Numerology பெயரில் என்ன (டா) இருக்கிறது?

 +++++++++++++++++++++++++++++++++++++++++++++++

Numerology பெயரில் என்ன (டா) இருக்கிறது?

எங்கள் பகுதி மக்கள் தீவிர சிவபக்தர்கள். நிறைய சிவாலயங்களுக்குத் திருப்பணி செய்தவர்கள். தஞ்சை மாவட்டத்தில் திரு எனும் துவக்க எழுத்துக்களுடன் இருக்கும் 200ற்கும் மேற்பட்ட ஊர்களில் இருக்கும் சிவாலயங்களுக்குப் பலமுறை திருப்பணி செய்தவர்கள். (உதாரணம்: திருவையாறு, திருக்கோலக்கா, திருவாடுதுறை, திருவீழிமிழிலை, திருக்கழிப்பாலை, திருநின்றவூர், திருஇன்னாம்பூர், திருவாரூர், திருக்கரவீரம், திருநெல்வாயில், திருவெண்ணைநல்லூர், திருப்புனந்தாள் etc)

தங்களுடைய ஊர்களிலும் பெரிய சிவாலயங்களைக் கட்டி வழிபட்டு வருபவர்கள். காரைக்குடியைச் சுற்றிலும் மொத்தம் 74 ஊர்கள் உள்ளன. அத்தனை ஊர்களிலும் ஆலயங்கள் உள்ளன.

திருவண்ணாமலையில் உள்ள அண்ணாமலையாரையே முதன்மைக் கடவுளாகப் போற்றி வழிபட்டுவருபவர்கள். எதை எழுதினாலும் அல்லது எழுதத் துவங்கினாலும், முதலில் பிள்ளையார் சுழி, சிவமயம், என்று எழுதி விட்டுத்தான் மற்றவற்றைத் துவங்குவார்கள். முடிக்கும்போது, வேணும் அண்ணாமலையார் துணை என்றுதான் கடிதத்தை முடிப்பார்கள்.

என்றென்றும் அன்புடன் என்று முடிக்கும் இக்காலப் பழக்கமெல்லாம், ஆங்கில மோகத்தால் வந்தது.

அதோடு தமிழ்க்கடவுள் முருகப்பெருமான் மீது தீவிர பக்தியை உடையவர்கள். தங்கள் குழந்தைகளுக் கெல்லாம் முருகப்பெருமானின் திருநாமங்களில் ஒன்றையே சூட்டி மகிழ்ந்தவர்கள்.மகிழ்கிறவர்கள்.

கவியரசர் கண்ணதாசனின் இயற்பெயரான முத்தையா என்பதும் முருகனின் பெயர்தான்.

அதனால்தான் கவியரசர் கண்ணதாசன் அவர்கள் செட்டிநாட்டைப் பற்றிக் குறிப்பிடும்போது இப்படிச் சொல்வார்: "முத்தப்பன் இல்லாத ஊரும் இல்லை, முருகப்பன் இல்லாதவீடும் இல்லை."

முருகப்பன், முத்தப்பன், முத்தையா, பழநியப்பன், சுப்பிரமணியன், செந்தில்நாதன், சுவாமிநாதன், வைத்தியநாதன் என்று முருகன் பெயரும், அண்ணாமலை, அருணாச்சலம், கண்ணப்பன், சோமசுந்தரம், மீனாட்சிசுந்தரம் என்று சிவனுடைய நாமங்களாகவே மக்களுடைய பெயர்கள் இருக்கும். அதுபோல பெண்களுடைய பெயர்கள், மீனாட்சி, விசாலாட்சி, வள்ளியம்மை, தெய்வானை என்று இறைவியரின் பெயராகவே இருக்கும்.

ஊர்களில் உள்ள பொதுக்கோவில்களிலும், பங்காளிகளுக்கென்று உள்ள படைப்பு வீடுகளிலும், ஊரில் உள்ள மக்களின் புள்ளிவிவரங்கள் முழுதாகக் கிடைக்கும். ஊரில் உள்ள ஒவ்வொருவரின் பெயரும் அங்கே பதிவு செய்யப் பெற்றிருக்கும். ஒரு குழந்தையின் பெயர் தந்தையின் பெயருடன் இணைத்தே பதிவாகியிருக்கும்.

என்னுடைய இயற்பெயர். சுப்பிரமணியன்.என் தந்தையாரின் பெயர் வீரப்பன். எங்கள் கோவிலில் பதிவாகியுள்ள பெயர். வீரப்பசெட்டி சுப்பிரமணியன்.

சுப்பிரமணியன் என்பதையும் சுப்பையா என்று சுருக்கி அழைத்தார்கள் அல்லது வைத்தார்கள். பள்ளியில் பதியும்போது எனக்கு சுப்பையா என்று பதிந்ததால் அப்பெயர் நிலைத்துவிட்டது. வைத்த பெயர் மறைந்து விட்டது. எண் ஜோதிடப்படி சுப்பையா எனும் பெயரைவிடச் சுப்பிரமணியன் எனும் பெயர் நல்ல பெயர். அதைப் பின்னால் சொல்கிறேன்

கடிதம் எழுதும்போது இதைச் சுருக்கி வீர.(சுப்பிரமணியன் alias)சுப்பையா என்று எழுதுவார்கள். எனது தந்தைவழித் தாத்தாவின் பெயர் சுப்பிரமணியன். ஆகவே என் தந்தையாரின் பெயர் சுப்பிரமணியன் செட்டி வீரப்பன். சுருக்கமாக சுப. வீரப்பன்.

இந்த இரட்டை எழுத்து இன்ஷியல் எதற்காக? ஒரு எழுத்துப்போதாதா? அதாவது என் தந்தையாரின் இன்ஷியலை சு. என்று போட்டால் போதாதா? எதற்காக சுப. என்று போட வேண்டும்? என்னுடைய இன்ஷியலை வீ. என்று போட்டால் போதாதா? வீர. என்று எதற்காகப் போடவேண்டும்?

ஒருவீட்டில் (அப்போதெல்லாம் கூட்டுக்குடும்பங்கள். பெரிய பெரிய வீடுகள். ஒரு வீட்டில் ஐந்து முதல் பத்துக் குடும்பங்கள் ஒன்றாக வாழ்ந்த காலம்) இரண்டு அல்லது அதற்கு மேற்பட்ட சுப்பையாக்கள் இருந்தால், எப்படி அடையாளப் படுத்துவது?

1. அருணாசலம் மகன் சுப்பையா
2. அண்ணாமலை மகன் சுப்பையா
3. முருகப்பன் மகன் சுப்பையா
4. பழநியப்பன் மகன் சுப்பையா

என்று நான்கு சுப்பையாக்கள் இருந்தால், அ. சுப்பையா என்று ஒற்றை எழுத்து இன்ஷியல் இருந்தால், குறிப்பிடப்படும் நபர், அருணாசலம் மகன் சுப்பையாவா அல்லது அண்ணாமலை மகன் சுப்பையாவா என்று எப்படித்தெரியும்? ஆகவே இப்படிச் சொல்வார்கள். அரு. சுப்பையா, அண. சுப்பையா, முரு. சுப்பையா, பழ. சுப்பையா, ஆங்கிலத்தில் AR.Subbiah, AN.Subbiah, MR.Subbiah, PL.Subbiah

(வாய்ச் சொல்லாக அழைக்கும்போது இப்படி அழைப்பார்கள். ஆனாரூனா சுப்பையா, மூனாரூனா சுப்பையா, பானாளானா சுப்பையா)

பட்டிமன்றத் தலைவர் கண.சிற்சபேசன் அவர்களின் பெயருக்கு முன்னால் இருக்கும் கண எனும் எழுத்து அவருடைய தந்தையார் கண்ணப்ப செட்டியாரைக் குறிக்கும். மேடைப்பேச்சாளர் பழ. கருப்பையா அவர்களின் பெயருக்கும் முன்னால் இருக்கும் பழ. எனும் எழுத்து அவருடைய தந்தையார் பழநியப்ப செட்டியார் அவர்களைக் குறிக்கும். திரைப்பட இயக்குனர் எஸ்பி. முத்துராமன் அவர்களின் தந்தையாரின் பெயர். சுப்பையா.(இவர் திராவிடக் கழக முன்னோடிகளில் ஒருவர். தந்தை பெரியாரின் நெருங்கிய நண்பராக இருந்தவர்). இப்படித் தனித்தன்மையோடு அடையாளப் படுத்துவதற்குத்தான் அந்த இரட்டை எழுத்து இன்ஷியல் முறை.

ப.சிதம்பரம் எனும் பெயரைவைத்து அவருடைய தந்தையார் பெயரை எப்படிச் சுலபமாகச் சொல்ல முடியும்? பரமசிவன் மகனா அல்லது பழநியப்பன் மகனா என்று எப்படித் தெரியும்? அவருடைய தந்தையரின் பெயர் பழநியப்பன். பழ.சிதம்பரம் என்பதுதான் அவருடைய இயற்பெயர். அவர் ப. சிதம்பரம் என்று வைத்துக் கொண்டுள்ளார். பலகாலம் இந்தியாவின் நிதியமைச்சராக இருந்தவர் அவர். தற்சமயம் அவர் மாண்புமிகு உள்துறை அமைச்சர். வெறுமனே சிதம்பரம் என்று சொன்னால் போதும் நாட்டு மக்கள் அனைவருக்கும் அவரைத் தெரியும். ஆகவே அவர் எப்படி வேண்டுமென்றாலும் வைத்துக்கொள்ளலாம்!

ஆனால் அவருடைய பெயர் இயற்கையாகவே நன்றாக அமைந்துள்ளது.

P C H I D A M B A R A M 8 + 3 +5+1+4+1+4+2+1+2+1+4 = 36 இது மிகவும் நல்ல எண் (பி.எல். என்று வைத்திருந்தால் 39 வரும். அது மோசமான எண். ஆகவே அவருடைய பெயர் ப. என்னும் ஒற்றை எழுத்து இன்ஷியலிலேயே எண் ஜோதிடப்படி அருமையாக அமைந்துள்ளது)

அழகப்பன் எனும் பெயரை உடையவர்கள், எங்கள் பகுதியில் நிறையப் பேர்கள் உள்ளார்கள். அதுவும் முருகப்பெருமானின் திருநாமங்களில் ஒன்று. முருகு என்றால் அழகு. அழகு என்பது அவன்தான். அழகுக்கு அப்பனும் அவன்தான்.

ஆனால் இந்த அழகப்பனை இன்ஷியலாக்கும்போது, இரட்டை எழுத்தில் அள. என்றுதான் குறிப்பிடுவார்கள். அழ. என்று எழுதமாட்டார்கள். என்ன கெட்டிக்காரத்தனம் பாருங்கள். அழ. என்றால் அழுகையைக் குறிக்கும்.

அதனால் அள.

ஆங்கிலத்தில் பிரச்சினையில்லை AL.Chidambaram,. AL.Ramasamy

R, என்ற இன்ஷியலுடன் பெயர் வந்தால் ராமசாமி மகன். RM என்ற இன்ஷியலுடன் பெயர் வந்தால் ராமநாதன் மகன். S, என்ற இன்ஷியலுடன் பெயர் வந்தால் சுந்தரம் மகன், SP என்ற இன்ஷியலுடன் பெயர் வந்தால் சுப்பிரமணியனின் மகன்.

அர்த்தம் ஆனதா மக்களே?
-------------------------------------------------------------------------------
சரி, கதைபோதும். சொல்லவந்த விஷயத்திற்கு வருகிறேன்.

படித்து முடித்தவுடன், தனியார் நிறுவனம் ஒன்றில் சில காலம் வேலை பார்த்தவன், அது பிடிக்காமல், வேலையைவிட்டு விலகித் தனியாகத்
தொழில் செய்யத் துவங்கினேன்.

பண முதலீடு இல்லாத சுய தொழில். முகவர் தொழில். விசிட்டிங் கார்டு, டைரி, பேச்சுத்திறமை, தொலைபேசி இந்நான்கும் இருந்தால் போதும். அதில் மூன்று மட்டுமே இருந்தது. OYT (Own Your Telephone Scheme) யில் தொலைபேசிக்கு பணம் செலுத்திவிட்டு ஐந்தாண்டுகள் காத்திருக்க வேண்டிய அவல நிலை அப்போது. தொழில் துவங்கி ஐந்து வருடம் கழித்துதான் இணைப்புக் கிடைத்தது. அது பெரிய கதை. அதைப் பிறகு ஒரு நாள் விவரிக்கிறேன்.

அப்போது எனக்கு ஜோதிடத்தில் அவ்வளவாகப் பரீட்சயம் இல்லாத நிலைமை. என் ஜாதகப்படி, நான் பண முதலீட்டுடனோ அல்லது கூட்டாகவோ எந்தத் தொழிலும் செய்யக்கூடாது. சிம்ம லக்கினம். பத்திற்கு உரிய சுக்கிரன் எட்டில் (உச்சம். ஆனாலும் எட்டாம் வீடு). தொழில்காரகன் சனி 12ல். அவையெல்லாம் தெரியாமல், முருகன் அருளால் நான் சரியாகவே வழி நடத்தப்பெற்றிருக்கிறேன்.

முதலில் இருந்த பெயர் VR.சுப்பையா. அதை நான் இந்தத் தொழில் துவங்கும்போது SP.VR.சுப்பையா என்று மாற்றிக் கொண்டேன். அந்த மாற்றம் நல்ல மாற்றத்தைத் தந்தது. அது சிலகாலம் கழித்துத்தான் எனக்குத் தெரியவும் செய்தது.

எண் ஜோதிடப்படி VR.சுப்பையா விற்கான எண்: 28 அது நல்ல எண் இல்லை.

Number 28 is not a good number. It is a number with full of contradictions. It indicates a person of great promise who is likely to see all taken away from him. It indicates loss through trust in others and the likelihood of having to begin life's road over and over again. It is not a fortunate number.

எண் ஜோதிடப்படி SP.VR.சுப்பையா விற்கான எண்: 39 இது ஓரளவிற்கு நல்ல எண்.

S P V R S U B B ! A H
3 8 6 2 3 6 2 2 1 1 5 = 39

பெயர்களின் கூட்டெழுத்து 11, 12, 13,14, 16,18 20, 22, 25, 26, 28 29, 34,35, 38, 40, 43,44. 47 & 49 என்று வந்தால் நன்மையைத் தராது என்று பின்னால் தெரிந்து கொண்டேன்.

நன்றாக இருந்த நகரத்தின் பெயரை மாற்றிவைத்து, அதன் மகிமையைக் குறைத்த கதை ஒன்று உள்ளது.

அதைப்பற்றிய விவரம் அடுத்த பாடத்தில்! அதைத் தொடர்ந்து பல புதிய செய்திகள்
----------------------------------------------
(தொடரும்)

அன்புடன்
வாத்தியார்
--------------------------------------------------------------------------
வாழ்க வளமுடன்!