பல பெண்களுடன் சுத்துகிறவன் யார்?

 ++++++++++++++++++++++++++++++++++++++++++++++++++++++
 பல பெண்களுடன் சுத்துகிறவன் யார்?

இன்றைய வாரமலரை நம் வகுப்பறையின் மூத்த மாணவர்களில் ஒருவரின் இரண்டு ஆக்கங்கள் அலங்கரிக் கின்றன. படித்து மகிழுங்கள்
அன்புடன்
வாத்தியார்
++++++++++++++++++++++++++++++++++++++++++++++++++++++++
1
பல பெண்களுடன் சுத்துகிறவன் யார்?
அப்பாவுக்கு சன்யாசிகளின் தொடர்பு அதிகம். 50 வயது ஆன பின்னர் திருக்கோயிலூர் ஞானாநந்த சுவாமிகள், வடகுமரை அப்பண்ண
சுவாமிகள், திருவண்ணாமலை யோகி ராம்சூரத் குமார் சுவாமிகள், புதுக்கோட்டை சாந்தாநந்த சுவாமிகள் ஆகியோரிடம் நல்ல அறிமுகம் ஏற்பட்டது. அடிக்கடி இவர்களைச் சந்திக்கச் செல்வார். அந்த சுவாமிகள் அனைவருக்கும் அப்பாவைப் பார்த்தவுடன் பெயர் சொல்லி அழைக்க கூடிய அளவுக்கு நெருக்கம்.அவர்கள் ஆசிரமத் தேவைகளுக்கும், விழாக்கால ஏற்பாடுகளிலும் அப்பாவை ஈடுபடுத்துவார்கள். அப்பாவும் உற்சாகமாக ஈடுபடுவார்.

ஒரு முறை அப்பா ஞானாநந்த சுவாமிகளை சந்தித்தபோது,"அவ்விடத்தில் திருவலத்து சுவாமிகளை இன்னும் தரிசிக்கவில்லை இல்லையா?"என்று கேட்டார்.

"ஆமாம் சுவாமி!"

"அப்போ ஒருதரம் அந்த சுவாமிகளைப் போய் பார்த்து ஆசி பெற்று வரவும்."

"உத்தரவு சுவாமி!"

ஞானான‌ந்தரின் உத்தரவுக்குக் கட்டுப்பட்டு அம்மாவையும் அழைத்துக் கொண்டு திருவலம் என்ற ஊருக்குச் சென்றார் அப்பா.  திருவலம்  வேலூருக்கு மிக அருகில் உள்ள சிற்றூர்.அங்குள்ள‌ அருள்மிகு வலந்தீஸ்வர சுவாமியைப் போற்றிப் பதிகம் பாடியுள்ளார் ஞான சம்பந்தர்.

இத் திருத்தலத்தில்தான் விநாயகரும், ஆறுமுகரும் மாங்கனிக்காக உலகை வலம் வரும் போட்டியில் ஈடுபட்டனராம். விநாயகர் அம்மை அப்பனை வலம் வந்து கனியைப்பெற்றுக்கொண்டதும்,ஆறுமுகர் உலகைச் சுற்றி வலம் வந்து, பின்னர் விநாயகரின் வெற்றியை அறிந்து கோபித்து, பழனிமலைஏறி ஆண்டிக்கோலம் கொண்ட தலவரலாறு கொண்ட தலம் திருவலம். இறைவனைத் தெய்வீகப் பிள்ளைகள் வலம் வந்ததால் ஊருக்கே திருவலம் என்று பெயர் வந்தது. அருள்மிகு வலந்தீஸ்வ‌ரசுவாமி கோவிலின் வாயிலின் அருகில் ஓர் திண்ணயையே தன் இருப்பிடமாகக் கொண்டு வாழ்ந்து வந்துள்ளார் மெளன சுவாமிகள்.ஒரு காலத்தில் காஷ்ட மெளனமாக சுவாமி இருந்துள்ளார்.அப்போது மக்கள் அவரை மெளனி என்று அழைத்துள்ளனர்.

அவர் பேசத்துவங்கியும் கூட அவருக்கு மெளனசுவாமி என்ற பெயரே நிலைத்துவிட்டது. சுவாமிகளுடைய வகுப்பு தேர் கட்டும் ஆசாரிகளின்
வகுப்பு என்பர்.விஸ்வ கர்ம  வகுப்பில்  பொற்கொல்லர்கள், மரத்தச்சர்கள், இரும்புக் கொல்லர்கள்,சிற்பி அல்லது ஸ்தபதி ஆகியோர் அடங்குவர். தேர் கட்டும் ஆகமவிதிகளில் நல்ல‌ பயிற்சியும் பட்டறிவும் உடையவர் சுவாமிகள். திருப்பதிபோன்ற பெரிய‌ கோவில்களுக்குக்கூட சுவாமிகள் தேர் அமைத்தார் என்று வாய் மொழிச்செய்தி உண்டு.தொழில் வழி வகுக்கப்பட்ட சமுதாய அமைப்பில் தன் தர்மத்தை யார் ஒருவன் சரியாகச் செய்கிறானோ, அதாவது கர்மாவைச் சரியாகச் செய்கிறானோ, அவ‌னுக்கு முக்தி நிச்சயம் என்பதும்,
இப்பிறப்பிலேயே இறைவனிடம் கலந்து உறவாடும் ஆனந்த நிலையில் மூழ்கித்திளைக்கலாம் என்பதற்கும் மெளன சுவாமிகள் நல்ல எடுத்துக்காட்டு.

நவீன படிப்பறிவு இல்லாதவர். வேத வேதாந்தங்கள் எதுவும் பாடசாலையில் கற்காதவர்.ஆயினும் இறை அனுபூதி கைவரப்பெற்ற மஹான்.அந்த ஊர் மக்களை குடிப்பழக்கம், புலால் இரண்டையும் தவிர்க்கச் சொல்லி
எல்லாக்குடும்பங்களிடமும் சத்தியம் பெற்று 100 சதவீதம் வெற்றி பெற்றவர். சத்தியத்தை யாராவது மீறியது தெரிந்தால்  கோவில் கோபுரத்தில் ஏறிக் குதித்து விடுவதாக அச்சம் கொடுத்துக் கூடப் பலரையும் திருத்திய வரலாறு சொல்வார்கள்.

முன்னர் கூறியது போல இந்த சுவாமிகளைப் தரிசிக்க அப்பாவும் அம்மாவும் சென்றார்கள்.ஒரு சாக்குத் துணியை மட்டும் கெளபீனமாக அணிந்து கொண்டு ஆனந்தமாக ஒரு குட்டித் திண்ணையில் அமர்ந்து இருந்துள்ளார் சுவாமிகள். மலஜலத்திற்குக்கூட அந்த இடத்தை விட்டு எழுந்து செல்லாதவர்.அவ‌ர் மலம் துடைத்துப் போட்ட கற்கள் அங்கேயே காணக்கிடக்கின்ற‌ன. முதல் பார்வைக் குப் பைத்தியத்தைப்போன்ற தோற்றம்.

அப்பாவைப் பார்த்து "யாரு?"என்று கேட்டுள்ளார்.அப்பா ஊர் பேரெல்லாம் சொல்லி அறிமுகப் படுத்திக் கொண்டுள்ளார்.பின்னர்,"திருக்கோயிலூர் சுவாமிகள் அனுப்பினார்" என்றவுடன் "ஆமா!அந்த சாமி கல்லையும் மண்ணையும் கட்டிக்கிட்டு அழுவுது. அதும் வேலையிலே நீ போய் குறுக்காட்டினா உன்ன 'இங்க‌ போ அங்க‌ போ'ன்னு விரட்டி உட்டுடும்.உனக்கு அந்த சாமிதான் சரி. அது விவரமா படிச்சசாமி. நாம சும்மா படிக்காத ஆளு.உன்னப் போன்ற‌ அய்யமாருக்கெல்லாம் உபதேசமெல்லாம் பண்ணத் தெரியாது இதுக்கு"

என்ன சொல்வது என்று தெரியாமல் அப்பா திகைத்து நிற்க, சுவாமிகள் மீண்டும் புதிராகப் பேசியுள்ளர்."ஒரு பொண்ணை மொறையா கலயாணம் கட்டி குடித்தனம் போட்டவன் பேரு என்ன?"

அப்பா:"கிரஹஸ்தன்".

சுவாமி: "அதுசரி! பல பொம்மனாட்டிக் கூட‌ சுத்தறவன் யாரய்யா? அவன் பேரு என்ன?" அப்பா மெளனம் சாதித்துள்ளார்.சுவாமிகள் "சும்மாச் சொல்லய்யா!" என்று கேட்டுள்ளார்.

அப்பா:"நான் அப்படிப்ப‌ட்ட எந்தத் தப்பும் செய்யவில்லையே" என்று கூறித் திகைத்துள்ளார்.

சுவாமிகள்: "அட!போமய்யா! படிச்ச அய்யரு! இதுகூடப் புரியலயா? ஒரு பொண்ணோடு வாழற மாதிரி ஒரு குருவோடதான் இருக்கணும். என்ன சரியா?"

இப்படி சம்பாஷணை நடந்து கொண்டு இருந்த போது, ஒரு பிரமுகர் மகிழ்வுந்தில் வந்து இற‌ங்குகிறார்.

பெரிய கூடையில் பழத்தைக் காரோட்டி எடுத்து வந்து சுவாமிகள் காலடியில் வைக்கிறார். பிரமுகரைப் பார்த்து, "என்னாடா?" என்கிறார் சுவாமிகள்.

"நீ சொன்ன மாதிரியே தேர்தல்ல செயிச்சுப்புட்டேன் சாமி. அதான் உனக்கு சொல்லிட்டுப் போகலாம்னு வந்தேன்"

"எங்கிட்ட ஏன்டா சொல்ற? உள்ளாற இருக்குப் பாரு சாமி, அதுகிட்டப் போய் சொல்லிட்டுப்போ"

பிரமுகர்:"அதான் பேசற சாமி நீ இருக்கச்சொல்ல பேசாத கல்லு சாமி கிட்ட‌ நான் ஏன் போவணும்?"

சுவாமிகள்:"என்னடா சொன்ன!?அது பேசாத கல்லு சாமியா?"

பிரமுகர்:"ஆமா!கல்லு சாமிதானே!?"

சுவாமிகளுடைய முகம் ரெளத்ரமாக மாறிவிட்டது.பிரமுகரைப் பார்த்து அங்கே கிடக்கும் கற்களைக் காட்டி கேட்கிறார்:"இந்தக் கல்லெல்லாம் என்னடா?"

"நீ தொடச்சிப்போட்ட கல்லு!"

"கோயிலுக்குள்ள இருக்கிற கல்லு என்னாடா?"

"நீ சாமின்னு சொல்ற பேசாத கல்லு"

"அதுசரி! இந்தக் கல்லெல்லாம் நீயடா!உள்ளாற இருக்கற கல்லு நானடா!"

பிரமுகரின் பழக்கூடையைக் காலால் எட்டித் தள்ளிவிட்டு சுவாமிகள் மெள‌னமாக முகம் திருப்பிக் கொண்டு படுத்துவிட்டாராம். நீண்ட நேரம் நின்று பார்த்துவிட்டு அப்பாவும் அம்மாவும் ஊர் திரும்பிவிட்டார்கள்.

"எந்தரோ மஹானு பாவலு அந்தரிக்கி வந்தனுமுலு" (சத்குரு தியாகராசரின் கீர்த்தனை)

பொருள்:"எத்தனை மஹான்களோ அத்தனை பேருக்கும் வணக்கம்"

ஆக்கம்: கே.முத்துராமகிருஷ்ணன் (KMRK), தஞ்சாவூர்
 +++++++++++++++++++++++++++++++++++++++++++++++++++++++++++
 2
"கல்யாண சமையல் சாதம்"
‍‍‍‍‍‍‍‍‍‍‍‍‍===========================
மாயாபஜார் என்று ஒரு படம். அதில் ரெங்க‌ராவ் நடித்து "ஹஹ்ஹஹ்ஹாஆ" என்று பாடிய"கல்யாணசமையல் சாதம் காய்கறிகளும் பிரமாதம்..."என்றபாட்டு மிகவும் பிரபலம்.

வாத்தியார் அடிக்கடி நம்மையெல்லாம் சமர்த்தாகப் பாடஙகளை மீள்பார்வை செய்யச் சொல்லிவிட்டுத் தான் மட்டும் தனியாகச் செட்டிநாட்டுக்குப் போய் க‌ல்யாண சாப்பாட்டை ஒரு வெட்டு வெட்டிவிட்டு கமுக்கமாய்ப் பாடஙகளைத் தொடர்வார்.என்னைப் போன்ற சாப்பாட்டு ரசிகர்கள்(சாப்பாட்டு ராமன்கள் என்று சொல்லிக் கொள்ளாமல் கெள‌ரவம் பார்க்கிறீர்களோ என்பார் டோக்கியோ)  கேட்டால் மட்டுமே மெனுவைச் சொல்வார்.

"பிராமணாஹா போஜனப் ப்ரியாஹா"என்பது வடமொழிச் சொல்லடை.பொருள் என்னவென்றால்,"பிராமணர்கள் சாப்பாட்டுப் பிரியர்கள்" என்பதாகும்.இந்த சொல்லடையை மஹாகவி பாரதியார் விமர்சித்தார். சாதி வித்தியாசம் பார்க்காத மஹாகவி இந்த ஒரு விஷயத்தில் தான் ஒரு பிராமணர் என்ற உணர்வைக் கொண்டாரோ என்று என் குயுக்தி மூளைக்குத் தோன்றும்.

அந்த சொல்லடையை மாற்றி"சர்வேஜனாஹா போஜனப்பிரியாஹா" என்பதே சரி என்று எழுதினார்.அதாவது எல்லா மக்களும் சாப்பாட்டுப் பிரியர்களே என்பது அவர் கருத்து.இருந்தாலும் அறுசுவை உணவு விதவிதமாக செய்து உண்பதில் அந்தணர்கள் முக்கியமானவர்களே.எல்லா ஊர்களிலும் ஒரு "மாமி மெஸ்" இருக்கும். மதுரை முனியாண்டிவிலாஸ் என்றபெயர் பயன் படுத்த முனியாண்டி கோவிலில் தொகை செலுத்தி அச்சாரம் வாங்க வேண்டும்.மாமி மெஸ் என்றபெயருக்குப் 'பேடன்ட்' எதுவும் இல்லை.

ஜனதா கட்சித்தலைவர் சுப்ரமனியம்சாமி போஃப‌ர்ஸ்,ஸ்பெக்ட்ரம், காமன் வெல்த் போன்ற‌ மெகா ஊழல் பற்றி விரிவாக‌ பேசும் அறிவு பெற்றவர்.அவ‌ரே நேரடியாக மதுரையில் "முருகன் இட்லி" கடைக்காகப் போராட்டம் நடத்தினார் என்றால் சாப்பாடு எவ்வளவு முக்கியம் பாருங்கள்.

வாத்தியார் செட்டிநாட்டு சமையல் மேஸ்திரிகளைச் சிலாகிப்பார்.ஒரு முறை தன் தந்தையார் மேற்பார்வை பார்த்த ஒரு திருமண விருந்தில் பொங்க‌லில் டின்டின்னாக நெய்யை ஊற்றிய அந்தண தலைமைச் சமையல் கலைஞரைப் பற்றியும் சிலாகித்தார்.பீம பாகம் என்பார்கள்.நள பாகம் என்பார்கள்.பீம பாகம் என்றால் 'மெகா' சமையல்!நளபாகம் என்றால் வீட்டுச்சமையல் அளவு.

நாகைந‌ல்லூர் என்று நாமக்கல் அருகில் ஓர் ஊர். அந்த ஊர் சமையல் கலைஞர்கள் மிகவும் புகழ் வாய்ந்தவர்கள். சென்னையில் அறுசுவை நடராஜன் எவ்வளவு புகழ் பெற்றார்! சரவண பவன் சமீப காலத்தில் ஒரு தாக்கத்தை ஏற்படுத்தியது.

நான் தஞ்சையைக் காலி செய்து விட்டு கிள‌ம்பி வேறு ஊருக்குச் செல்ல முடிவு செய்து விட்டேன்.அதனால் வீட்டில் தேவையற்றவைகளைப் பார்த்துப் பார்த்து ஒழித்து வருகிறோம்.அப்போது கிழிபட இருந்த தாள்களில் என் இரண்டாவது பெண்ணின் திருமண சமையல் பட்டியல் கிடைத்தது.அந்தச் சமயம் பார்த்து வகுப்பறையில் சாப்பாட்டைப் பற்றி சம்பாஷ‌ணை நடந்ததா, அதனால் தூண்டப்பட்டு இந்தப் பட்டியலை வெளியிட நினைத்தேன்.

இதனால் யாருக்கு என்ன பயன் என்று ஜப்பானில் இருந்து குரல் கேட்கிறது. முதல் பயன் கண்ணன் + ராதை திருமணம் சித்திரைமாதம் நடக்க உள்ளது. அதற்கு விருந்துக்குப் பயன் படும்.உடனடியாக வீட்டில் திருமணம் இல்லாதவர்கள் இந்தப் பட்டியலை சேமித்துக் கொண்டால் பின்னர் நடக்க உள்ள நிகழ்வுகளுக்கு மெனு போடத் திகைக்க வேண்டாம்.

எங்கள் இல்லத்து 8 (அஷ்ட லக்ஷ்மிகள்) பெண்களுக்குத் திருமணம் செய்த அனுபவஸ்தன் நான் என்பதைக் கருத்தில் கொள்ளவும்.

அந்தணர் இல்லத் திருமணங்கள் முன்பெல்லாம் 10 நாட்கள் நடைபெறும். கடந்த 50 ஆண்டுகளாக 3 நட்களாகச் சுருங்கியது.இப்போது சென்னை போன்ற நகரங்களில் 2 நாட்களாகச் சுருங்கி விட்டது.திருமணச்செலவு முழுவதும் பெண்வீட்டார் மட்டுமே செய்ய வேண்டும்.மாப்பிள்ளை வீட்டார் வந்து போகும் செலவு கூடப் பெண் வீட்டார் கொடுக்க வேண்டும்.வந்து நன்றாக ஓய்வெடுத்து, உறவினர்களுடன் சம்பாஷித்து உறவாடி, அலங்காரம் செய்து கொண்டு கல்யாணத்தில் கலந்து கொண்டு, விருந்து உண்டு மகிழலாம் மாப்பிள்ளை வீட்டார். கவலையும், பதட்டமும் பெண்ணைப்  ற்றவர்களுக்கே!அருமையான உணவு வகைகள் சுவையாக இல்லாமல் தோன்றுவது பெண்ணின் தாய் தந்தைக்கு மட்டுமே.நன்றாக சுவைத்துவிட்டு அப்படியும் குறை சொல்வது மாப்பிள்ளயின் அத்தை, மாமா ஆகியோர்களே!

இனி பட்டியல்:

 12 பிப்ரவரி 2003 இரவு 8 மணி 30 நபர்
‍‍‍‍‍‍‍‍====================================
உப்புமா, சட்னி, பால்

13 பிப்'03 காலை 5.30 100 நபர்
==============================
பெட் காப்பி

காலை 8 மணி 150 நபர்
=========================
கேசரி, இட்லி, வெண்பொங்கல், வடை,கொஸ்து, சட்னி, காப்பி/டீ

மதியம் 12 மணி 150 பேர்
========================
மைசூர் பாகு,பால் பாயசம்,தயிர் பச்சடி,வாழைக்காய் கறி,அவரைக்காய்கறி, செள‌செள, கேரட் கூட்டு, பருப்பு, நெய்,அப்பள‌ம்,பூசணிக்காய் சாம்பார்,தக்காளிரசம், தயிர்

மாலை 4மணி டிபன் 250 நபர்
============================
அசோகா,ரவாதோசை,தேங்காய் சேவை,எலுமிச்சை சேவை,போண்டா,சாம்பார்,சட்னி,காப்பி/டீ

இரவு 7=30 மணி 400 நபர்
==========================
ஜாங்கிரி, சேமியா பால்பாயசம்,தேங்காய்ப் போளி, டாங்கர், தயிர்பச்சடி,கோசுமரி,கோஸ்கறி,கதம்பக்கூட்டு,உருளை சிப்ஸ்,கத்தரிக்காய் ரோஸ்ட்,ஆம வடை,அப்பளம்,ஊறுகாய்,பருப்பு நெய்,முருங்கைக்காய், சாம்பார், தக்காளி ரசம், கெட்டிமோர்,ஐஸ்க்ரீம்

14 பிப்ரவரி 2003
==================
காலை 5.30 மணி: பெட் காப்பி 150 நபர்

காலை டிபன் 7=30 மணி 500 நபர்கள்
=====================================
கோதுமைஹல்வா,இட்லி,ரவாகிச்சடி,வடை, பூரிமசால்,ஊத்தப்பம், சட்னி, சாம்பார், காப்பி/டீ/போர்ன்விட்டா/ விவா

முஹூர்த்த நேரம்
===================
கிரேப் ஜூஸ் 750 நபர்.

மதிய சாப்பாடு காலை10=30 முதல் 600 நபர்
==================================
லட்டு,கடலைப்பருப்பு வெல்லப்பாயசம்,தயிர் பச்சடி,பழப்பச்சடி,வாழைக்காய் பொடிமாஸ்,பீன்ஸ்,  உசிலி, அவியல், சேனை சிப்ஸ், தயிர்வடை, அப்பளம் ஊறுகாய்,சாம்பார், மோர்க்குழம்பு,அன்னாசி ரசம், கெட்டி மோர்

மாலை 4 மணி டிபன் 150 நபர்
============================
பாதுஷா‍ மிக்சர்‍ காப்பி/டீ

இரவு சாப்பாடு 7=30 மணி முதல் 250 நபர்
==========================================
அக்காரவடிசல்,மில்க் கேக்,பாதாங்கீர்,பிசி பேளா ஹூளி,தேங்காய் சாதம்,விஜிடபுள் பிரியாணி,அல்லது கறிவேப்பிலை சாதம்,பகாளாபாத், உருளைக் காரக்கறி,நேந்திரங்காய் சிப்ஸ்,பீட்ரூட் ஜாம்,ஊறுகாய், வெள்ளைசாதம்‍, ரசம்.

15 பிப்ரவரி 2003
=====================
காலை 6=30 மணி பெட் காப்பி 100 நபர்

காலை 10 மணி சாப்பாடு(காலை டிபன் கிடையாது)
=======================
குலோப்ஜாம்மூன்,பாயசம்,தயிர்பச்சடி,கதம்பக்கறி, கதம்பக்கூட்டு, பருப்பு, நெய்,அப்பளம்,ஊறுகாய்,கதம்ப சாம்பார்,வற்றல் குழம்பு,ரசம்,தயிர்.

கட்டுசாதக்கூடை
‍‍‍‍‍‍‍‍‍‍‍‍==================
புளியோதரை, தயிர்சாதம், இட்லி, மிளகாய்ப்பொடி+ நல்லெண்ணை.
====================================================================
இந்த மெனு போதுமா!? இன்னும் கொஞ்சம் வேணுமா?
ஆக்கம்: கே.முத்துராமகிருஷ்ணன், தஞ்சாவூர்
-------------------------------------------------------------------------------

 கட்டுரையாளர் தன் துணைவியாருடன் இருக்கும் காட்சி! பழைய படம்!

கட்டுரையாளர் அனுப்பியிருந்த

திருவலம் சுவாமிஜியின் படத்தின் கோப்பு சிதிலமாகி இருந்ததால் வலையில் ஏற்றமுடியவில்லை

+++++++++++++++++++++++++++++++++++++++++++++++++++++

வாழ்க வளமுடன்!