உங்களைத் தோண்டுங்கள் உண்மை தெரியும்!

----------------------------------------------------------------------------------
இன்று வரவேண்டிய வாரமலர், முண்டாசுக் கவிஞருக்காக நேற்றே வந்துவிட்டதால், நேற்று வரவேண்டிய இளைஞர் மலர் இன்று வெளியாகிறது. இரண்டு மாணவக் கண்மணிகள் வெளுத்துக் கட்டியிருக்கிறார்கள். பதிவிட்டிருக்கிறேன். படித்து மகிழுங்கள். அத்துடன், அவர்கள் மேலும் தொடர்ந்து எழுதும் விதமாக உங்கள்  கருத்தைச் சொல்லுங்கள்!

அன்புடன்
வகுப்பறை வாத்தியார்
++++++++++++++++++++++++++++++++++++======
1
உங்களைத் தோண்டுங்கள் உண்மை தெரியும்!

வாத்தியாரின் வகுப்பறைக்கு வந்து இன்று பாடம் படிக்கின்ற மற்றும் வருங்காலத்தில் பாடம் படிக்க போகும்  அனைவரையும் பார்த்துக் கேட்க வேண்டிய கேள்வி ஒன்று உள்ளது.

பலருக்கும் பதில் தெரியாத கேள்வி அது!

என்ன கேள்வி?

கேள்வி இதுதான்: உலகில் தோன்றும் ஒவ்வொரு மனிதப்பிறவியும் பெறும் முதல் வெற்றி என்ன?

உங்கள் பதிலை யோசித்து வைத்துக் கொண்ட பிறகு, தொடர்ந்து இந்தக் கட்டுரையைப் படியுங்கள்!

V
V
V
V
V
V
V
V
V
V
V
V
V
V

    
அது சாதாரண வெற்றி அல்ல! மகத்தான வெற்றி! அறிவியல் உலகம் ஆதாரபூர்வமாக ஒப்புக்கொண்டுள்ள வெற்றி!

சொன்னால், வியப்பாக இருக்கும். ஐந்து முதல் பத்து மில்லியன் உயிர் ஜீவன்களுடன் உண்டான  போராட்டத்தில் பெற்ற முதல் வெற்றி அது!
    
நீங்கள், நான், நமது முன்னோர்கள், வகுப்பறை வாத்தியார் உட்பட அனைவரும் பெற்ற முதல் வெற்றி அதுதான்!
    
அந்த உண்மையை மட்டும் உணர்ந்து கொள்வதோடு, மனதில் ஏற்றிக் கொண்டால் போதும். யாரும் தங்கள் தன்னம்பிக்கையை இழக்க மாட்டார்கள்.

மரண விளிம்பிற்குச் செல்பவர்கள் கூட அதை நினைத்தால், ஒரு புத்துணவு பெற்றுத் திரும்பிவிட முடியும். புது வாழ்க்கை வாழ்ந்து செழிக்க முடியும்!
    
தன்னம்பிக்கையை இழந்து சோகத்துடன் வாழும் மனிதன்கூட, அவன்  ‘நிகழ்த்தி காட்டிய சாதனை’ தெரிந்தால் தன்னம்பிக்கை மீண்டும் அவனுக்குள் துளிர்விடும். சோகம் காணாமல் போய்விடும். மீண்டும் எழுந்து உட்கார்ந்து விடுவான். சாதனை செய்யப் புறப்பட்டு விடுவான். யாரும் அவனைத் தடுத்து நிறுத்த முடியாது!

மனநல மருத்துவ ஆராய்ச்சிகள் சுட்டிக்காட்டும் மாபெரும் உண்மை அது!
    
அந்த மாபெரும் வெற்றி என்ன என்று இப்போது சொல்லுங்கள்!
    
அன்னை வயிற்றில் நாம் ஜனித்ததுதான் அந்த முதல் வெற்றி! நமது கன்னி வெற்றி. உங்கள் மொழியில் சொன்னால், ஒரு மட்டை ஆட்ட வேகப் பந்து வீச்சாளர் கைப்பற்றும் முதல் விக்கெட்!
    
இதை இன்றைய நவீன மருத்துவ உலகம் ஆதாரத்துடன் கூறுகிறது! ஆதாரத்துடன் கூறும்போது, அதை ஒப்புக்கொள்வதுதானே மூறை!

அதனால்தான் அதை, அந்த மருத்துவ உண்மையை, உங்களுக்காக இங்கே பதிவு செய்கிறேன்!
    
அதற்கு உரிய ஆதாரத்தை, மருத்துவ பரிசோதனைச் சாலை என்று கூறபடுகின்ற லேப்பில் கண்கூடாக நீங்கள் காணலாம். அதற்கு ஒரு இணைய தளம் உள்ளது. அதில் நீங்கள் காணலாம்.  
    
விளக்கமாகக் கூறினால் மருத்துவப் பாடமாகிவிடும். அதனால் விளக்கவில்லை!

அதைவைத்துச் சொல்ல வந்த செய்திக்கு மட்டும் வருகிறேன்!   
    
ஒவ்வொரு மனித உயிரும் ஜனிக்கும் போது வெற்றி வாகை சூடிவிடுகிறது. வளரும்போது தான் பலரது வாழ்க்கைச் சூழல் மாறிவிடுகிறது. ஒவ்வொருவரும் அவசரம் என்னும் தவிர்க்க முடியாத நோயால் பாதிக்க படுகின்றார்கள். அதுதான் பரிதாபத்திற்கு உரிய விஷயம்!
       
இன்றைய போட்டி மிகுந்த உலகில் எல்லாவற்றிற்கும் அவசரம். விபரம் தெரிந்த வயதில் துவங்கி, இறுதியில் இறைவனடி சேரும் நாட்கள் வரை - உங்கள் மொழியில் சொன்னால் மண்ணோடு மண்ணாகும் வரை அனைத்திற்கும் அவசரம்!
    
இன்றைய மருத்துவ உலகமும், சில தன்னார்வ தொண்டு நிறுவனங்களும் கருணையோடும், மனித நேயத்துடனும் அடித்துச் சொல்வது இதுதான்:

பல் துலக்குவதாகட்டும், குளிப்பதாகட்டும், உணவு உண்பதாகட்டும், இறைவனை வணங்குவதாகட்டும், செய்தித்தாளைப் படிப்பதாகட்டும், மனைவி, குழந்தைகளுடன் பேசுவதாகட்டும், இயற்கையை ரசிப்பதாகட்டும், ஒரு சினிமாவைப் பார்ப்பதாகட்டும் அல்லது உங்கள் தொழிலைச் செய்வதாகட்டும், எதைச் செய்தாலும் முழு ஈடுபாட்டுடன் செய்யுங்கள்

தன் அவதாரத்தில் எம்பெருமான் கண்ணபிரான் ஒவ்வொரு செயலையும் எந்த அளவிற்கு முழு ஈடுபாட்டுடன்  செய்தார் என்று சொல்லித் தெரிய வேண்டியதில்லை. சிறுவயதுக் குழந்தையாக இருந்தபோது தீராத விளையாட்டு பிள்ளையாக முழு ஈடுபாட்டுடன் இருந்தார். இளம்பருவத்தில்  கோபிகைகளுடன் ஆடிய ஆட்டமும் ஈடுபாட்டுடன் இருந்தது. பின்னர் தூதுவனாக, சாரதியாக இருந்த காலத்திலும் முழு ஈடுபாட்டுடனன் அந்தப் பாத்திரமாகவே இருந்தார்!
    
நமக்கு, சிறு வயதில் தொடங்கும் அந்த அவசரப் போக்கு, சிறிது சிறிதாக மனதில் பதற்றம் மற்றும் பயத்தை வளர்க்க ஆரம்பித்து விடுகிறது. பின்னால் அதுவே வளர்ந்து, ஒரு நாள் பெரிய ஆலமரமாகி நம் மனதை நிறைத்து, நம்மை முடங்க வைத்துவிடுகிறது.
    
மற்றவருடன் நம்மை ஒப்பிடுவதுதான் அந்தப் பதற்றம்வர அதி முக்கிய காரணம் என்றால் அது மிகையல்ல. மருத்துவ உலகமும் அதைத்தான் கூறுகிறது.

மற்றவருடன் ஒப்பிடும் பழக்கம் நமக்குள் எப்படி உண்டாகிறது? அதற்கு முதல் காரணம் நம் பெற்றோர்களே!
    
பொறுப்புடன் வளர்க்கிறேன், காசின் அருமையைச் சொல்லி வளர்க்கிறேன், போட்டிகள் நிறைந்த உலகத்தில் ஈடு கொடுக்கும் தன்மையுடையவனாக இருக்கும்படி அவனை வளர்க்கிறேன் என்று தங்கள் குழைந்தைகளுக்குச் சின்ன வயதிலேயே இனம் புரியாத மன அழுத்தத்தைக் கொடுப்பது அவர்கள்தான்!

பிரகாசமாக அமைய வேண்டிய அந்தக் குழந்தையின் வாழ்க்கை ஏனோ தானோ என்று அமைந்து விடுகின்றது.
    
மருத்துவ துறையைச் சார்ந்த ஆராய்ச்சி அமைப்புகள் நடத்திய கணக்கெடுப்பில், பெருவாரியான மனிதர்கள் மனம் பாதிக்கப்பட்ட நிலையில் உள்ளனர் என்பது தெரிய வந்தது.

அந்த பாதிப்பின் தாக்கம், நாளாக நாளாக மனதை மட்டும் அல்லாமல் உடல் அளவிற்கும் சென்று விடுகின்றது என்று சொல்லியுள்ளார்கள். மேலும், அவர்கள் பணியாற்றும் இடங்களும், வாழும் இடங்களும் வெவ்வேறாக இருந்தாலும், பாதிப்பு என்னவோ ஒன்றுதான் என்கிறார்கள்.
    
அந்த பாதிப்பானது பணம், பொருள், கல்வி, காதல், குடும்ப வாழ்க்கை என்று பாதிப்பு என்ற ஒற்றைச் சொல்லை, ஒற்றை நிலையை வெவ்வேறு பரிமாணத்தில் காட்டிக்கொண்டு இருக்கிறது.  

வயல் ஒன்றில் விதைக்கப் பெறும் விதைகள் பலவகை எனில், உண்டாகும் பயிர்களும் பல வகையாகத்தான் இருக்கும். ஒரு பயிராக இருக்காது. இந்த உண்மை எல்லோருக்கும் தெரியும்.

அதைத் தெரிந்தவர்கள், தங்கள் வாழ்க்கைக்கும் அந்தத்  ‘தியரியைப்’ பயன் படுத்துகின்றனர். வெற்றியும் பெறுகின்றனர்.
    
நம்மில், அந்த உண்மையைத் தெரிந்தவர்கள்கூட  குடும்பச்சூழல் முதலாக எண்ணற்ற காரண காரியம் கூறி அந்தத் தியரியைப் பயன் படுத்துவதில்லை. அனைத்து விதைகளையும் ஒன்றாக வளர்கின்றோம். அதனால் நமக்குக் கிடைக்க வேண்டிய மகசூல் கிடைக்காமல் போய்விடுகின்றது. 
    
இங்கு மகசூல் என்ற பதம் சாதனைகளுக்குச் சொல்லப்படுகிறது என்பதை நினைவில் வையுங்கள்.
    
இந்த எடுத்துகாட்டு சகலருக்கும் பொருந்தும்.
    
அத்துடன் மன அளவில் அல்லது உடல் அளவில் பாதிக்கப்படவர்கள் மீண்டு வர எண்ணற்ற வழிமுறைகள் உள்ளன. அவற்றில் முக்கியமான பங்கு வகிப்பது முறையான உணவு வகைகள், உடற்பயிற்சிகள், தியானம், யோகாசனம் போன்றவை.

நம்மை நாமே பக்குவபடுத்திக் கொண்டு விட்டால் மனம் மற்றும் உடல் நாம் சொன்னபடி கேட்கும். நாம் எண்ணற்ற சாதனைகளைச் செய்து பல வெற்றிகளைப் பெற முடியும்.  
   
நமது நாட்டில், குறிப்பாக நம் தமிழகத்தில் அனைத்துத் துறைகளிலும் எண்ணற்ற மேதாவிகள் உள்ளார்கள். உயர் கல்வியை முடித்துவிட்டு, படித்த படிப்பை எவ்வாறு பயன் படுத்த வேண்டும் என்று தெரிந்தும்கூட பயம் மற்றும் ஒருவகையான  தாழ்வு  மனப்பான்மை காரணமாக கிடைக்கும் வேலையை ஏற்றுக்கொண்டு, கைக்கும் வாய்க்குமான வருமானத்தில், தங்கள் வாழ்க்கையை அமைத்துக் கொண்டு அல்லது ஏற்றுக் கொண்டு, நாட்களை,, காலத்தை ஓட்டிக்கொண்டிருக்கின்றனர். சிலரை நான் பார்த்து வருந்தியிருக்கிறேன். அதனால்தான் இதை இங்கு கூற வேண்டிய நிலை ஏற்பட்டுள்ளது.
    
எண்ணற்ற பிரச்சனைகளை சந்தித்த போதும், பல்வேறு துறைகளில் சாதனை செய்தவர்கள் பலர் உள்ளனர்.
சிலரை உங்களுக்காகக் கீழே அடையாளம் காட்டியுள்ளேன்.
    
1. மாவீரன் நெப்போலியன். காக்காய் வலிப்பு நோயுடன் போராடியவர்.
    
2. நவீன அறிவியல் கண்டு பிடிப்புக்கள் பலவற்றைத் தந்த மேதை தாமஸ் ஆல்வா எடிசன். காது கேளாதவர்.
    
Based on a true stories!.
    
1. Beautyful Mind   - Oscar award Film  John nash ( Nobel Prize Winner)
(மனநோயால் பாதிக்கப்பெற்ற ஒரு அறிஞனின் கதை)
    
2. My left foot. Oscar award Film
(இப்படியும் வாழ முடியுமா என்று வியக்க வைக்கும் சம்பவங்கள் நிறைந்தது)
    
3. Rocky Part - 1 Oscar award Film
(ஒரு குத்து சண்டை வீரர், தனது கடினமான உழைப்பின் மூலம் உலகத்தை திருப்பி பார்க்க வைத்த கதை)
    
4. Men of Honour -  Carl Basher.  
(இன  வேற்றுமையால் உண்டான பாதிப்பையும், இடையில் உண்டான  ஊனத்தையும்  உடைத்தெறிந்து வெற்றி வாகை சூடியவனின் கதை)
    
5. Lorenzo Oil.
(மருத்துவ அறிவே இல்லாத தாய் தந்தையர் தங்கள் பிள்ளைக்கு ஏற்பட்ட நோய்க்கு மருந்து கண்டு பிடித்த கதை)
    
6. Blocck - Hindi
(வாழ்க்கை என்பது என்ன என்று இந்தப் படத்தைப் பாருங்கள் தெரியும்)
    
இவைகள் எல்லாம் வரலாற்றில் பதிவான சிறு துளிகளே!
    
"ஈரம்  உள்ள இடத்த தோண்டினால் நீர் கிடைக்கும் என்று அறிந்த உங்களால், வெற்றிவாகை சூடிய உங்களைத் தோண்டிப் பார்க்காமல் இருப்பது ஏன்?

தோண்டிப்பாருங்கள், உங்களுக்குள் ஒரு சாதனையாளன் இருப்பது தெரியவரும்!
- ஆக்கம்,  கண்ணன் சீதாராமன், பஹ்ரெய்ன்

நமது வகுப்பறையின் எழுச்சிமிகும்  மாணவர்களுள் ஒருவரும், இளைஞருமான சீதாராம கண்ணனின் எழில் மிகும் தோற்றம்

++++++++++++++++++++++++++++++++++++++++++++++++++++++++++
  

 --------------------------------------------------------
2
எதை silent modeல் வைக்க முடியாது?

'அழகாய்ப் பூக்குதே சுகமாய்த் தாக்குதே 
அடடா காதலைச் சொல்லாமல் கொள்ளாமல் 
உள்ளங்கள் பந்தாடுதே 
ஆசையைப் பேசிட வார்த்தை மோதும்'

எரிச்சலுடன்  கையை நீட்டி அலைபேசியை எடுத்தான் முரளி.  தூக்கம் கலைந்த கோபம் கண்களில் தெரிந்தது.  'ச்சே படுக்கறதுக்கு முன்னாடி silent mode ல வைக்க மறந்தாச்சு'.

தெரிந்த தொலைபேசி எண்ணாக இல்லை.  'ஹலோ யாரு?'

எதிர்முனையில் ஒரு பெண் குரல் பதட்டத்துடன் பேசியது.  'டாக்டர், இந்த நேரத்தில உங்களைத் தொந்தரவு செய்யறதுக்கு மன்னிச்சுக்கோங்க.  என் பையனுக்கு வீசிங் பிரச்னைக்கு உங்ககிட்டதான் ட்ரீட்மென்ட் எடுத்துக் கிட்டிருக்கேன்.   இன்னிக்கு கொஞ்சம் ஜாஸ்தியா இருக்கற மாதிரி இருக்கு டாக்டர்.  மருந்தெல்லாம் கொடுத்துட்டேன்.  ஆனா கட்டுப்பட மாட்டேங்குது.  ரொம்ப பயமா இருக்கு.  இப்ப அழைச்சுட்டு வந்தா கொஞ்சம் பார்க்க முடியுமா டாக்டர், ப்ளீஸ்?'.

'ஒ நோ, நான் இப்ப ஊர்ல இல்லையேம்மா, நாளைக்குக் காலைலதான் வருவேன்.  நீங்க ஒண்ணு பண்ணுங்க.  இப்போதைக்கு உங்க வீட்டுக்கு பக்கத்தில ஏதாவது ஆஸ்பத்திரி இருந்தா பையனைக் காமிங்க.  நாளைக்கு கிளினிக் அழைச்சுக்கிட்டு வாங்க'.

'சரி டாக்டர்'.

'யாருங்க போன்ல இந்த நேரத்தில?'

'வேற வேலை இல்ல, இப்ப பையனை அழைச்சிக்கிட்டு வரட்டுமான்னாங்க.  நான் ஊர்ல இல்லன்னு சொல்லிட்டேன்', அலைபேசியை silent mode ல் வைத்துக்கொண்டே பதில் சொன்னான் முரளி.
----------------------------------------------
காலையில் எழுந்ததுமே 'அப்பா' என்று ஓடிவந்து கழுத்தைக்கட்டிக்கொண்டான் முரளியின் 4 ஆம் வகுப்பு படிக்கும் ஒரே மகன் கார்த்திக்.

'என்னடா செல்லம்?'

'அப்பா, நீங்க இன்னிக்கு சாயங்காலம் foot ball வாங்கித்தரேன்னு சொன்னீங்களே ஞாபகம் இருக்கா?'

'ம்ம்ம் கண்டிப்பா.  சீக்கிரமா ஸ்கூல் க்குக் கிளம்பு.  பஸ் வந்துடும்'.

'சரிப்பா' குதித்துக்கொண்டே ஓடினான்.

'மைதிலி நான் கிளம்பறேன்'.

'சரிங்க'
------------------------------------------------
கிளினிக்கில் வழக்கம் போல் கூட்டம் அதிகம்.

'மாலா, இந்தா போன்.  ஏதாவது முக்கியமான காலா இருந்தாத்தவிர கொடுக்காதே'. 

'சரி சார்'.

நேரம் ஓடியதே தெரியவில்லை.

'சார், உங்க பையன் ஸ்கூல்லேர்ந்து போன், உங்ககிட்ட பேசணுமாம்'.

'என்னவா இருக்கும்' புருவங்கள் சுருங்க போனை வாங்கினான்.

'டாக்டர் முரளி பேசறீங்களா?  வணக்கம் சார், நான் கார்த்திக்கோட கிளாஸ் மிஸ் பேசறேன்'.

'சொல்லுங்க'

'சார்..... இன்னிக்கு கேம்ஸ் period ல.......... விளையாடும்போது ஒரு பையன் கார்த்திக்கத் தள்ளி விட்டுட்டான்.  எதிர்பார்க்காம நடந்ததால... சாரி சார்........'

முரளியிடம் பதற்றம் தொற்றிக்கொண்டது 'மேல சொல்லுங்க'.

'பதட்டப்படாதீங்க சார்.  விழுந்தப்போ தலைல ஒரு சின்ன கல்லு குத்தினதுலே கொஞ்சம் ரத்தம் வந்துது, அவ்வளவுதான்.  நான் உடனே பக்கத்துல இருக்கிற கிளினிக் அழைச்சுட்டுப்போயிட்டேன்.  டாக்டர் மருந்து போட்டிருக்காரு.  டாக்டர் ஸ்லிப், மருந்து இரண்டுமே அவனோட ஸ்கூல் பையில வச்சுருக்கேன் சார்.  பஸ் டிரைவரும் அவன் வரவரைக்கும் வெயிட் பண்ணி இப்பதான் பஸ் எடுத்தாரு.  எப்போதும் வர நேரத்தைவிட 15 - 20 நிமிஷம் லேட் ஆகும்.  பெரிசா எல்லாம் காயம் எதுவும் இல்ல சார், நீங்க பயப்படாதீங்க.  தள்ளிவிட்ட பையனையும் சொல்லிப் புரிய வைச்சிருக்கேன்.  இனிமேல் இதுமாதிரி எதுவும் நடக்காம பார்த்துக்கறோம்' மூச்சு விடாமல் பேசி நிறுத்தினாள்.

'ரொம்ப நன்றி,  பரவாயில்லை விடுங்கம்மா.  பசங்களோட இதான் பெரிய தலைவலி.  நல்லவேளையா பெரிசா எதுவும் இல்ல.  இதுல உங்க தப்புன்னு சொல்றதுக்கு எதுவுமில்ல.  உங்களுக்கும் பாவம் இதால அசௌகர்யம்'.

'அதல்லாம் ஒண்ணுமில்ல சார், டீச்சர்னு ஆனப்புறம் இதெல்லாம் எங்க கடமைதானே, சரி சார், போனை வெச்சுடறேன்.'

'சரிம்மா'

போனை வைத்து நெடுநேரம் வரை, டீச்சர் கடைசியில் சொன்னது முரளியின் காதுகளில் எதிரொலித்துக்கொண்டே இருந்தது!

மனதை silent modeல் வைக்க முடியாது இல்லையா? அந்த டீச்சர் சொன்னது மனதில் ஒலித்துக்கொண்டே இருந்தது!

ஆக்கம்: திருமதி.எஸ்.உமா, தில்லி
___________________________________________

வாழ்க வளமுடன்!