குருவிற்கு ஒரு கோவில்!

++++++++++++++++++++++++++++++++++++++++++++++++
குருவிற்கு ஒரு கோவில்!

நவக்கிரக ஸ்தலங்கள்: ஆலங்குடி!
குரு பகவானுக்கான ஸ்தலம் இது

எல்லா நவக்கிரக ஸ்தலங்களிலும் அம்பிகை உடனமர்ந்த சிவபெருமானுக் குத்தான் முக்கிய சந்நதி. அவர்கள் இல்லாமல் கிரகங்கள் ஏது? இவ்வுலகம்தான் ஏது? அதை மனதில் கொள்க!

ஆலங்குடியில் உறையும் சிவனாருக்கு ‘ஆபத்சகாயர்’ என்று பெயர். ஆலகால விஷத்தை உண்டு, தேவர்களைக் காத்த சிவனார், இங்கே குடிகொண்டுள்ளதால் இத்திருத்தலத்திற்கு ஆலங்குடி என்று பெயர்.

இங்கே உறையும் கணபதிக்கு ‘கலங்காமல் காத்த விநாயகர்’ என்று பெயர். ’கஜமுஹாசூரன்’ என்னும் அரக்கனை அழித்து, தேவர்களுக்கு உதவியதால், அவருக்கு அப்பெயர் உள்ளது! அம்பிகை தன்னுடைய ஒரு அவதாரத்தில், இத்தலத்தில் கடும் தவமிருந்து, சிவபெருமானை மணந்து கொண்டதால், இத்தலத்திற்குத் ‘திருமணமங்கலம்’ என்னும் பெயரும் உண்டு!

திருமால், பிரம்மா, லக்ஷ்மி தேவி, கருடன், விஸ்வாமித்திரர், அஷ்டதிக்குப் பாலகர்கள், அய்யனார், வீரபத்திரர், முசுகுந்த சக்கரவர்த்தி, சுந்தரமூர்த்தி நாயனார் ஆகியோர் வழிப்பட்ட பெருமையை உடையது இத்தலம்.

ஒருமுறை அருகில் உள்ள வெட்டாற்றில் வெள்ளப் பிரவாகம் எடுத்தபோது, மறுகரையில் இருந்த சுந்தரரை, இக்கரைக்கு, ஒரு படகோட்டியாகச் சென்று, கூட்டிக்கொண்டு வந்தது சிவனார் என்ற வரலாறும் உண்டு. இத்தலத்தில் உறையும் தட்சிணாமூர்த்தியிடம்தான் சுந்தரர் ஞானஉபதேசம் பெற்றார்
என்பதும் வரலாறு!
____________________________________________________
நவக்கிரகங்களில் குரு பகவானுக்கான ஸ்தலம் இது. ஜாதகத்தில் குரு நீசம் பெற்றிருந்தாலும் அல்லது 6, 8 12ஆம் இடம் போன்ற மறைவிடங்களில் இருந்தாலும் அல்லது குரு திசை நடைபெற்றாலும், நன்மை பெற வேண்டி, ஜாதகன் வழிபட வேண்டிய ஸ்தலம் இது!

கும்பகோணத்தில் இருந்து 17 கிலோமீட்டர் தொலைவில் உள்ளது இத்தலம். இங்கே உறையும் குரு பகவானுக்கு தட்சிணாமூர்த்தி என்னும் பெயரும் உண்டு. திருவாரூரில் இருந்து 35 கிலோமீட்டர் தூரத்தில் ஆலங்குடி உள்ளது. திருவாரூரில் ரயில் நிலையம் உள்ளது. திருவாரூரில் இருந்து ஆலங்குடிக்கு நிறையப் பேருந்துகள் உள்ளன! கும்பகோணத்தில் இருந்தும் நிறையப் பேருந்துகள் உள்ளன!

குரு என்னும் வடமொழிச்சொல் இருளைப் போக்குபவர் என்று பொருள்படும். அறியாமை என்னும் இருளைப்போக்கி அறிவைக்கொடுக்கும் ஆசானுக்கு அதனால்தான் குரு என்று பெயர். அதைபோல வாழ்க்கையில் உள்ள துன்பம் என்னும் இருளைப்போக்கி, மகிழ்ச்சி என்னும் ஒளியைக் கொடுப்பவர் குரு பகவான்.

செல்வம், புகழ், குழந்தைபாக்கியம் ஆகியவற்றிக்குக் காரகன் குருபகவான். இத்தலத்திற்கு 24 முறைகள் சென்று (அப்பா, ஸ்வாமி 24 முறைகளா?) ஒவ்வொருமுறையும் 24 நெய் தீபங்கள் ஏற்றி வழிபட்டு வந்தால், குருவால் ஏற்பட்டுள்ள தோஷங்கள் அனைத்தும் நீங்கும் என்பது நம்பிக்கை!

தனுசு, மற்றும் மீன ராசிக்காரர்களுக்கும், லக்கினக்காரர்களுக்கும் அதிபதி குருபகவான், அவர்கள் நேரம் கிடைக்கும்போது சென்று வருவது நலம் பயக்கும்!

எல்லா வியாழக்கிழமைகளிலும், அமாவாசை, மற்றும் பெளர்ணமி தினங்களிலும், புனர்பூசம், விசாகம், பூரட்டாதி போன்ற குருபகவானின் நட்சத்திர நாட்களிலும் இங்கே விசேஷ பூஜைகள் உணடு. அதுதவிர தினசரி பூஜைகளும் உண்டு. குரு ஹோரையில் அவரை வழிபடுவது சிறப்பைக்கொடுக்கும்!

சகஸ்ரநாம அர்ச்சனைகள், குரு ஹோமம், பாலாபிஷேகம் ஆகியவை ஜாதக தோஷங்களை நீக்கும். அவரவர் சக்திக்கு ஏற்ப வழிபட்டுவிட்டு வரலாம்.

மஞ்சள் வஸ்திரம், முல்லை மலர்கள், கொண்டக்கடலை ஆகியவை குரு பகவானுக்கு உரிய நிவேதனப் பொருட்களாகும். சர்க்கரைப் பொங்கலும் நிவேதனப் பொருளாகும்!

வடமொழியில் ‘கு’ என்றால் இருள் என்றும் ‘ரு’ என்றால் நீக்குபவர் என்றும் பொருள்படும். வடமொழி தெரிந்தவர்கள் இதை உறுதிப்படுத்தலாம்!

அப்பர், சுந்தரர், திருஞானசம்பந்தர் ஆகிய நாயன்மார்களால் பாடப்பெற்ற பெருமை வாய்ந்த்து இத்தலம்.

குருப் பெயர்ச்சி தினங்களில் 1008 சங்குகளை வைத்து, இங்கே அபிஷேகம் நடைபெறும். சித்திரை மாதம் பெளர்ணமி திதியன்று நடைபெறும் தேர்த்திருவிழா மிகவும் சிறப்பு உடையதாகும்! அதுபோல தைப்பூச தினத்திலும், பங்குனி உத்திர தினத்திலும் நடைபெறும் விழாக்கள் மிகவும் சிறப்புடையதாகும்!

கோவிலிம் சுற்றுப் பகுதியில் 15 தீர்த்தங்கள் (குளங்கள்) உள்ளன. அவற்றில் ’அம்ரித புஷ்கரணி’ என்னும் தீர்த்தம் மிகவும் புகழ்பெற்றதாகும். அது கோவிலின் உட்பகுதியில் உள்ளது.

விக்கிரமசோழன் காலத்துக் (1131ஆம் ஆண்டு) கல்வெட்டு கோவிலில் உள்ளது இக்கோவிலின் தொன்மையைக் குறிக்கும்!

அனைவரும் ஒருமுறை சென்று வாருங்கள். குரு பகவானின் அருளைப் பெற்று வாருங்கள்!

அன்புடன்
வாத்தியார்
வாழ்க வளமுடன்!