Astrology: சட்டைப்பைக்குள் சனீஷ்வரன்!

++++++++++++++++++++++++++++++++++++++++++++++++++++++++
Astrology: சட்டைப்பைக்குள் சனீஷ்வரன்!

சனீஷ்வரன் எவ்வளவு பெரிய ஆள்? அவரை எப்படி சட்டைப் பைக்குள் வைக்க முடியும்?

புறங்கால்களைச் சரியாகக் கழுவாமல் தன் கோவிலுக்குள் நுழைந்தவனை சனீஷ்வரன் ஆட்டிவைத்த கதை எல்லாம் உண்டு. அப்படிப்பட்ட சனீஷ்வரன் எங்கே வேண்டுமென்றாலும் நுழைந்து அமர்ந்து கொள்வார்.

ஆனால் சட்டைப் பைக்குள் அல்லது உங்கள் மணிபர்சில் அவரைக் கூட்டிக்கொண்டு வந்து அமரவைப்பது  நீங்கள் செய்த வேலையாகத்தான் இருக்கும்.

புரியும்படியாகச் சொல்லவா?

கடன் அட்டை என்னும் குட்டி சனீஷ்வரனைத்தான் அப்படிச் சொல்கிறேன்.

கடன் அட்டைக்கு என்ன விளக்கம்?

கீழே கொடுத்துள்ளேன்.

A credit card is a small plastic card issued to users as a system of payment. It allows its holder to buy goods and services based on the holder's promise to pay for these goods and services. The issuer of the card creates a revolving account and grants a line of credit to the consumer (or the user) from which the user can borrow money for payment to a merchant or as a cash advance to the user.

எனக்குத் தெரிந்து கடன் அட்டை வைத்திருக்கும் மனிதர்களில் 90% பேர்கள் மகிழ்ச்சியாக இல்லை. தகாத  பெண்ணிடம் உறவு வைத்துக்கொண்டவன் போல விழி பிதுங்க முழித்துக்கொண்டிருக்கிறார்கள்.

அவர்களால், அந்தப் பெண்ணை உதறவும் முடியாது. அவளை வைத்துக்கொண்டு தீனி போடவும் முடியாது.

உங்களில் எத்தனை பேர்கள் அப்படி மாட்டிக் கொண்டு முழிக்கின்றீர்கள் என்று தெரியாது.

இதை விழி பிதுங்க முழித்துக்கொண்டிருப்பவர்களுக்காக மட்டும் எழுதவில்லை. இதுவரை மாட்டிக்கொள்ளாதவர்கள் எச்சரிக்கையாக இருப்பதற்காகவும் எழுதுகிறேன்.

உங்களுக்கு எந்த வங்கியில் சேமிப்புக் கணக்கு இருக்கிறதோ, அந்த
வங்கியில் Debit Card கொடுப்பார்கள். அதை வாங்கிப் பையில் வைத்துக்கொண்டு பயன்படுத்துங்கள். அது முறையாக ஒரு
பெண்னை மணந்து கொண்டு ஊர் சுற்றுவதற்குச் சமம். எந்தப்
பிரச்சினையும் வராது.

கடன் அட்டையில் உள்ள பிரச்சினைகளைப் பற்றி பக்கம் பக்கமாக எழுதலாம். கட்டுரையின் நீளம் கருதி  இரண்டொரு வரிகளில் மட்டும் எழுதுகிறேன்.

1. கடன் அட்டையைப் பெற்றுக் கொள்வது சுலபம். நீங்கள் வருமானவரி செலுத்துபவராக இருந்தால் போதும்.  அதற்கான சான்றிதழைக் கொடுத்தால் போதும்.

2. ஆண்டுக்கு ஆண்டு உங்களுக்குப் பணம் கிடைக்கும் வரம்பை ஏற்றிக் கொண்டே இருப்பார்கள்.

3. சிரங்கு வந்தவனுக்கு, சொறிவது இன்பமாக இருக்கும். அதுபோல கார்டைக் கையில் வைத்திருப்பவனுக்கு  அதைப் பயன் படுத்துவது சுகமாக இருக்கும். கடன் சுமை அதிகமாகி மாட்டிக் கொண்டு விழிக்கும்போதுதான்  அவஸ்தையாக இருக்கும். மீண்டு வரவே முடியாது. சிக்கிக்கொண்டு விடுவான்.

4. வட்டிவிகிதம் 3% (மாதத்திற்கு) ஆண்டிற்கு 42% அளவில் இருக்கும். அந்த அளவு வட்டி விகிதம் வேறு  எங்கேயும் கிடையாது (கந்து வட்டிக்காரனிடம் இருக்கும். உங்கள் மொழியில் சொன்னால் மீட்டர் வட்டிக்காரனிடம் இருக்கும்) உங்கள் சேமிப்புக் கணக்கிற்கு வங்கிகள் தரும் வட்டி ஆண்டிற்கு 6% மட்டும்தான் அதை  நினைவில் வையுங்கள்.

5. உங்களுக்குப் புரியும்படி சொன்னால், அட்டை மூலம் செலவழித்த அல்லது வாங்கிய கடன் ஐம்பதாயிரம் என்று  வைத்துக் கொண்டால், அந்தப் பணம் இரண்டாண்டு காலத்தில் வட்டியுடன் சேர்ந்து ஒரு லட்ச ரூபாய்  கடனாகி விடும். செட்டி தூங்கினாலும், வட்டி தூங்காது என்பார்கள். கடன் அட்டையின் வட்டி புற்று நோயைப்  (cancer) போன்றது. கவனிக்காமல் விட்டால் உடம்பின் எல்லாப் பகுதிகளிலும் பரவத்துவங்கிவிடும். வளரத்து  வங்கிவிடும்.

6. அட்டைக்கான காப்பீட்டுத்தொகை, விபத்தில் அட்டைவைத்திருப்பவன் இறந்துபோனால்,  தங்கள் பணம்  பாதுகாப்பாக இருக்க வேண்டும் என்பதற்கான காப்பீட்டுத்தொகை, அதற்கான பிரிமியம் என்று மாதா மாதம் ரூ.75:00ஐ உங்கள் கணக்கில் ஏற்றிவிடுவார்கள். அத்துடன் சேவை வரியாக 10.30% சேர்ந்து கொள்ளும்.

7. உங்கள் கடன் தொகையுடன் மேலே உள்ள அத்தனை கருமங்களையும் ஒன்றாகக் கூட்டிப் போட்டு, வரும்  தொகையில்  5% மட்டும் மாதத் தவணையாக செலுத்தினால் போதும்  என்பார்கள்.
அங்கேதான் சிக்கல்.கடன் சுமை கூடுவது உங்களுக்குத் தெரியாமல் போய்விடும். அதாவது உங்களின் தகாத உறவுக்காரிக்கு வயிற்றில்
குழந்தை  உண்டாவது உங்களுக்குத் தெரியாமல் போய்விடும். தெரிந்த
பிறகு கூடுதலாகப் பிரசவச் செலவு, பிறந்த குழந்தையை வளர்க்கும்
செலவு  என்று அவள் உங்களை மேலும் படுத்தி எடுப்பாள்.

8. ஒவ்வொரு மாதமும்18ஆம் தேதி உங்களுக்கு செலுத்த வேண்டிய
கடன் பட்டியலை முறையாக அனுப்பி  விடுவார்கள். அதில்
குறிப்பிட்டுள்ள தொகையை நீங்கள் அதற்கடுத்த மாதம் 11ஆம்
தேதிக்குள் செலுத்தவேண்டும். மறந்து விட்டாலோ அல்லது செலுத்தத் தவறினாலோ அபராதமாக சுமார் ரூ.250:00 உங்கள் கணக்கில்  ஏறிவிடும்.

9. ஒருவன் அவனுக்கு சிரம திசை ஆரம்பிக்கும்போதுதான் கடன்
அட்டையை வாங்கிப் பையில் வைப்பான். 17 ஆண்டுகளோ அல்லது
19 ஆண்டுகளோ என்று சிரம திசை முடிந்தாலும், இந்தக் குட்டிச் சனி
மட்டும்  விலகாது.

10. கடன் அட்டை வைத்திருப்பவர்கள், அதனால் ஏற்படும் கடன்
சுமையை, அந்தந்த மாதமே தவணையன்று  முழுமையாகச் செலுத்தி எப்போதுமே கடன் அளவை ஜீரோ இருப்பில் வைத்திருப்பது மட்டுமே புத்திசாலித்தனமாகும். இல்லை என்றால் சிக்கல்தான்

இங்கே எந்த அட்டையையும் நான் குறிப்பிட்டுச் சொல்லவில்லை.
பொதுவாக உள்ள பிரச்சினைகளைத்தால்  சொல்லியிருக்கிறேன்.
அதை மனதில் கொள்க!

சரி, மாட்டிக் கொண்டு விட்டோம். வெளியே வருவது எப்படி?
அதற்கு வழி உண்டா?

உண்டு!

அதை இங்கே சொல்ல முடியாது. தெரிந்து கொள்ள விருப்பம் இருப்பவர்கள் மின்னஞ்சல் மூலம் வாருங்கள்.  உங்களுக்கு என்னாலான யோசனையைச் சொல்கிறேன்.

அன்புடன்
வாத்தியார்





வாழ்க வளமுடன்!