Astrology உங்களுக்குப் பொருத்தமானவரைத்தான் காதலிக்கிறீர்களா? பகுதி இரண்டு!

++++++++++++++++++++++++++++++++++++++++++++++++
Astrology உங்களுக்குப் பொருத்தமானவரைத்தான் காதலிக்கிறீர்களா? பகுதி இரண்டு!

இதன் முதல் பகுதி சென்ற வாரம் திங்களன்று வந்தது. அதைப் படித்தீர்களா? படித்திராதவர்களுக்காக அதன் சுட்டியைக் கீழே கொடுத்துள்ளேன்.

முதல் பகுதிக்கான சுட்டி (URL):

காதல் என்று இல்லை. மணமாகி வாழும் அத்தனை தம்பதியருக்கும் முக்கியமாக வேண்டியது மனப் பொருத்தம். ஒருவரின்மேல் மற்றவருக்கு இயற்கையாக உண்டாகக் கூடிய ஈர்ப்பு. ஒருவர் மற்றவருக்காக உருகக்கூடிய நேசம். மாறாத அன்பு. எந்த சூழ்நிலையிலும் விட்டுக்கொடுக்காத தன்மை. இப்படி சொல்லிக்கொண்டே போகலாம்.

அதெல்லாம் அனைவருக்கும் கிடைக்குமா?

எப்படிக் கிடைக்கும்?

கிடைக்கலாம். அல்லது கிடைக்காமலும் போகலாம்.

அதுதான் வாங்கிவந்த வரம்!

கவியரசர் தன் பாடல் வரிகளில் அசத்தலாகச் சொன்னதைப்போல “மனைவி அமைவதெல்லாம் இறைவன் கொடுத்த வரம்!” அதுபோல பெண்களுக்குக் கணவன் அமைவதும் இறைவன் கொடுத்த வரமே!

சரி, நாம் எதிர்பார்த்தபடி அப்படி அமையாவிட்டால் என்ன செய்வது?

சரிபண்ணிக்கொண்டு போக வேண்டும்!!

எல்லோரும் சரி பண்ணிக்கொண்டு போக முடியுமா?

சிலருக்குத்தான் அது சாத்தியப்படும்!

ஏன்?

அதுவும் வாங்கி வந்த வரம்தான்!

ஜாதகத்தை வைத்து அது தெரியுமா?

தெரியும்!

அதனால்தான் அனுபவம் உள்ள ‘பெரிசுகள்’ ஜாதகம் பார்த்துத் திருமணம் செய்ய வேண்டும் என்பார்கள்.

ஒருவருக்காக மற்றவர் (Made for each other) என்று ஜோடிகள் அமைவது பொதுவாக விளம்பரம், மற்றும் திரைப்படங்களில் மட்டும்தான்.

வாழ்க்கையில் 90% அப்படி அமையாது.

சிந்துபைரவி படம் பார்த்தீர்கள் அல்லவா? அப்படித்தான் இருக்கும். கணவன் பெரிய சங்கீத மேதையாக இருப்பான். சரளி வரிசைகூட தெரியாத பெண்ணாக மனைவி இருப்பாள். கணவன் பெரிய சாப்பாட்டு இரசிகனாக இருப்பான். மனைவி ரசம்கூட வைக்கத் தெரியாத அல்லது சோம்பேறித்தனம் மிகுந்த பெண்ணாக இருப்பாள்

கணவன் ரயில் என்றால் மனைவி தண்டவாளமாக இருப்பாள். மனைவி ரயில் என்றால் கணவன் தண்டவாளமாக இருப்பான். ஜோடிகள் அப்படித்தான் அமையும். இறைவன் அப்படித்தான் ஜோடி சேர்ப்பான். இரண்டு ரயில்களை ஒருபோதும் அவன் ஜோடியாகச் சேர்ப்பதில்லை.

தோற்றம், கல்வி, அறிவு, திறமை, சாமர்த்தியம், குணம், அதிர்ஷ்டம் என்று எத்தனையோ தேவைகள் மனிதனுக்கு இருந்தாலும், முக்கியமாக இருக்க வேண்டியது அல்லது கிடைக்க வேண்டியது நல்ல குணம். எதையும் தாங்கும் இதயம். எதையும் புன்முகத்தோடு ஏற்றுக்கொள்ளும் மனம். உங்கள் மொழியில் சொன்னால் Take it easy policy

பொருத்தமான நட்சத்திரம், பொருத்தமான ராசி பார்த்து திருமணம் செய்துகொள்ளும் தம்பதிகளுக்கு அது ஓரளவிற்குக் கிடைக்கும்.

ஏன் ஓரளவு என்று ஓரம் கட்டுகிறீர்கள்?

நட்சத்திரம், ராசி தவிர ஏழாம் வீடு, இரண்டாம் வீடு, மற்றும் லக்கினம் சிறப்பாக உள்ளவர்களுக்கு முழுதாகவே கிடைக்கும்.

நீங்கள் சொல்வது திருமணத்திற்கு சரிதான். காதலுக்கு என்ன செய்வது?

காதலிப்பது என்று முடிவு செய்துவிட்டால், பெளலரிடம் - அதுதாங்க உங்களுடைய காதலனிடம், அவனுடைய பிறந்த தேதியையும், நட்சத்திரத்தையும் தெரிந்து கொள்ளுங்கள்.

கேட்டால், அதைச் சொல்வான். சொல்லாவிட்டால் வீட்டில் பார்த்துவிட்டு வந்து அல்லது பெற்ற புண்ணியவதியிடம் கேட்டு வந்து சொல்லச் சொல்லுங்கள்.

அதற்குப் பிறகு என்ன செய்ய வேண்டும்?

அதைக் கீழே எழுதியுள்ளேன்
++++++++++++++++++++++++++++++++++++++
ஒன்றுக்கொன்று பொருந்தாத நட்சத்திரங்களை குழுமப்படுத்திக் கொடுத்துள்ளேன். ஒரு குழுவில் உள்ள நட்சத்திரங்கள் ஒன்றுக்கொன்று பொருந்தாது. அடுத்த குழுவில் உள்ள மற்ற நட்சத்திரங்கள் இவற்றிற்குப் பொருந்தும்

குழு ஒன்று:
அவிட்டம், மிருகசீர்சம், சித்திரை. (செவ்வாயின் நட்சத்திரங்கள்)

குழு இரண்டு:
ரோகிணி, ஹஸ்தம், திருவோணம் (சந்திரனின் நட்சத்திரங்கள்)
திருவாதிரை, சுவாதி, சதயம் (ராகுவின் நட்சத்திரங்கள்)

குழு மூன்று:
கார்த்திகை, உத்திரம், உத்திராடம் (சூரியனின் நட்சத்திரங்கள்)
புனர்பூசம், விசாகம், பூரட்டாதி (குருவின் நட்சத்திரங்கள்)

குழு நான்கு:
பரணி, பூரம், பூராடம் (சுக்கிரனின் நட்சத்திரங்கள்)
பூசம், அனுஷம், உத்திரட்டாதி (சனியின் நட்சத்திரங்கள்)

குழு ஐந்து:
அஸ்வினி, மகம், மூலம் (கேதுவின் நட்சத்திரங்கள்)
ஆயில்யம், கேட்டை, ரேவதி (புதனின் நட்சத்திரங்கள்)
-------------------------------------------------------------------------
அடுத்து என்ன?

நட்சத்திரத்தை வைத்து சந்திர ராசி தெரியுமல்லவா?

ஒவ்வொரு சந்திர ராசிக்கும் அதன் எட்டாவது ராசி பொருந்தாது!

உதரணத்திற்கு மகரத்திற்கு சிம்மம் எட்டாவது ராசி.

என்னசார் வறுக்கிறீர்களே? குறுக்கு வழி இல்லையா?

இருக்கிறது!

என்னவென்று சொல்லுங்கள்!

ஒரு வரி பதில் அது! பயன் உள்ளது அது!

இங்கே சொல்ல முடியாது. தேவைப்படுபவர்கள் மின்னஞ்சலில் கேளுங்கள். வெட்டு & ஒட்டு முறையில் உங்கள் அனைவருக்கும் உடனடியாக அது அனுப்பிவைக்கப்படும். வாத்தி (யாரின்) மின்னஞ்சல் முகவரி: classroom2007@gmail.com
---------------------------------------------------------------------------
அடுத்த பாடம் நாளை!

அன்புடன்
வாத்தியார்


வாழ்க வளமுடன்!