்களில்,
நம் சக்திக்கு எவ்வழிபாட்டுமுறைகள் இயன்றதோ அம்முறையில் வழிபாடு
செய்தல் போதுமானது. ஒருமுகப்பட்ட மனதுடன் ஒருமண்டலம் செய்து
வரும் பிரார்த்தனைகள் நிச்சயம் நிறைவேறி வருவதை அனுபவத்தில்
உணரலாம். மண்டல வழிபாடு செய்வது என்பது மிகவும் மகத்தானது.
ஆனால், மண்டலவழிபாடு இடையில் நிறுத்தாமல் தொடர்ந்து செய்யப்பட
வேண்டும். ஒரு செயலில் முழுமையான வெற்றியை வேண்டுவோர் தமக்கு
விருப்பமான இஷ்டதேவதையை முன்னிறுத்தி தொடர்ந்து 48 நாட்கள்
பூஜித்து வர நிச்சயம் வெற்றி பெறுவது உறுதி.

(48 நாட்களைப் பற்றிய விளக்கக் கட்டுரை: நன்றி’ தினமலர்’)
+++++++++++++++++++++++++++++++++++++++++++++++

நன்றி, வணக்கத்துடன்
வகுப்பறை வாத்தியார்

வாழ்க வளமுடன்!

ஓம்கார் ஸ்வாமிஜி அவர்களுக்காக ஒரு பதிவு!

ஓம்கார் ஸ்வாமிஜி அவர்களுக்காக ஒரு பதிவு!

இதற்கு முந்தைய பதிவில் மதிப்பிற்குரிய நமது ஸ்வாமிஜி அவர்கள்
இட்ட பின்னூட்டத்தைக் கீழே கொடுத்துள்ளேன்.
அந்த பின்னூட்டத்திற்குப் பதில் சொல்லும் முகமாக இந்தப் பதிவு

////////Blogger ஸ்வாமி ஓம்கார் said...
திரு சுப்பையா வாத்தியார் அவர்களுக்கு,
ஓரை - ஹோரா எனும் இந்த தகவல் பயனுள்ளது என்றாலும்,
அட்டவணையை கொடுத்து அதை பயன்படுத்து என சொல்லுவது
சரியான வழிகாட்டுதலா?
கேள்விகள்
---------
1)ஏன் ஞாயிறு 6 முதல் 7 வரை சூரியன் ஹோரையாக இருக்கிறது?
7 முதல் 8 வரை ஏன் சுக்கிரன் ஹோரையாக வருகிறது? சுக்கிரனுக்கு
பதில் வேறு கிரகம் வரக்கூடாதா?
2)ஏன் 7 கிரகங்கள் மட்டுமே பயன்படுத்தப்படுகிறது?
ராகு கேது ஏன் இல்லை? நவக்கிரங்கள் தானே?
சப்த கிரகங்கள் பயன்படுத்தியதன் நோக்கம் என்ன?
3)நேரங்கள் சூரிய உதயத்திற்கு தக்க மாறுமா?
போன்ற கேள்விகளுக்கு விளக்கத்துடன் இத்தகவல்களை
வெளியிட்டால் நல்லது. இல்லை என்றால் இதை விட மூட நம்பிக்கை
வேறு எதுவும் இல்லை என்ற நிலை எதிர்காலத்தில் வரும்.
உங்கள் பாணியில் விளக்குவீர்கள் என காத்திருக்கிறோம்...///////
===================================================

நன்றி ஸ்வாமிஜி; இந்த எளியவனின் பதில்:
(விளக்கங்கள் சரிதானா என்பதை நீங்கள்தான் சொல்ல வேண்டும்)
++++++++++++++++++++++++++++++++
நல்ல காரியங்கள் வெற்றிபெற வேண்டும்.
அதுதான் அதைச் செய்பவர்களுக்கு நல்லது
ஆகவே அவற்றைக் காலமறிந்து செய்யுங்கள் என்றார்கள்
நம் முன்னோர்கள்
சொன்னதோடு நிற்காமல் அதற்கான வழியையும்
சொல்லிவிட்டுச் சென்றார்கள்.
அதுதான் ஓரை அல்லது ஓரை நேரம்.

சுப ஓரைகளில் செய்யப்படும் செயல்கள் வெற்றிபெறும்
என்பது அவர்களின் வாக்கு!
ஆகவே செய்யும் நல்ல செயல்களை ஓரை பார்த்துச் செய்யுங்கள்.
வெற்றி நிச்சயம்!

ஓரை என்பது சூரிய உதயத்தில் இருந்து கணக்கிடப்படுகிறது.
ஒரு நாளின் கிழமை அதன் அதிபதியின் முதல் ஓரையாக
கொள்ளப்படுகிறது. உதாரணமாக ஞாயிறு காலை முதல் ஒரு மணி
நேரம் (6-7 மணி) சூரியனின் ஓரை.

இதையடுத்து 7-8 மணி வரை சுக்கிரன் ஓரை,
8-9 மணி வரை புதன் ஓரை,
9-10 வரை சந்திரன் ஓரை,
10-11 வரை சனி ஓரை,
11-12 மணி வரை குரு ஓரை,
12-1 மணி வரை செவ்வாய் ஓரை.
இதையடுத்து மீண்டும் சூரியன் ஓரை துவங்கும்.

இதேபோல் செவ்வாய்க்கிழமை என்றால்
அன்று காலை 6 முதல் 7 மணி வரை செவ்வாய் ஒரை,
புதன் கிழமை என்றால் காலை 6-7 மணி வரை புதன் ஓரை,
அதன் பின் ஒவ்வொரு மணி நேரமும் மேலே கூறப்பட்டுள்ள
வரிசைப்படி ஓரை கணக்கிடப்படுகிறது.

பொதுவாக காலை 6 மணி என்பதனை சராசரி சூரிய உதய
நேரமாகக் கொண்டுதான் ஓரைகள் கணக்கிடப்படுகின்றன.

சரியான சூரிய உதயத்தை வைத்துக் கணக்கிட்டால் பலன்கள்
இன்னும் சூப்பராக இருக்கும்.

அதற்கு சூரிய உதயம் பற்றிய விவரம் தேவை; உங்களுக்காக
சூரிய உதய அட்டவணையையும் கீழே கொடுத்துள்ளேன்.

+++++++++++++++++++++++++++++++++++++


+++++++++++++++++++++++++++++++++++++++++++
ஏழு கிரகங்களுக்கு மட்டுமே ஓரை உண்டு.
ராகு, கேது சாயா கிரகங்கள் என்பதாலும்,
அவற்றிற்கு சுற்றுப்பாதை இல்லாத காரணத்தாலும்
அவற்றிற்கு ஓரை கிடையாது

ஓரைகளை யார் உருவாக்கினார்கள் என்று கேள்வி கேட்காதீர்கள்.
அவைகள் ரிஷிகளால் உருவாக்கப்பட்டவை
அதோடு கேள்விகளுக்கு அப்பாற்பட்டவை.
பிடித்திருந்தால், ஒப்புதல் இருந்தால் கடைப்பிடியுங்கள்
இல்லாவிட்டால் கடாசி விட்டு நடையைக் கட்டுங்கள்.
அதனால் வேறு யாருக்கும் நஷ்டமில்லை!

பூமத்திய ரேகை, தீர்க்க ரேகை ஆகியவற்றை நமது முன்னோர்கள்
எப்படி உருவாக்கினார்களோ அதேபோல்தான் ஓரைகளும்
உருவாக்கப்பட்டன.

சூரியனின் சுற்றுப்பாதை, சூரியனுக்கு அருகில் இருக்கக் கூடிய கிரகங்கள்,
தொலைவில் இருக்கக் கூடிய கிரகங்கள், அதனுடைய ஈர்ப்பு சக்தி,
அதன் ஒளிக்கற்றைகள் பூமியை அடைவதற்கு எடுத்துக் கொள்ளப்படுவதற்கான
கால நேரம் இதை எல்லாம் அடிப்படையாக வைத்துதான் நமது முன்னோர்கள்
ஓரைகளை கணக்கிட்டுள்ளனர்.

சூரியன் மற்றும் அதன் அருகே அல்லது தொலைவில் உள்ள கிரகங்களின்
அமைப்பைக் கொண்டு வானவியல் அறிஞர்கள் ஓரைகளை உருவாக்கினர்.
இதன்படி வாரத்தின் முதல் நாளான ஞாயிறன்று முதல் ஓரையை சூரியனுக்கு
அளித்தனர்.

சூரியனுக்கு அருகிலேயே சுக்கிரன், புதன் ஆகிய கிரகங்கள் உள்ளன.
இவற்றில் சூரியனுக்கு மிக அருகில் புதன் இருப்பதாலும்,
அது காற்று (வாயு) கிரகம் என்பதாலும் (ஓரை வரிசையில்)
அதற்கு 2வது இடம் வழங்கினர்.

இதையடுத்து 3வது இடம் சுக்கிரனுக்கு,
4வது இடம் சந்திரனுக்கும்,
5வது இடம் சனிக்கும்,
6வது இடம் குருவுக்கும்,
7வது இடம் செவ்வாய்க்கும் வழங்கினர்.
இதற்கு சுற்றுப்பாதை, கிரகங்களின் கதிர் வீச்சுதான் காரணம்.

இவற்றில் சுக்கிரன் ஓரை, புதன் ஓரை, குரு ஓரை ஆகிய மூன்றும்
நல்ல ஓரைகள் எனப்படுகிறது.

வளர்பிறை காலத்தில் சந்திரன் ஓரையும் நல்ல ஓரையாகவே
கருதப்படுகிறது. இந்த ஓரைகளில் திருமணம், சீமந்தம்,
குழந்தைகளுக்கு மொட்டையடித்து காது குத்துதல், பெண் பார்ப்பது,
பதவியேற்பது, வேலைக்கு விண்ணப்பிப்பது, வங்கி கணக்கு துவங்குதல்
ஆகியற்றைச் செய்யலாம்.

இதில் சனி ஓரை ஒரு சில விடயங்களுக்கு நன்றான பலனைத் தரும்.
கடனை அடைப்பதற்கு ஏற்ற ஓரையாக சனி ஓரை கருதப்படுகிறது.
உதாரணமாக சனி ஓரையில் ஒருவர் தனது கடனை அடைத்தால்,
அவர் மீண்டும் கடன் வாங்குவதற்கான சூழல் ஏற்படாது
என ஜோதிட நூல்கள் கூறுகின்றன.

இதேபோல் பழைய பாக்கி/கணக்குகளை தீர்ப்பது,
ஊழ்வினை (பூர்வ ஜென்மப் பாவம்) தீர்ப்பது,
நடைபயணம் துவங்குவது, மரக்கன்று நடுதல்,
விருட்சங்கள் அமைத்தல், அணைக்கட்டு நிர்மாணிக்கும்
பணிகளை துவக்குவது போன்றவற்றிற்கு சனி ஓரை சிறப்பானது.

சூரியன் ஓரையில் அரசு சம்பந்தப்பட்ட காரியங்கள்,
வழக்கு தொடர்பான விடயங்கள் மேற்கொள்ள சிறப்பானதாக இருக்கும்.

நிலம் வாங்குவது, விற்பது, அக்ரிமென்ட் போடுவது,
சகோதர/பங்காளி பிரச்சனைகள், சொத்து பிரித்தல்,
உயில் எழுதுவது, ரத்த தானம், உறுப்பு தானம்,
மருத்துவ உதவிகள் செய்வது இவற்றையெல்லாம்
செவ்வாய் ஓரை மேற்கொள்ளலாம்.
இந்த ஓரையில் ஆயுதப் பிரயோகத்தை துவங்கினால்
சக்தி வாய்ந்ததாக இருக்கும். (Starting a war)

வளைகுடா போர் கூட செவ்வாய் ஓரையில்தான் துவங்கப்பட்டது.
செவ்வாய் அழிவுக்கு உரிய கிரகம் என்பதாலும்,
அதிகாரத்தை பிரயோகம் செய்து ஒன்றை கட்டுக்குள்
கொண்டு வரக் கூடியது செவ்வாய் என்பதாலும்,
வளைகுடாப் போர் நீண்ட காலம் நீடித்தது.
இதன் காரணமாக பெரிய அழிவு ஏற்பட்டதற்கும் செவ்வாய்தான் காரணம்.

மனித வாழ்வில் ஓரைகளின் பங்களிப்பு முக்கியமானது.
நம்மை அறியாமலேயே ஓரைகளின் கதிர்வீச்சை உணர முடியும்.
அதை உணர்ந்து நடந்தால் நலம் பெறுவீர்கள்.
அதோடு அடியேன் மாய்ந்து மாய்ந்து பாடம் நடத்துவதின் நோக்கமும்
நிறைவேறும்:-)))

நன்றி, வணக்கத்துடன்
வகுப்பறை வாத்தியார்

வாழ்க வளமுடன்!