விடாது விதி!

விடாது விதி!

நாட்டின் முதல் குடிமகனாக இருந்தால் என்ன? கடைசிக் குடிமகனாக இருந்தால் என்ன? விதி விடாது! விதி எல்லோர்க்கும் ஒன்றுதான். விதியின் முன் எல்லோரும் சமம்தான்.

சென்றவாரம் அடியவன் விதியின் கையில் வசமாக சிக்கிக்கொண்டேன். விதி என்னைத் தள்ளிக் கொண்டுபோய் மருத்துவமனையில் சேர்த்துவிட்டது. 5-1-2016 செவ்வாய்க்கிழமையன்று எனக்கு அறுவை சிகிச்சை நடைபெற்றது. 3 மருத்துவர்கள், 4 பணிப்பெண்கள் சேர்ந்து செய்துவைத்தார்கள்.

என்ன சிகிச்சை?

வேறேன்ன சிறுநீரகத்தில் இருந்த 24எம்.எம். அளவுள்ள கல்லை (Kidney Stone) நீக்கும் சிகிச்சைதான். நான் தலைமை மருத்துவரிடம் வேண்டிக்கொண்டேன். எனக்கு வலியில்லாமல் சிகிச்சையைச் செய்ய வேண்டினேன். முழுமையான மயக்க மருந்தைக் கொடுத்துவிட்டார்கள். சுமார் 4 மணி நேரத்திற்கு என்ன நடந்தது என்றே எனக்குத் தெரியாது. அறையில் கண் விழித்தபோதுதான் எனக்கு நினைவு வந்தது,

உடலைச் சுற்றி பல குழாய்கள், உடலில் ட்ரிப்ஸ் மூலம் மருந்து செல்வதற்கான குழாய் (இடது கையில்) சிறுநீர் வெளியேறுவதற்கான குழாய் - அடி வயிற்றில், முதுகில் ஓட்டை போட்ட இடத்தில் இரத்தம் வடிவதற்காக ஒரு குழாய் என்று பல குழாய்கள். 3 நாட்கள் கடும் அவஸதை. ஆனால் அது தெரியாத அளவிற்கு மருந்துகள் உட்செலுத்தப்பட்டன,

மொத்தம் 5 நாட்களுக்குப் பிறகு, முழுமையாக சிகிச்சை முடிந்த பிறகு, என்னை வீட்டிற்கு அனுப்பி வைத்தார்கள். 4 நாட்கள் ஓய்வு எடுக்கச் சொல்லியிருக்கிறார்கள்.

இப்போது நான் நலமாக உள்ளேன். வழக்கம்போல மன வலிமை
யோடும் உள்ளேன்.

ஆகவே மாணவக் கண்மணிகள் பொறுத்துக்கொள்ள வேண்டுகிறேன். பாடங்கள் பொங்கல் நாள் முதல் தொடரும்.

அன்புடன்
வாத்தியார்
---------------------------------------------------
வாழ்க வளமுடன்! வளர்க நலமுடன்!