கவிதைச் சோலை: சதியால் எதை மறைக்க முடியாது?

 

கவிதைச் சோலை: சதியால் எதை மறைக்க முடியாது?

இன்றைய கவிதைச் சோலையை பட்டுக்கோட்டையார் எழுதிய கவிதை ஒன்று அலங்கரிக்கின்றது. அனைவரும் படித்து மகிழுங்கள்

அன்புடன்
வாத்தியார்
------------------------------------------------------------------------------------
உண்மை ஒருநாள் வெளியாகும் - அதில்
உள்ளங்க ளெல்லாம் தெளிவாகும்
பொறுமை ஒருநாள் புலியாகும் - அதற்குப்
பொய்யும் புரட்டும் பலியாகும்

காலம் தெரிந்து கூவும் சேவலைக்
கவிழ்த்துப் போட்டாலும் நிறுத்தாது;
கல்லைத் தூக்கிப் பாரம்வைத்தாலும்
கணக்காய் கூவும் தவறாது

தாழம்பூவைத் தலையில் மறைத்தாலும்
வாசம் மறைவது கிடையாது;
சத்தியத்தையும் உலகில் எவனும்
சதியால் மறைக்க முடியாது

அன்புநெஞ்சிலே ஆத்திரம் வந்தால்
ஆண்டவன் கூட அஞ்சிடுவான்;
அறிவுக்கதவைச் சரியாய்த் திறந்தால்
பிறவிக்குருடனும் கண் பெறுவான்

வம்பும் கலகமும் சிக்கலும் தீர்ந்தால்
மனிதனை மனிதன் நம்பிடுவான்;
வாராதசமயம் வந்தே தீரும்
மடையனும் அதிலே திருந்திடுவான்!
- பட்டுக்கோட்டை கல்யாணசுந்தரம்

(இதே கவிதையைக் கவிஞர் திரைப்படம் ஒன்றிற்குப் பாட்டாக எழுதியும் கொடுத்தார். படம்: பாதை தெரியுது பார்)

வாழ்க வளமுடன்!
வளர்க நலமுடன்!
+++++++++++++++++++++++++++++++++++++++++++++++++++++++++++++