புதுமுகமா? வாருங்கள் குறுக்கு வழியில் போவோம்!

புதுமுகமா? வாருங்கள் குறுக்கு வழியில் போவோம்!

புதிதாக நுழைபவர்கள், இங்கே இன்று நடக்கும் பாடத்தை முதலில் படித்தவுடன், ஒன்றும் புரியாது. அதே நேரத்தில் ஆர்வமாகவும் இருக்கும்.

என்ன செய்வது என்று தெரியாது. யாரைக் கேட்பது என்றும் தெரியாது. சரி, சைடு பாரைப் பார்ப்போம் என்று பார்த்தால், திகைப்பாக இருக்கும். 215 பாடங்களா? என்றைக்குப் படிப்பது? என்றைக்கு முடிப்பது?

அதோடு இங்கே இருக்கும் சீனியர்களுடன் என்றைக்கு ஐக்கியமாவது?

முன்பு ஒரு சமயம், ஒரு ஜோதிட நூலில், அதை எழுதிய பெருந்தகையாளன், அசத்தலாகச் சொல்லியிருந்தான்:

“அடேய், சரவளி, காலப் பிரகாசிகா, ஜெய்மானி ஜோதிடம், அகத்தியருக்கு முருகன் சொன்ன குமாரசுவாமிய ஜோதிடம் ஆகிய நூல்களையெல்லாம் கற்றுத் தேர்வதென்றால் உனக்கு ஆயுள் பற்றாது. சமஸ்கிருதத்தில் மட்டும் சுமார் இரண்டு லட்சம் ஜோதிட சுலோகங்கள் உள்ளன. அனைத்தையும் உன் மண்டையில் உள்ள ஹார்ட் டிஸ்க்கில் ஏற்றுவதற்குள், உனக்கு கர்மகாரகன் போர்டிங் பாஸ் கொடுத்து, உன்னை மேல் உலகத்திற்கு அனுப்பி விடுவான். அந்தக் காலத்தில் படித்தார்கள் என்றால், கவனச் சிதறல் இல்லாத வேப்ப மரத்தடிக் கல்வி. இன்றைய சூழ்நிலையில், நம்மைச் சூழ்ந்திருக்கும் கார்பன் மோனாக்ஸைடு புகையில் நமக்கு ஏதாவது ஆகிவிடாமல் பார்த்துக் கொள்வதே பெரிய காரியம். ஓசோன் படத்திலேயே ஓட்டை விழுந்து விட்டது. உனக்கு விழுவதற்கு எவ்வளவு நேரம் ஆகும்? ஆகவே என்னுடன் வா, நான் ஜோதிடம் கற்றுக் கொள்ள ஒரு குறுக்கு வழியைக் காட்டுகிறேன்” என்றான். காட்டினான். 100 பக்கப் புத்தகம். நான் படித்து வியந்திருக்கிறேன்.

என்ன கொடுமை என்றால், என்னிடம் இருந்து அதைப் படித்துவிட்டுத் தருகிறேன் என்று வாங்கிக் கொண்டு போன சிநேகிதன் அதை போக்கடித்து விட்டான். தொலைந்து போய்விட்டதென்று தலையச் சொறிந்தான் (அவனுடைய தலையைத்தான்). நானும் தொலைந்து போகிறான் என்று விட்டு விட்டேன். இருபது ஆண்டுகளுக்கு முன்பு நடந்த சோகம் அது! அதிலிருந்து நான் யாருக்கும், எந்தப் புத்தகத்தையும் இரவலாகக் கொடுப்பதில்லை. கெட்ட பின்னே ஞானம்!

ஒரு சிந்தனையாளன் சொன்னான்:
”மனைவியையும், புத்தகங்களையும் இரவலாகக் கொடுக்காதே! போனால் திரும்பி வராது”

அவன் சொன்னது அசத்தலான உண்மை!
========================================
புதிதாக வருகிறவர்களுக்கு, நானும் ஒரு குறுக்கு வழியைக் காட்டப் போகிறேன்.
அதைக் காட்டுவதற்காகத் துணைப் பதிவு ஒன்றை இன்று ஆரம்பித்திருக்கிறேன்.
அதில் தினமும் பாடங்கள் சுருக்கமாக upload ஆகும்.

அனைத்துமே பழைய பாடங்கள்தான். தெரிவு செய்து படிப்பதற்குச் சுலபமாக
இருக்கும்.

அதை book mark செய்து வைத்து, நேரம் கிடைக்கும்போது உள்ளே சென்று பாருங்கள்.
உங்களுக்குத் தேவையான செய்திகளைக் குறிப்பெடுத்துக்கொள்ளுங்கள் அல்லது
உங்கள் கணினியில் copy செய்து வைத்துக் கொள்ளுங்கள். உதவியாக இருக்கும்.

அந்தப் பகுதிக்குக் கேள்வி, பதில், பின்னூட்டம் என்று எதுவும் கிடையாது.
அதை மனதில் கொள்க.

சென்று பாருங்கள். அதற்கான சுட்டி ( Link) இங்கே!

Enjoy!

அன்புடன்
வாத்தியார்
வாழ்க வளமுடன்!